އާ ޓާމިނަލާއެކު ބެގޭޖް ޗެކިންއަށް ފުރަތަމަ ފަހަރަށް ތްރީ-ޑީ ސްކްރީނިން މެޝިން ބޭނުންކުރަނީ

މި މަހު 26 ގައި ހުޅުވާ ވެލާނާ އިންޓަނޭޝަނަލް އެއާޕޯޓު (ވީއައިއޭ) ގެ އާ ޓާމިނަލާއެކު ފުރަތަމަ ފަހަރަށް ބެގޭޖް ޗެކިންއަށް ތްރީ-ޑީ ސްކްރީނިން މެޝިން ބޭނުންކުރަން ނިންމައިފި އެވެ.

ވެލާނާ އެއާޕޯޓު ހިންގާ އެމްއޭސީއެލްއިން މިއަދު މީޑިއާތަކަށް ދިން މައުލޫމާތުގައިވާ ގޮތުން، އެއާޕޯޓުގެ އާ ޓާމިނަލުގައި ބޭނުންކުރާ ބެގޭޖް ހޭންޑްލިންގެ އާ ސިސްޓަމުން ގަޑިއިރެއްގެ ތެރޭގައި 1،200 ލަގެޖް ސްކްރީން ކުރެވޭނެ ކަމަށެވެ. އަދި މިނެޓެއްގެ ތެރޭގައި 20 ބެގޭޖް ސްކްރީން ކުރެވޭނެ ކަމަށް އެ ކުންފުނިން ބުންޏެވެ.

އާ ސިސްޓަމަކީ މެލޭޝިއާގެ ކުއަލަމްޕޫރު އިންޓަނޭޝަނަލް އެއާޕޯޓާއި ސިންގަޕޫރުގެ ޗަންގީ އެއާޕޯޓުގައި ބޭނުންކުރާ ފަދަ ސިސްޓަމެއް ކަމަށް ވެސް އެމްއޭސީއެލުން ބުންޏެވެ.

އެމްއޭސީއެލުން ބުނީ ސަލާމަތީ ކަންކަން އިތުރަށް ކަށަވަރުކުރަން ތިން ލެވަލްއަކަށް ލަގެޖް ސްކްރީން ކުރާނެ ކަމަށާއި މުޅި ސިސްޓަމްގެ 90-80 ޕަސެންޓް ކުރިއަށް ގެންދާނީ އޮޓަމެޓިކްކޮށް ކަމަށެވެ.

ސްކްރީން ކުރުމުގައި މިހާރު ހުރި ގޮންޖެހުންތައް

އެމްއޭސީއެލްއިން ބުނީ ޗެކިން ކައުންޓަރަށް ދިއުމުގެ ކުރިން ޓާމިނަލް ބޭރުގައި ދިގު ކިއުއެއް ހަދަން ޖެހުމުގެ ސަބަބުންނާއި ސްކޭންކުރަން ޖެހުމުން ޕަސިންޖަރުންގެ ވަގުތު ގެއްލި، ބުރަތަކެއް އުފުލަން މިހާރު ޖެހޭ ކަމަށެވެ. އަދި އެންމެން ކުރިމަތީގައި ބެގޭޖު ސްކޭންކުރަން ޖެހުމާއި ބައެއް ފަހަރު އެ ތަކެތި ހުޅުވަން ޖެހުމުން ފަސިންޖަރުންގެ ޕްރައިވަސީ ގެއްލޭ ކަމަށް ވެސް އެ ކުންފުނިން ބުންޏެވެ.

އާ ޓާމިނަލާއެކު ގެންނަ ބަދަލުތަކުގެ ސަބަބުން ބެގޭޖް ސްކޭން ކުރުމުގައި ފަސިންޖަރުންނަށް ޖެހޭނީ ސެކިއުރިޓީ ޗެކިންގެ އެންމެ މަރުހަލާއެއް ކަމަށް އެމްއޭސީއެލުން ބުންޏެވެ.

އާ ޓާމިނަލާއެކު ބެގޭޖު ސްކްރީންކުރުމަށް އަންނާނެ ބަދަލުތައް

• މިހާރު ބޭނުންކުރާ ޓާމިނަލާ ހިލާފަށް އާ ޓާމިނަލުގައި ޗެކިން ކައުންޓަރުތަކަށް ދިއުމުގެ ކުރިން ބެގޭޖު ސްކޭން ކުރަން ނުޖެހޭނެ. އަދި ޓާމިނަލަށް ވަނުމުގެ ކުރިން ޓިކެޓު ދައްކާލުމަށްފަހު ވަގުތުން ޗެކިން ކައުންޓަރަށް ދެވޭނެ

• އާ ޓާމިނަލުގައި 47 ޗެކިން ކައުންޓަރާއި ސެލްފް ޗެކިންގެ ހަ ކިއޮކްސް ހުންނާނެ. އަދި ޗެކިން އޭރިއާގެ ޖާގަ ތަނަވަސްވުމުގެ ސަބަބުން ޓާމިނަލް ތެރޭގައި ތޮއްޖެހުން ކުޑަވެ، ހިދުމަތް އަވަސްވާނެ.

• އާ ޓާމިނަލްގައި ބެގޭޖް ހޭންޑްލިން ސިސްޓަމުން ސްކްރީންކުރާ ތިން މަރުހަލާއެއް އޮންނާނެ.

އެއާޕޯޓަށް ޗެކިންވުމަށްފަހު ދޫކޮށްލާ ބެގޭޖުތައް ފުރަތަމަ މަރުހަލާގައި ސްކޭންކުރާނީ އޮޓަމެޓިކް ސިސްޓަމަކުންނެވެ. އެކަމަށް ބޭނުންކުރާނީ އެންމެ ފަހުގެ އީޑީއެސް (ސީޓީއެކްސް) ކެޕޭސިޓީގެ ހަތަރު މެޝިނެކެވެ. އެއީ ތްރީ-ޑީކޮށް ބެގޭޖް ސްކްރީން ކުރާ މެޝިންތަކެވެ. އަދި އެ މަރުހަލާގައި އެއްވެސް ކަމެއް ފާހަގަ ކުރެވިއްޖެނަމަ ބެގޭޖު ދެން ފޮނުވާލާނީ ދެވަނަ މަރުހަލާއަށެވެ.

ދެވަނަ މަރުހަލާގައި އޮންނާނީ އޮޓަމެޓިކް މެޝިނުން ފާހަގަވި ކަންތައް އިތުރަށް ކަށަވަރު ކުރުމެވެ. އެ މަރުހަލާގައި ބެގޭޖު ސްކްރީން ކުރާނީ އޭވިއޭޝަން ސެކިއުރިޓީ ކޮމާންޑް (އެވްސެކޮމް)ގެ އޮފިސަރުންނާއި މޯލްޑިވްސް ކަސްޓަމްސް ސާވިސްގެ އޮފިސަރުންނެވެ.

އެމްއޭސީއެލުން ބުނީ އާ ޓާމިނަލުގައި އެވްސެކޮމްގެ އޮފިސަރުންނަށް ހާއްސަ 18 މޭޒާއި ކަސްޓަމްސް ސާވިސްގެ އޮފިސަރުންނަށް ހާއްސަ 22 މޭޒު ހުންނާނެ ކަމަށެވެ.

އެ އޮފިސަރުން ބެގޭޖް ސްކްރީން ކުރުމުގެ މަސައްކަތް ކުރާނީ ސިސްޓަމެއް މެދުވެރިކޮށެވެ. އެ މަރުހަލާއިން އެއްވެސް މައްސަލައެއް ފާހަގަނުވެއްޖެނަމަ، ބެގޭޖު އަނބުރާ އާންމު ރޫޓަށް ފޮނުވާލާނެ އެވެ. އަދި މައްސަލައެއް ފާހަގަވެއްޖެނަމަ ބެގޭޖު ފޮނުވާލާނީ ތިން ވަނަ އަދި އެންމެ ފަހު މަރުހަލާއަށެވެ.

ފަހު މަރުހަލާގައި ވެސް ބެޖޭގު ސްކްރީން ކުރާނީ އެވްސެކޮމްގެ އޮފިސަރުންނެވެ. އެ މަރުހަލާގައި ބެގޭޖު ސްކްރީންކުރާނީ ޑުއަލް ވިއު ސްކްރީނިން މެޝިންތަކުންނެވެ. އެއީ މިހާރު ވެސް އެ އެއާޕޯޓުގައި ބޭނުންކުރާ އަޔާޓާ ސްޓެންޑަޑްގެ މެޝިންތަކެކެވެ. އެކަން ކުރަން ހަ ސްޓޭޝަން އާ ޓާމިނަލުގައި ހުންނާނެ އެވެ.

އެ މަރުހަލާގައި، މަތިންދާބޯޓަށް އެރުވުން މަނާ އެއްވެސް އެއްޗެއް ފެނިއްޖެ ނަމަ ބެގޭޖު ހުޅުވާނެ އެވެ. އަދި އެކަން ކުރާނީ އެކަމަށް ހާއްސަކޮށްފައިވާ ސަރަހައްދަކަށް ގެންގޮސްގެންނެވެ. ބެގޭޖެއް ހުޅުވާނީ އެ ބެގޭޖުގެ ވެރިޔާގެ ހާޒިރުގަ އެވެ. އަދި ބެގޭޖުން ނަގަން ޖެހޭ އެއްޗެއް ފާހަގަވެއްޖެ ނަމަ، އެ އެއްޗެއް ނެގުމަށްފަހު ބެގޭޖު ލޯޑްކުރަން ފޮނުވާލާނެ އެވެ.

އެރައިވަލް ފަސިންޖަރުންގެ ބެގޭޖު ސްކްރީންކުރުން

ވެލާނާ އެއާޕޯޓުގައި މިހާރު ބޭނުންކުރަމުން އަންނަ ޓާމިނަލުގައި ބެގޭޖު ނެރެން ހުންނަނީ ހަތަރު ބެލްޓެވެ.

އެމްއޭސީއެލުން ބުނީ ރާއްޖެ އަންނަ ފަސިންޖަރުން އިމިގްރޭޝަން މަރުހަލާނިމި، ބެގޭޖު އަންނަން ދެން ގިނަ ވަގުތު މަޑުކުރަން ޖެހުމުން ބޮޑު ބުރައަކަށްވެ، އެކަމުގެ ޝަކުވާ ލިބޭ ކަމަށެވެ. އަދި ހާއްސަކޮށް ގިނަ ފްލައިޓްތައް އެއްފަހަރާ އަތުވެއްޖެނަމަ އެރައިވަލް ހޯލް ފުރި ތޮއްޖެހުމަކީ ދިމާވާ ބޮޑު ދައްޗެއް ކަމަށް އެ ކުންފުނިން ބުންޏެވެ.

އެ މައްސަލަ ހައްލުކުރުމަށް އާ ޓާމިނަލުގައި ބެގޭޖު ނެރެން ހަ ބެލްޓް ހުންނާނެ ކަމަށް އެމްއޭސީއެލުން ބުންޏެވެ.

އާ ޓާމިނަލުގައި އެރައިވަލް ހޯލް ބޮޑުވާނެ ކަމަށާއި ބެގޭޖް ސްކޭން ކުރުމަށްފަހު ނެރުމަށް ބޭނުން ކުރާނީ ހައި ސްޕީޑް މެޝިންތަކެއް ކަމަށްވާތީ ބެގޭޖް ލިބެންދެން މަޑުކުރަން ޖެހޭ ވަގުތު ވެސް ކުޑަވާނެ ކަމަށް އެ ކުންފުނިން ބުންޏެވެ.

ރާއްޖޭގެ މިނިވަންކަމަށް 60 އަހަރު ފުރޭ މުނާސަބަތާ ދިމާކޮށް، މައި އެއާޕޯޓުގެ އާ ޓާމިނަލް، މި މަހުގެ 26 ވަނަ ދުވަހު ބާއްވާ ކުލަގަދަ ރަސްމިއްޔާތަކާއެކު ހުޅުވުމުގެ އެންމެ ފަހުގެ ތައްޔާރީތައް އެމްއޭސީއެލުން އަންނަނީ ވަމުންނެވެ.

ވެލާނާ އިންޓަނޭޝަނަލް އެއާޕޯޓުގެ އާ ޓާމިނަލް އެޅުމަށް ސައުދީ ބިންލާދިން ގްރޫޕާ ސަރުކާރުން ހަވާލުކުރީ 2016 ވަނަ އަހަރު އެވެ. މީގެ އަށް ވަރަކަށް އަހަރު ކުރިން ފެށި އެ މަޝްރޫއު ނިންމައި އެއާޕޯޓް އަވަހަށް ހުޅުވުމަކީ މި ސަރުކާރު ވެރިކަމާ ހަވާލުވުމަށްފަހު އެންމެ އިސްކަން ދިން އެއް ޕްރޮޖެކްޓެވެ. އެކަމަށް ބޭނުންވާ އިތުރު ފައިނޭންސިން ވެސް ސައުދީ ފަންޑުން ހަމަޖައްސައިދިނެވެ.

އަހަރަކު 7.5 މިލިއަން ފަސިންޖަރުންނަށް ހިދުމަތް ދެވޭ ފެންވަރުގެ އެ އާ ޓާމިނަލް ހެދުމަށް ގާތްގަނޑަކަށް 600 މިލިއަން ޑޮލަރު (9.2 ބިލިއަން ރުފިޔާ) ހަރަދުކޮށްފައިވެ އެވެ.