މަޖިލީހުގެ ރައީސް މަސީހު. މަސީހުގެ އިތުބާރު ނެތް ކަމަށް ފާސް ކުރަން ޖެހޭ ކަމަށް މައުމޫން ވިދާޅުވި. - ފޮޓޯ: ނިޝާން އަލީ/ މިހާރު
26 މާޗް 2017 - 21:35
ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދުގެ އިތުބާރު ނެތް ކަމަށް ހުރިހާ މެމްބަރުން ވޯޓު ދެއްވުމަށް ކުރީގެ ރައީސް މައުމޫން އަބްދުލްގައްޔޫމް މިރޭ ގޮވާލައްވައިފި އެވެ.
މައުމޫން ކުރެއްވި ޓުވީޓެއްގައި ވިދާޅުވި ގޮތުގައި ޑިމޮކްރެޓިކް ހަމަތަކުގެ މަތިން މަޖިލިސް ހިންގަން މަގު ފަހި ކުރުމަށް މަޖިލީހުގެ ރައީސް މަސީހާ ދެކޮޅަށް ނަގާ ވޯޓުގައި ހުރިހާ މެމްބަރުން ބައިވެރިވެވަޑައިގެން، މަސީހުގެ އިތުބާރު ނެތް ކަމަށް ފާސް ކުރަން ޖެހެ އެވެ.
In order to enable Majlis to fulfil its mandate in a democratic manner, I appeal to all MPs to vote NO to Maseeh tomorrow. Nation First!
— Maumoon Abdul Gayoom (@maumoonagayoom) March 26, 2017
މައުމޫން މިރޭ ކުރެއްވި ޓުވީޓު.
އަމިއްލަ ދަތުރުފުޅެއްގައި މި މަހުގެ އަށް ވަނަ ދުވަހު އިންޑިއާގެ ބެންގަލޫރަށް ފުރާވަޑައިގަތުމުގެ ކުރިން ވެސް މައުމޫން ވަނީ މަސީހުގެ އިތުބާރު ނެތް ކަމުގެ ވޯޓަށް ތާއީދު ކުރައްވައިފަ އެވެ.
އެ މަނިކުފާނު އެ ދުވަހު ވިދާޅުވި ގޮތުގައި މަސީހުގެ އިތުބާރު ނެތް ކަމަށް މަޖިލީހަށް ހުށަހެޅި ވޯޓަކީ ގައުމު ހަމަ މަގަށް އެޅުވުމުގެ ފެށުމެވެ. އެ މަނިކުފާނު ވިދާޅުވީ އެ ވޯޓު ވަރަށް ރަނގަޅު އަޣުލަބިއްޔަތަކުން ކާމިޔާބުވާނެ ކަމަށް އުއްމީދު ކުރައްވާ ކަމަށެވެ.
މަޖިލިހުގެ ރައީސްގެ މައްޗަށް އިތުބާރު ނެތް ކަމަށް ފާސްވާނީ އެ ދުވަހެއްގެ ޖަލްސާއެއްގައި ވޯޓުގައި ބައިވެރިވާ މެމްބަރުންގެ އަޣުލަބިއްޔަތުންނެވެ. މަސީހުގެ މައްޗަށް އިތުބާރު ނެތްކަމަށް ފާސްވާނީ ބައެއް މެމްބަރުން ވިދާޅުވާ ގޮތުގައި، އިދިކޮޅު ފަރާތްތަކަށް 42 ވޯޓު ލިބިގެންނެވެ. އިދިކޮޅު ފަރާތްތަކުން ބުނަނީ ބޭނުންވާ އަދަދަށް މި ފަހަރު ވޯޓު ހަމަވެފައިވާ ކަމަށެވެ.
މަސީހުގެ އިތުބާރު ނެތް ކަމަށް ފާސް ކުރާނެ ކަމަށް އިދިކޮޅު ފަރާތްތަކުން ބުނަމުން އަންނަ އިރު، ސަރުކާރަށް ތާއީދު ކުރައްވާ މެމްބަރުން ވިދާޅުވަނީ އެ ވޯޓު ނާކާމިޔާބުކޮށްލާނީ ފަސޭހަކަމާ އެކު ކަމަށެވެ.
ވެރިކަން ކުރާ ޕާޓީ، ޕީޕީއެމްގެ މެމްބަރުކަމުން މައުމޫން ވަކި ކުރަން ކައުންސިލުން މިއަދު ނިންމި އިރު، ޕީޕީއެމްގެ މެމްބަރުން ވަކިކުރުމުގެ ގާނޫނީ ހައިސިއްޔަތެއް ދަރުބާރު ފެކްޝަނަށް ނެތް ކަމަށް ވިދާޅުވެ އެ މަނިކުފާނު ވަކިކުރަން ކައުންސިލުން ނިންމި ނިންމުމަށް އެ މަނިކުފާނު ވަނީ ދެކޮޅު ހައްދަވައިފަ އެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
ޒާ
27 March 2017
މައުމޫނުގެ ސިޔާސީ ކެރިއަގެ ހަނދުވަނީ އޮއްސިފައި. މައުމޫނަށް މަލާމާތް ކުރާ މީހެއް ނޫނީ މަގުމަތިންވެސް ނުފެނޭ.
Maldives
27 March 2017
މަސީހު ރައީސް ކަމުގައި ބައިންދަން ވޯޓްދޭ އެއްވެސް މެމްބަރަކަށް ދުވަހަކުވެސް އަހަރެންގެވޯޓެއްނުލިބޭނެ.
ފެއިލް
27 March 2017
އިދިކޮލު ފަރާތްތައް ފެއިލް ވާ މަންޒަރު ބަލަން ކެއްމަދުވެފަ މިހުރީ.
މުގާބޭ
26 March 2017
މައުމޫނު ގޮވައިފިއްޔާ ތިކަމެއް ޖެހޭނީ ކުރަން.
ސޮރީ
26 March 2017
ޤަޢުމުގެ ކަންކަން ރަނގަޅުކުރަން އެދޭނަމަ އަވަހަށް ޤަޢުމަށް ވަޑައިގަންނަވާ. މިހާރު ތިމަސައްކަތް ކުރަށްވަނީ ނަޝީދު ކޮޕީ ކުރައްވައިގެން ޤަޢުމުން ބޭރުގައި ހުންނަވައިގެން ޤައުމު ފަސާދަ ކުރުން. ތީ އަޅުގަނޑުމެން ޕީޕީ އެމް މެންބަރުން މަނިކުފާނުގެ ކިބައިން ފެންނާނެ ކަމެއްކަމަށް އުއްމީދުކުރި މަންޒަރެއްނޫން. އަވަހަށް ދިވެހި ރައްޔިތުންގެ ކިބައިން މަޢާފަން އެދެން ނަސޭހަތް ތެރިވަން.
ދިރާސާ
26 March 2017
34 ވޯޓް
އުންމީދަކީ
26 March 2017
އެންމެ ދެކެން ބޭނުންވާދުވަހަކީ ތިޔައީ. އެކަމަކު މެމްބަރުންތައް މަޖުބޫރުވެފައި ތިބިތަން މިފެންނަނީ. އެހެންތާވާނީ 500ރ އަށް އެޅި މަޖްބޫރު ވޯޓުން ހޮވިފަތިބި މެމްބަރުންވިއްޔާ. މިވޯޓަށް އާއެކޭ ބުނާމެމްބަރުންނަށް ދެންއޮތް މަޖްލިސް އިންތިހާބެއްގައި އޮންނާނީ ނޯ އެއްކަން ހަދާންކުރާތި.