އެމްޑީޕީގެ ޗެއާޕާސަންގެ މަގާމުގައި ހުންނަވައިގެން އެ ޕާޓީން ބޭއްވި ހަރަކާތެއްގައި ފައްޔާޒު ވާހަކަ ދައްކަވަނީ.--- ފޮޓޯ: ނިޝާން އަލީ | މިހާރު
24 ނޮވެމްބަރ 2025 - 00:44
އެމްޑީޕީގެ ޗެއާޕާސަންގެ މަގާމުގައި ހޭދަކުރެއްވި މުއްދަތުގައި އެންމެ ބޮޑަށް ބެއްލެވީ އެ ޕާޓީގެ އެއްބައިވަންތަކަން ގާއިމްކޮށް "އެއްވެގެން" މަސައްކަތް ކުރެވޭތޯ ކަމަށާއި މާޒީގައި ހިތަށްވީ ތަދުގެ ބަދަލު ހޯދަން އުޅެގެން އެމްޑީޕީ އަށް ކުރިއެރުން ލިބޭ ތަން ފެނިވަޑައިނުގަންނަވާ ކަމަށް އެ މަގާމުން ރޭ އިސްތިއުފާ ދެއްވި ފައްޔާޒު އިސްމާއިލް ވިދާޅުވެއްޖެ އެވެ.
ރޭ ބޭއްވި އެމްޑީޕީގެ ގައުމީ މަޖިލިހުގެ ބައްދަލުވުމުގެ ރިޔާސަތުގައި އިންނެވި ފައްޔާޒު އެ ބައްދަލުވުން ނިންމަވާލެއްވުމުގެ ގޮތުން ދެއްކެވި ވާހަކައިގައި ވަނީ އެ ޕާޓީގެ ޗެއާޕާސަންގެ މަގާމުން އިސްތިއުފާ ދެއްވާނެ ކަން އިއުލާން ކުރައްވައިފަ އެވެ. އެ ބައްދަލުވުން ނިންމާލައްވައި، އިރުކޮޅެއް ފަހުން ފައްޔާޒު ވަނީ އިސްތިއުފާ ދެއްވައި، އެކަން ސޯޝަލް މީޑިއާގައި އާންމު ކުރައްވައިފަ އެވެ.
މީޑިއާ ނުވައްދައި ރޭ ބޭއްވި ގައުމީ މަޖިލިހުގެ ބައްދަލުވުމުގެ ރިޔާސަތުގައި އިންނަވައިގެން ދެއްކެވި އެންމެ ފަހު ވާހަކައިގައި ފައްޔާޒު ވަނީ އޭނާ ޗެއާޕާސަންގެ މަގާމާ މޭ 23، 2022 ގައި ހަވާލުވެވަޑައިގެންނެވި ހިސާބުން މިހާތަނަށް ކުރެއްވި ސިޔާސީ މަސައްކަތްތައް ކުރުކޮށް ވިދާޅުވެ ދެއްވައިފަ އެވެ. ހާއްސަކޮށް ކުރީގެ ރައީސް އިބްރާހިމް މުހައްމަދު ސޯޯލިހާއި ކުރީގެ ރައީސް މުހައްމަދު ނަޝީދާ ދެބޭފުޅުންގެ ނުތަނަވަސްކަމުން އެމްޑީޕީ ސަލާމަތް ކުރަން ކުރެއްވި މަސައްކަތްތައް ހާމަކޮށްދެއްވި އެވެ.
އެ ހުރިހާ ވާހަކަތަކެއް ދެެއްކެވުމަށް ފަހު، ފައްޔާޒު ވިދާޅުވީ ޗެއާޕާސަންގެ މަގާމުގައި ހުންނަވައިގެން އޭނާ އަބަދުވެސް މަސައްކަތް ކުރެއްވީ އެމްޑީޕީގެ އެތެރޭގައި އުފެދިފައިވާ "ސްޕްލިޓް" ނުވަތަ ބައިބައިވުން ނައްތާލަން ކަމަށެވެ.
ފައްޔާޒު ވިދާޅުވި ގޮތުގައި، ކުރިއަށް ހުރި އިންތިހާބުތައް ވެސް އެމްޑީޕީ އަށް ކާމިޔާބު ކުރެވޭނީ އެ ބައިބައިވުންތައް ނައްތާލައިގެން "އެއްވެގެން" ނެވެ.
ކުރީގެ ރައީސް އިބްރާހިމް މުހައްމަދު ސޯލިހާއި އެމްޑީޕީގެ ޗެއާޕާސަންގެ މަގާމުން ރޭ އިސްތިއުފާ ދެއްވި ފައްޔާޒު ބައްދަލުުވުމެއްގައި---ފައިލް ފޮޓޯ: ނިޝާން އަލީ| މިހާރު
"އަޅުގަނޑުމެންނަށް ހިތަށްވީ ތަދުގެ ބަދަލު ހޯދަން އުޅެގެންނެއް އަޅުގަނޑުމެންނަކަށެއް ކުރިއެރުމެއް ލިބޭ ތަނެއް އަޅުގަނޑަކަށް ނުފެނޭ. އަޅުގަނޑު ގަބޫލުކުރާ ގޮތުގައި ސިޔާސީ ލީޑަރުންނަކީ އެ ކަހަލަ އިހުސާސްތަކުގެ މައްޗަށް އެރެން ޖެހޭނެ ބައެއް. އެ އިހުސާސްތަކުގެ މައްޗަށް އަރައި ގައުމާއި ރައްޔިތުންނަށް ފައިދާވާނެ ނިންމުންތަކެއް ނިންމަން ޖެހޭނެ ބައެއް. އެ ލީޑަރުންނަކީ ތިޔަބޭފުޅުން،" ގައުމީ މަޖިލިހުގެ ރޭގެ ބައްދަލުވުމަށް ހާޒިރުވި ފަސްދޮޅަހަކަށް މެމްބަރުންނަށް އިޝާރާތް ކުރައްވަމުން ފައްޔާޒު ވިދާޅުވި އެވެ.
އޭނާ ވިދާޅުވި ގޮތުގައި އެމްޑީޕީގެ އެތެރޭގައި މިހާރު އޮތް "ފިތުނަ" ނައްތާލުން ނުވަތަ އެ ވިސްނުން ބަދަލުކުރަންޖެހޭ ބަޔަކީ އެ ޕާޓީގެ ލީޑަޝިޕާއި ގައުމީ މަޖިލިހުގެ މެމްބަރުންނެވެ.
އަޅުގަނޑު ޗެއާޕާސަން ކަމުގައި މަސައްކަތްކުރީ އަޅުގަނޑުމެންގެ ތެރޭގައި އައި ސްޕްލިޓް އެއްކުރުމުގެ މަސައްކަތް،"--- ފައްޔާޒު
އެހެން ވިދާޅުވުމަށް ފަހު، ފައްޔާޒު ދެން އިއުލާން ކުރެއްވީ އެމްޑީޕީގެ ޗެއާސަންގެ މަގާމުން އިސްތިއުފާ ދެއްވަން ނިންމެވި ކަމެވެ.
އެމްޑީޕީގެ އެތެރޭގެ ގުޅުން "އެއްނުކުރެވޭ" ވާހަކައިގައި ފައްޔާޒު އިޝާރާތް ކުރައްވަނީ ކުރީގެ ރައީސް ނަޝީދު އަލުން އެ ޕާޓީއާ ގުޅިވަޑައިގެންފައިވާއިރު، އަދިވެސް އެ ގުޅުން ރަނގަޅު ނުކުރެވޭ މައްސަލާގައި ކަމަށް ބެލެވެ އެވެ.
ކުރީގެ ރައީސް ނަޝީދު އަލުން އެމްޑީޕީއާ ގުޅިވަޑައިގަތުމަށް މި އަހަރުގެ ޖޫން 23 ވަނަ ދުވަހުގެ ރޭ ބޭއްވި ޖަލްސާގައި އެ މަނިކުފާނާއި ފައްޔާޒު މަޝްވަރާއެއްގައި.---ފޮޓޯ: ފަޔާޒު މޫސާ| މިހާރު
ނަޝީދު އަލުން އެމްޑީޕީއާ ގުޅިވަޑައިގަތީ މި އަހަރުގެ ޖޫން 23 ގަ އެވެ. އެކަމަކު، އޭގެ ފަހުން ވެސް ކުރީގެ ރައީސް އިބްރާހިމް މުހައްމަދު ސޯލިހާ ދެބޭފުޅުންގެ ގުޅުން ރަނގަޅުވި ތަނެއް ނުފެނެ އެވެ.
ކުރިއަށް އޮތް 2028 ގެ ރިޔާސީ އިންތިހާބަށް އެމްޑީޕީގެ ޓިކެޓު ހޯއްދަވަން ޕްރައިމަރީގައި ވާދަކުރައްވާނެ ކަން މިހާތަނަށް ރަސްމީކޮށް އިއުލާން ކުރެއްވި ހަމައެކަނި ބޭފުޅަކީ ފައްޔާޒެވެ.
ގައުމީ މަޖިލިހުގެ ރޭގެ ބައްދަލުވުމުގައި ވެސް އެކަން ފާހަގަކުރައްވަމުން އެމްޑީޕީގެ އެންމެ ފަހުގެ ސަރުކާރުގެ އިކޮނޮމިކް މިނިސްޓަރުކަން ވެސް ކުރެއްވި ފައްޔާޒު ވިދާޅުވީ، ކެންޑިޑެސީ އިއުލާން ކުރެއްވި ފަހުން ޕާޓީގެ މަސައްކަތްތަކުގައި ވަރަށް ބޮޑެތި ގޮންޖެހުންތައް ކުރިމަތިވާ ކަމަށެވެ.
އެމްޑީޕީގެ ޗެއާޕާސަންގެ މަގާމުން ރޭ އިސްތިއުފާ ދެއްވި ފައްޔާޒާއި ކުރީގެ ފޮރިން މިނިސްޓަރު ޝާހިދު: ކުރިއަށް އޮތް ރިޔާސީ އިންތިހާބުގައި އެމްޑީޕީގެ ޓިކެޓް ހޯއްދަވަން މަސައްކަތް ކުރައްވާ ލީޑަރުންގެ ތެރޭގައި ޝާހިދު ވެސް ހިމެނިވަޑައިގަންނަވާ ކަމުގެ އަޑުގަދަ.
އެއް ކަމެއްގެ ގޮތުގައި ވިދާޅުވީ، ޗެއާޕާސަންގެ މަގާމުގައި ހުންނަވައިގެން ކުރައްވާ ކޮންމެ ކަމަކީ އޭނާ އަށް ފައިދާ ވެދާނެ ކަމެއް ކަަމަށް އެމްޑީޕީގެ ރިޔާސީ ޓިކެޓަށް ދެން ޝައުގުވެރިވެވަޑައިގަންނަވާ އެހެން ބޭފުޅުންނަށް ފެނި، ޕާޓީގެ ކުރިއެރުމަށް ހިޔަނި އެޅުމެވެ.
"އަޅުގަނޑު ޗެއާޕާސަން ކަމުގައި މަސައްކަތްކުރީ އަޅުގަނޑުމެންގެ ތެރޭގައި އައި ސްޕްލިޓް އެއްކުރުމުގެ މަސައްކަތް،" ފައްޔާޒު ވިދާޅުވި އެވެ.
އެމްޑީޕީގެ ޗެއާޕާސަންގެ މަގާމުން ފައްޔާޒު ކުއްލި ގޮތަކަށް ރޭ އިސްތިއުފާ ދެއްވީ އަންނަ އަހަރުގެ ލޯކަލް ކައުންސިލްތަކުގެ އިންތިހާބުގައި މާލޭގެ މޭޔަރުގެ ޓިކެޓް ހޯދުމުގެ ވާދަވެރިކަން އެ ޕާޓީގެ ތެރޭގައި ގަދަވެ، ބަހުގެ ހަމަލާތައް ވަރުގަދަ ވެފައި ވަނިކޮށެވެ. މޭޔަރުގެ ޓިކެޓް ހޯދަން ޕްރައިމަރީ އަށް މިހާރު ކެމްޕެއިން ކުރައްވަނީ މިހާރު ވެސް މާލޭގެ މޭޔަރު އާދަމް އާޒިމާއި ރައްޔިތުންގެ މަޖިލިހުގެ ކުރީގެ މެމްބަރު އަލީ އާޒިމެވެ.
ކުރީގެ ރައީސް އިބްރާހިމް މުހައްމަދު ސޯލިހާއި އެ މަނިކުފާނުގެ ސަޕޯޓަރުންގެ ގިނަ ބަޔަކު އާދަމް އާޒިމްގެ ފަހަތުގައި ތިބިއިރު، އަލީ އާޒިމާ އެކު ތިބި ތަން ފެންނަނީ ކުރީގެ ރައީސް ނަޝީދާއި ފައްޔާޒުގެ ސަޕޯޓަރުންނެވެ.
Copyright © 2025 Mihaaru · Terms and Conditions · Privacy Policy · Code of Ethics · Editorial Policy
ކޮމެންޓްތައް
ފައްޔާޒު ކަމަކުނުދޭ
24 November 2025
ވެރިކަމަށް ގެންނަން އަހަރެންނަށް ފައްޔާޒު ކަމަކު ނުދޭ. މާ ރުންކުރު މީހެއް. މުއިއްޒު ކަހަލަ މަޑުމައިތިރި މީހެއް ބޭނުމީ
ގިނި
24 November 2025
ބ ބޮޑު ފިތުނަވެރި ލެފްޓް ވިންގ ޕާޓީ ނެތި ކުރައްވާށި
ބޯހަލާކު 2.0
24 November 2025
މޮޅު ވާހަކަ ދައްކާނެ ކަމެއްނެތް. އެނގިސާފުވެގެން ދިއައީ ރިޔާސީ އިންތިޚާބުގެ މާކުރީންވެސް ފައްޔާޒު ހުރީ ވެރިކަން އެމްޑީޕީއަށް ހޯދައިދިނުމަށް ނޫން ކަމާއި މިހާރުވެސް އަމިއްލަ އެދުން އިސްކޮށް ނަޝީދުގެ ޑިމޮކްރެޓސް ކުދިން ރުއްސާން ކުރާ ކަމެއް ތިޔައީ. ވެރިކަން ތިމަންނާ އަށް ލިބޭތޯ ކުރާ މަސައްކަތް ނާކާމިޔާބުވާތަން ފެންނާނެ އިންޝާﷲ . ނަށީދު އަކީ ނަޝީދު. އެއްކަހަލަ ދެމީހުން ތިޔަތިބީ އެއްވެފައި ބަލަމާ ވާގޮތެއް
ނސދބ
24 November 2025
އިބޫ ވެރިކަމަށް އަރާވަޑައިގެން ބޮޑުވަޒީރު ކަން ނަސީދުއަށް ނުދިނީމަ ނަސީދު ރުޅިއައީ، އެހުވަފެން ސީދާ ނުވިޔާސް ރޫޅާލާކކަށް ނުޖެހޭ، މިއަދު އެކަމާއި ނަސީދު ހިތާމަކުރާނެ
ރައްޔު
24 November 2025
އެންމެންވެސްބޭނުންވަނީ ވެރިކަމުގެ ފަސްއަހަރު ހަމަކޮށްލާގެން ދައުލަތުގެ ބަލަދުއަރާ މީހަކަށްވާން. ފައިބާގެންދާއިރު ރައްޔިތުންގެ މާލުން ވައްކަންކޮށް ނުވީތާކަށް ރައްޔިތުންގެފައިސާއިން އިނާޔަތުގެ ގޮތުގައި ދިރިއުޅެވޭނެ ތަނަވަސްކަން ނުހައްގުންހޯދަން. ނަޝީދަކީ މިގައުމުގެ ހަލާކުގެ ގޮތުގައި އަދުގެޖީލުގެ އެންމެންވެސްދަނޭ. އެމްޑީޕީ ފެށުނީވެސް ގޯހުން ނިމޭނީވެސް ގޯހުން.
ދުމަށި
24 November 2025
މޭޔަރުގެ ގޮނޑި އެމްޑީޕީއަށް ލިބޭނެ ކަމަށް ބެލެވެނީ އާދަމް އާޒިމް ނެރެގެނެވެ. އަލީ އާޒިމް ނެރެެން ވިއްކާނެ އެއްޗެއް ނެތެވެ. ކޮށްފައި ހުރި މުހިއްމު ކަމެއް ނެތެވެ. އާޒިމްއާގުޅޭގޮތުން ދައްކާނެ ޕްޒިޓިވް ކަންކަން ބައިވަރެވެ. އާޒީމް ނޫން މީހަކު ނެރުނުމަ ކުރިންވެސް އެ ގޮނޑިއެއް ނުލިބުނީހެެވެ. މީގައި މުހިއްމީ ގޮނޑި ލިބޭނެ ގޮތެއް ހެދުމެވެ.
ތުއްތީދިބެ
24 November 2025
ތީގެ ބަދަލުހޯދާން ދިއުން އެންމެބުއްދިވެރީ ކޯޓަށް.
6
24 November 2025
ބަލަ ހަގީގީ ޑިމޮކުރެޓިކު ޕާޓީއެއްގެތެރޭގާވިއްޔާ ދެކޮޅުވެރިކަން އޮންނަންޖެހޭނެ. ޚިޔަަލުތަފާތުވެ އެކަކުއަނެކަކަށް އެއްޗެހި ގޮވޭންޖެހޭނެ. އެޅިހާބަތަކަށް ރިހަވެގެން ޑިމޮކުރަސީއެއް އާލާއެއްނުކުރެވޭނެ. މިސާލަކަށް ފުދޭނެ ގާސިމާ ޔާމީނު ޕާޓީ.
ރައްޔާންް
24 November 2025
ރައީސް މުއިއްޒުފަދަ އިހްލާސްތެރި ތެދުވެރި ވެރިން ތިއްބާ ފައްޔާޒްމެންކަހަލަ ކޮރަޕްޓް މީހުން ފަހަތުން މިގައުމުގަ ދުވާނެ އިތުރުބަޔަކު މިހާރަކު ނެތް.
ހުންނުހީނާާ
24 November 2025
ތިއީ ރައްޔިތުން ޓެސްޓްކޮށް ފެއިލްވެފައިން ޕްރޮޑަކްޓެއް.