އާދަމް އާޒިމްގެ ހަތަރެސްފައިގައި ވެސް ހުރީ ހިދުމަތްތަކުގެ ކަންކަން ހޭކިފައި: ސަމީރު

މާލޭގެ މިހާރުގެ މޭޔަރު އަދި ކުރިއަށް އޮތް ލޯކަލް ކައުންސިލްތަކުގެ އިންތިހާބުގައި އެމްޑީޕީގެ ޓިކެޓު ހޯއްދަވަން ކެމްޕެއިން ކުރައްވާ އާދަމް އާޒިމް ރާއްޖެ އަށް ކޮށްދެއްވާފައިވާ ހިދުމަތްތައް ވަރަށް ގިނަ ކަމަށާއި އާދަމް އާޒިމްގެ "ހަތަރެސްފައިގައި ވެސް ހުރީ" ހިދުމަތްތަކުގެ ކަންކަން ހޭކިފައި ކަމަށް ހއ. ދިއްދޫ ދާއިރާގެ ކުރީގެ މެމްބަރު އަހުމަދު ސަމީރު މިރޭ ވިދާޅުވެއްޖެ އެވެ.

އެމްޑީޕީގެ މައި ޖަގަހަ، ދަނޑިކޮށި ޖަގަހައިގައި ބޭއްވި ކެމްޕެއިން ޖަލްސާގައި ސަމީރު ވިދާޅުވީ އާދަމް އާޒިމަކީ އެ ޕާޓީ އަށް ތެދުވެރި، ވަފާތެރި ބޭފުޅެއް ކަމަށެވެ.

އެމްޑީޕީގެ އެންމެ ފަހުގެ ވެރިކަމުގައި ރައީސް އޮފީހުގެ މިނިސްޓަރަކަށް ހުންނެވި ސަމީރު ވިދާޅުވީ، އާދަމް އާޒިމް މާލޭގެ މޭޔަރަކަށް ގެނައުމަށް އަނެއްކާ ވެސް ބޭނުންވާ ސަބަބަކީ ހުރިހާ ހިދުމަތެއް ކޮށްދެއްވާފައިވާތީ ކަމަށެވެ.

"އާދަނު އަޅުގަނޑުމެންނަށް ކަމުދާ ސަބަބަކީ އާދަނުގެ ހަތަރެސްފައިގައި އަދި ހުރިހާ ހިސާބެއްގައި ވެސް ހުރީ މި ހިދުމަތްތަކުގެ ކަންތައްތައް ހޭކިފައި. އެމްޑްބަލިއުއެސްސީ އަށް ބަލާލިޔަސް އެ ތަނުގައި މަސައްކަތް ކުރައްވާފައި. ބަދަލުކޮށްލައްވާފައި. އެސްޓީއޯ އަށް ބަލާލިޔަސް އެތާނގައި ވެސް މަސައްކަތް ކުރައްވާފައި، ބަދަލުކޮށްލައްވާފައި. އެމްޓީސީސީގައި މަސައްކަތް ކުރައްވާފައި، ބަދަލުކޮށްލައްވާފައި. އެ ނާތީޖާ ދައްކަވައި މާލޭގެ މޭޔަރަކަށް ވަޑައިގެންނެވީ،" ސަމީރު ވިދާޅުވި އެވެ.

"މާލޭގައި މި ކުޑަ މުއްދަތުގެ ތެރޭގައި މާލޭގެ ރައްޔިތުންނަށް މި ގެނެސްދެވުނު ބަދަލުން މާލޭގައި ފެން ހެދުމާއި ކުދިކުދި މައްސަލަތައް ހައްލު ނުވެ އޮތް މައްސަލަ އަށް ހައްލެއް ގެނެސްދެވުނު ހަމައެނަކި މީހަކީ އާދަމް އާޒިމް."

ސަމީރު ވިދާޅުވި ގޮތުގައި، އާދަމް އާޒިމް އެ މަސައްކަތް ކުރެއްވީ އެންމެ ދެ އަހަރު ތެރޭގަ އެވެ. މޭޔަރު ކަމުގައި މިހާރުގެ ރައީސް ޑރ. މުހައްމަދު މުއިއްޒު ހުންނެވި އިރު އެކަން ނުކުރެވުނު ކަމަށް ވެސް ސަމީރު ވިދާޅުވި އެވެ.

އާދަމް އާޒިމަށް ތާއީދު ކުރައްވަނީ އާދަމް އާޒިމްގެ ބޭބޭ، ރައްޔިތުންގެ މަޖިލިހުގެ މާފަންނު އުތުރު ދާއިރާގެ މިހާރުގެ މެމްބަރު މުހައްމަދު ނާޒިމް އެންމެ ފަހުގެ ރިޔާސީ އިންތިހާބަށް ނުކުމެވަޑައިގަތުމުން ވެސް އޭނާ އަށް ތާއީދު ނުކުރައްވައި، ބަދުބަހެއް ވެސް ރައްދު ނުކުރައްވައި، އެމްޑީޕީއާ އެކު ވީ ގޮތެއް ވާން ހުންނެވުމުން ކަމަށް ވެސް ސަމީރު ވިދާޅުވި އެވެ.

"މިއީ ނޫންތޯ އެމްޑީޕީ މެންބަރުންނަކީ. އާދަމްގެ އަނބިކަނބަލުންނަކީ އަދި އެހެން ދިމާއަކަށް ސިޔާސީ ގޮތުން ގުޅިފައި ހުރި ބޭފުޅެއް. އެކަމަކު ބައިބައިވެގެން ދިޔައިރު ވެސް އާދަނަކަށް ބަދަލެއް ނައި. ތިބޭފުޅުންނަށް ހީވަނީތޯ އެ ފުރުސަތު އާދަނަށް ނުލިބޭނެހެން. ނުލިބޭނެތޯ. ނުބުނާނެތޯ އަންނާށެކޭ. އެކަމަކު އާދަނު ނުގޮސް ހުރީމާ އެއީ ނޫންތޯ އެމްޑީޕީ މެންބަރަކީ،" ސަމީރު ވިދާޅުވި އެވެ.

ސަމީރު ވިދާޅުވީ އާދަމް އާޒިމަކީ އެމްޑީޕީގެ މެމްބަރުން އެކަނި ކޮށްފައި ދުރަށް ވަޑައިގަންނަވާނެ ބޭފުޅެއް ނޫން ކަމަށާއި މަސައްކަތް ކުރައްވާ މީހުންނާ އެކު ވެސް އެ ގޮތުގައި އުޅުއްވާނެ ކަމަށެވެ.