އުފަން ރަށުގައި ދިމާވި ގޮންޖެހުންތަކާއެކު މީގެ އަހަރުތަކެއް ކުރިން އައިޝަތު ޔުމްނާ އަދި ފިރިމީހާ މުހައްމަދު ރިޔާޒު މާލެ ބަދަލުވީ ދޮށީ ދަރިފުޅަށް ފަހި މުސްތަގުބަލެއް ހޯދައިދޭށެވެ. އޭގެ ނަތީޖާ ވަރަށް ރަނގަޅު ކަމަށް، އެ އާއިލާއިން މިހާރު ގަބޫލުކުރެ އެވެ.
އެ ދެމަފިރިންގެ ދޮށީ ދަރިފުޅު ރަޔާން ރިޔާޒު އަބްދުލް ވާހިދު ވަނީ ހަގު އުމުރުގައި އޭ ލެވެލް އިމްތިހާނުގައި ބައިވެރިވެ، ގައުމީ ގަދަ 10 ގައި ހިމެނިފަ އެވެ. އުމުރުން 14 އަހަރުގައި އޭ ލެވެލް ނިންމައި މިހާރު
ކެމިސްޓްރީން އޯ ލެވެލް ހަދައިގެން އޭ ސްޓާ ހޯދި އެވެ. ހުރަވީ ސްކޫލުގައި ގްރޭޑު 6 ގައި އުޅެމުން އަމިއްލައަށް ބައިވެރިވެގެން ހެދި އޯ ލެވެލްގައި ބަޔޮލޮޖީން އޭ ސްޓާ، ހިސާބާއި ފިޒިކްސް އަދި އިނގިރޭސިން އޭ ހޯދައިގެން ހއ. އިހަވަންދުއަށް އުފަން އެ ކުޑަ އާއިލާއަށް ބޮޑު އުފާވެރިކަމެއް ގެނެސްދިނެވެ.
ރަޔާންގެ މަންމަ، އައިޝަތު ޔުމްނާ "މިހާރު"އަށް ބުނީ ކެމިސްޓްރީ އިމްތިހާނަށް ތައްޔާރުވީ ދަރިފުޅު އެކަނި ކިޔަވައިގެން ކަމަށެވެ. ނަމަވެސް، ދެން ހުރި މާއްދާތައް ހެދީ ޓިއުޝަންގެ އެހީގަ އެވެ. އަދި ހަގު އުމުރެއްގައި އޯ ލެވެލް ހަދައިގެން ކުރިއަށް ދާން ބޭނުންވީ ވެސް ރަޔާން އަމިއްލައަށް ކަމަށް އޭނާ ބުންޏެވެ.
ބާރަ އަހަރުގައި ވިލާ އިންޓަނޭޝަނަލް ހައި ސްކޫލުން އޭ ލެވެލްއަށް ކިޔަވަން ފެށީ އެހެންވެގެން ކަމަށް، ސީއެޗްއެސްއީގައި ކެމިސްޓްރީ ޓީޗަރަކަށް އުޅޭ ޔުމްނާ ބުންޏެވެ.
ގްރޭޑު 12ގެ އެންމެ ފަހުގެ ނަތީޖާ މިދިޔަ ހަފުތާގައި ލިބުނުއިރު ރަޔާން ވަނީ އަނެއްކާ ވެސް ވިދާލައިފަ އެވެ.
އޭނާ ވަނީ ކެމިސްޓްރީން އޭ ސްޓާ، އިސްލާމުން އޭ، ބަޔޮލޮޖީ އަދި ހިސާބުން ބީ އަކާއި ދިވެހިން ސީއެއް ހޯދައިގެން ގައުމީ ގަދަ 10ގެ ނުވަ ވަނަ ހާސިލްކޮށްފަ އެވެ.
އޯޓިޒަމް ހުންނަ ދަރިފުޅު އެ ހޯދި ކާމިޔާބާއާ މެދު ޔުމްނާ އަދި ރިޔާޒު ހުރީ އުފަލުން ފޮޅިފަ އެވެ.
ހަތަރު އަހަރު ދޮށީ ކުދިންތަކަކާއެކު ރަޔާން ގްރޭޑު 11 ކިޔަވަން ފެށުމުން ފުރަތަމަ ނުތަނަވަސްވި އެވެ. އެކަމަކު، ވިލާގެ ދޮރާށިން ފުރަތަމަ އެތެރެއަށް ވަދެގެން ދިޔަ ގޮތަށް ހިފި އަތުގައި ސްކޫލުން ދުލެއް ނުކުރި އެވެ. ރަޔާންގެ ކިބައިގައި ހުރި ގާބިލްކަން ބަލައިގަނެ، ޕްރިންސިޕަލާއި ޓީޗަރުންނާއި ދަރިވަރުންގެ ފަރާތުން ދިނީ ލޯތްބެވެ.
"ހުރިހާ އެންމެން ވެސް ވަރަށް ރަނގަޅު،" ޔުމްނާ ބުންޏެވެ.
އޭނާ ބުނީ އުމުރުން ދެ އަހަރާ ބައިގައި އޯޓިޒަމަށް ޑައިގްނޯޒްކުރެވުނު ރަޔާންގެ މޫޑު ވެސް، މޫސުމާއެކު ބަދަލުވާ ކަމަށެވެ. އެހެންވެ، ސީދާ ކިޔެވުމަށް ގިނައިރު ސަމާލުކަން ދިނުމަށް ދަތިތައް ހުއްޓަސް، ރަނގަޅު ނަތީޖާއެއް ހޯދަން ސްކޫލާއި ގޭގައި ވަރަށް މަސައްކަތްކުރިކަން، ތިން ކުދިންގެ މަންމަ ފާހަގަކުރި އެވެ.
"ވާރޭވެހި، ވިދާ ގުގުރަންޏާ ރަޔާނަށް ވަރަށް އުނދަގޫވާނެ. އަޑުގަދަ ތަންތަނުގައި ހުންނަން އުނދަގޫވާނެ. ނަމަވެސް، ކުރިއަށްވުރެ މިހާރު ބޮޑުތަން ރަނގަޅު،" ޔުމްނާ ބުންޏެވެ.
މީހުންނާ މުއާމަލާތްކުރުމަކީ ވެސް ރަޔާނަށް އުނދަގޫ ކަމެކެވެ. އޭނާގެ އެންމެ ގާތް އެކުވެރިއަކީ އަބަދު ވެސް ފޮތްތަކެވެ. ހާއްސަކޮށް ކެމިސްޓްރީ މާއްދާއަށް އޮންނަ ލޯބި ފާހަގަކުރެވެ އެވެ.
ރަސްމީ ތައުލީމުގެ ދެ މަރުހަލާ ނިންމައި، ރަޔާން މިހާރު ތައްޔާރުވަމުން އަންނަނީ ޑިގްރީ ހެދުމަށެވެ.
ޔުމްނާ ބުނީ ރަޔާން އަބަދު ވެސް ބޭނުންވަނީ ކެމިސްޓްރީއާ ގުޅުން ހުރި ދާއިރާއަކުން ކުރިއަށްދާށެވެ. ނަމަވެސް، ރާއްޖެއިން އެ ރޮނގުން ކިޔެވެން ނެތުމުން މިހާރު ވިސްނައިގެން ހުރީ ބަޔޯޓެކް ނުވަތަ ފޮރެންސިކް ތަހުލީލު ކިޔަވާށެވެ. އެކަމަކު، ސްކޮލަޝިޕަލާއެކު ރާއްޖެއިން ބޭރުން ކިޔެވުމުގެ ފުރުސަތު ފަހިވެއްޖެނަމަ ރަޔާންގެ ހުވަފެން ހަގީގަތަކަށް ވެގެންދާނެ ކަމަށް އާއިލާ އިން ދެކެ އެވެ.