ސްކޭމްކޮށްގެން ހޯދާ ފައިސާ އެކައުންޓަށް ޖަމާކުރުމުން އެ ފައިސާ ނަގައިދޭ ކަމުގެ ތުހުމަތުގައި މީހަކު ހަައްޔަރުކޮށް، 15 ދުވަަހަށް ބަންދުކޮށްފި އެވެ.
ކްރިމިނަލް ކޯޓުން އިއްޔެ ނެރުނު ބަންދު އަމުރުގައިވާ ގޮތުން އެ މައްސަލައިގައި ބަންދުކުރީ ހއ.ކެލާ ޕެނަމާ، މުހައްމަދު ސިމާދެވެ.
އޭނާ ބަންދުގައި ބަހައްޓަން ދިން އަމުރުގައިވާ ގޮތުން، އޭނާއަށް ފުލުހުން ކުރާ ތުހުމަތާ ގުޅޭ ކޮންމެވެސް މިންވަރެއްގެ ހެކި ފުލުހުން ކޯޓަށް ހުށަހެޅި އެވެ. އެއީ ބޭންކްގެ ލިޔުންތަކާއި ތަހުގީގު ބަޔާނެވެ.
ކޯޓުގައި ފުލުހުން ބުނެފައިވާ ގޮތުގައި އޭނާއަށް ތުހުމަތު ކުރެވޭ އެފަދަ އެެހެން މައްސަލަަތައް ވެސް ކުރިން ހުށަހަޅާފައިވެ އެވެ.
ސްކޭމްތައް ހުއްޓުވުމަށާއި ގެއްލޭ ފައިސާ އަނބުރާ ހޯދުމުގެ މަސައްކަތަށް މިދިޔަ އަހަރުގެ މާޗު މަހު އެންޓި-ސްކޭމް ސެންޓަރު ގާއިމްކުރި ފަހުން 10 މަސް ދުވަހުގެ ތެރޭގައި ސްކޭމްތަކުގެ ތެރެއިން ގެއްލުނު ފައިސާގެ 37 ޕަސެންޓް އަނބުރާ ހޯދާފައިވާ ކަމަށް އެ ސެންޓަރުން ކުރިން ބުނެފައިވެ އެވެ.
ފުލުހުންގެ ސައިބާ ކްރައިމް ސެންޓަރުން މިދިޔަ މަހު އިސްކަންދަރުކޮށީގައި ބޭއްވި ޕްރެސް ބްރީފިންއެއްގައި ހެޑް އޮފް އެންޓި ސްކޭމް ސެންޓާ، އިންސްޕެކްޓާ އޮފް ޕޮލިސް އާދަމް ނަވީދު ވިދާޅުވެފައިވަނީ ސްކޭމް ހުއްޓުވުމާއި ސްކޭމްތަކުގައި ގެއްލޭ ފައިސާ އަނބުރާ ހޯދުމުގައި ރާއްޖޭގެ އެންޓި ސްކޭމް ސެންޓަރުން ހޯދީ އެހެން ގައުމުތަކާ އަަޅާ ބަލާއިރު ރަނގަޅު ކާމިޔާބީއެއް ކަމަށެވެ.
އޭނާ ވިދާޅުވި ގޮތުގައި ސްކޭމެއް ހިނގުމާ އެކު އެންޓި-ސްކޭމް ސެންޓަރުން އެންމެ އިސްކަމެއް ދީގެން ކުރަނީ އެ ސްކޭމެއްގައި ގެއްލުނު ފައިސާ އަނބުރާ ހޯދުމުގެ މަސައްކަތާއި ސްކޭމްގައި އިތުރު ބަޔަކު ޖެހުނަ ނުދީ، ސްކޭމަރުން ބޭނުންކުރި ވަސީލަތްތައް ނައްތާލުމުގެ މަސައްކަތެވެ.
ނަވީދު ވިދާޅުވި ގޮތުގައި 2021 ވަނަ އަހަރުން ފެށިގެން އެންޓި-ސްކޭމް ސެންޓަރު އުފެއްދުމާ ހަމައަށް 6،000 އަށް ވުރެ ގިނަ ރައްޔިތުން ސްކޭމްތަކުގައި ޖެހި އޭގެ ތެރެއިން 110 މިލިއަން ރުފިޔާ އަށް ވުރެ ގިނަ ފައިސާ ގެއްލުނެވެ.