ހުރިހާ ދަރިވަރުންނަކީ ވެސް ފަސްތިސްނަމާދުން ދުވަސް ފަށާ ކުދިންނަށް ވާން ރައީސް ޑރ. މުހައްމަދު މުއިއްޒު މިއަދު އިލްތިމާސް ކުރައްވައިފި އެވެ.
ހުޅުމާލެ 2 ގައި އަލަށް އިމާރާތްކުރި ޝަހީދު އަލީ ސްކޫލް ހުޅުވަން މިއަދު ބޭއްވި ރަސްމިއްޔާތުގައި ރައީސް ވިދާޅުވީ ދަރިވަރުންނަކީ އިސްލާމްދީނުގައި އޮންނަ ގޮތަށް ކަންކަން ތަރުތީބުކޮށްގެން ކޮންމެ ދުވަހެއް ވެސް ހޭދަކުރާ ބަޔަަކަށް ވާން ޖެހޭ ކަމަށެވެ. ނަމާދުތައް އޭގެ ވަގުތުގައި ކުރަން ހުރިހާ ދަރިވަރުންނަށް ވަރަށް ބޮޑަށް އިލްތިމާސްކުރައްވާ ކަމަށް ވެސް އެ މަނިކުފާނު ވިދާޅުވި އެވެ.
"ފަރުޟް ފަސް ނަމާދު އަދާކުރުމަށް ހުރިހާ ލޮބުވެތި ދަރިވަރުންނަށް އަޅުގަނޑު ވަރަށް ބޮޑަށް އިލްތިމާސްކުރަން. ވަގުތުން ވަގުތަށް ނަމާދުކުރުމަށް، ފަތިސްނަމާދަށް ގަޑިއަށް ހޭލުމަށް، ހޭލައި ފަތިސްނަމާދުކޮށްގެން ދުވަސް ފެށުމަށް، ހުރިހާ ކުދިން ވެސް އަޒުމް ކަނޑައަޅަން އަަޅުގަނޑު ރާއްޖޭގެ ހުރިހާ ކިޔަވާކުދިންނަށް އަޅުގަނޑު އިލްތިމާސްކުރަން،" ރައީސް ވިދާޅުވި އެވެ.
ދަރިވަރުން ދުވަސް ފަށަނީ ފަތިސްނަމާދުންކަން ކަށަވަރުކުރުމަކީ ޒިންމާއެއް ކަމަަށް ދެކިގެން މައިންބަފައިން އެކަން ކަށަވަރުކުރަން ވެސް އެ މަނިކުފާނު ގޮވައިލެއްވި އެވެ.
ރައީސް ވިދާޅުވީ ދީނުަގައި ބަޔާންކޮށްފައިވާ ކަންތައްތަކަކީ ވަރަށް ވެސް މާތް މަގުސަދެއްގައި ކަނޑައަޅާފައިވާ ކަންތައްތައް ކަމަށާއި އެއީ ހަަމ އެކަނި ފޮތް ގޮތުގައި ލިޔެފައި ހުންނަން ޖެހޭ ކަންކަމެއް ނޫން ކަމަށެވެ.
"އަމަލީ ގޮތުން ކޮންމެ ދުވަހަކު އަޅުގަނޑުމެން ކަންކަން ކުރުމަށް ޓަކައި ދީނުގެ ކަންކަން އޮންނަނީ،" ރައީސް ވިދާޅުވި އެވެ.
ސްކޫލްތަކުގައި ވެސް ކަންކަން ތަރުތީބުވެފައި ހުންނަން ވާނީ ދުވަސް ފަށަން އޮންނަ ގޮތަށް ދަރިވަރުން ދުަވަސް ފަށައި، ދަރިވަރުން ދުވަސްތަކުގެ ބޭނުން އެންމެ ހެޔޮގޮތުގައި ހިފާ ގޮތަށް ކަމަށް ރައީސް ވިދާޅުވި އެވެ. އެ ކަމަށް ޝަހީދު އަލީ ސްކޫލްގައި ނަމާދުކުރާ ދެކޮޓަރި ހުރުމަކީ އެގޮތުން އުފާކުރައްވާ ކަމެއް ކަމަަށް ވެސް އެމަނިކުފާނު ވިދާޅުވި އެވެ. ކްލާސްރޫމް ތެރޭގައި ވެސް ނަމާދުކުރެވޭ ގޮތަށް ޓީޗަރުން މިހާރު ކަންކަން ބައްޓަން ކުރައްވާ ކަމަށް ވެސް ވިދާޅުވި އެވެ.
"އެހެންވީމާ ނަމާދަަށް ފަރުވާތެރިކަން ހުރިހާ ކުދިން ވެސް އަދާކުރަން ޖެހޭނެ. މައިންބަފައިންނަށް ކިޔަމަންތެރިވާން ޖެހޭނެ. ޓީޗަރުން ބުނާ ބަސް އަހައި، ސްކޫލްގެ ވެރިން އަންގާ މަގުން، ސްކޫލް ތެރޭގައި އަދި ތައުލީމީ ހަޔާތުގައި ޖުމްލަކޮށް ކަންކަން ކުރަން ވާނެ،"ރައީސް ވިދާޅުވި އެވެ.
ދަރިވަރުން އެގޮތަށް ބައްޓަން ކޮށްފި ނަމަ އެ އެޅެނީ ގުޑުވާ ނުލެވޭ ވަރުގެ ބިންގަލެއް ކަމަށް ވެސް އެމަނިކުފާނު ވިދާޅުވި އެވެ.
ޝަހީދު އަލީ ސްކޫލަކީ މި ސަރުކާރުން މާލެ ސަރަހައްދުގައި އިމާރާތްކުރަން ފަށައި ހުޅުވި ފުރަތަމަ ސްކޫލް ވެސް މެ އެވެ.
އެ ސްކޫލްގެ މަސައްކަތް އާރުސީސީއާ ހަވާލުކުރީ 2021 ވަނަ އަހަރު އެވެ. އަދި އަމަލީ މަސައްކަތް ފެށުމަށް ބިންގާ އެޅީ ޑިސެމްބަރު 2023 ގަ އެވެ.
ގްރޭޑް 1-10 އާ ހަމައަށް ކިޔަވައިދޭން ނިންމާފައިވާ ޝަހީދު އަލީ ސްކޫލުގައި 32 ކުދިންގެ ޖާގައިގެ 54 ކްލާސްރޫމު ހިމެނެ އެވެ.
މީގެ އިތުރުން 400 ކުދިންގެ އޮޑިޓޯރިއަމަކާއި ލައިބްރަރީ އާއި ކޮމްޕިއުޓަރު ލެބާއި ތިން ކެމިސްޓްރީ ލެބާއި އިންޑޯ ހޯލަކާއި އައުޓްޑޯ ހޯލެއް ވެސް ވަނީ ގާއިމްކޮށްފައިވެ އެވެ. އޭގެ އިތުރުން 20 ކުދިންގެ ޖާގައިގެން ތިން ލިފްޓު ވެސް ވަނީ ހަރުކޮށްފަ އެވެ.