އޯ ލެވެލްގެ އެސްއެސްސީ އިމްތިހާނަށް ގުރުއާން މާއްދާ ކިޔަވައިދޭން ފަށައި އަންނަ އަހަރުން ފެށިގެން އެ އިމްތިހާން ބާއްވަން އެޑިޔުކޭޝަން މިނިސްޓްރީން ނިންމާފައިވާ ކަމަށް މިނިސްޓަރު ޑރ. އިސްމާއިލް ޝަފީއު މިއަދު ވިދާޅުވެއްޖެ އެވެ.
މިއަދު ފެށި ދިރާސީ އާ އަހަރާ ގުޅިގެން މިނިސްޓަރު ދެއްވި ހިތޯބުގައި ވިދާޅުވީ މި ދިރާސީ އަހަރު، އެންމެ ބޮޑު އިސްކަމެއް ދޭނީ ދަރިވަރުންގެ ކިބައިގައި ރިވެތި އަހުލާގު އަށަގެންނެވުމަށް ކަމަށެވެ.
ރާއްޖޭގެ ސްކޫލުތަކުގައި ތައުލީމް ހާސިލުކުރަމުން އަންނަ ކޮންމެ ދަރިވަރަކީ ވެސް، ރިވެތި އާދަތަކާއި ސިފަތަކާއެކު އަނެކަކަށް އިހުތިރާމްކުރާ ދަރިވަރުން ތަކަކަށް ހެދުމަށް މި އަހަރު ހާއްސަ ޕްރޮގްރާމެއް ފެށުމަށް ނިންމާފައިވާ ކަމަށް އިސްމާއިލް ވިދާޅުވި އެވެ.
ގުރުއާނުގެ އިލްމަށް ދަރިވަރުންގެ ހިތްތަކުގައި ލޯބި ޖައްސުވައި ޝައުގުވެރިކުރުވަން އޯ ލެވެލްގެ އެސްއެސްސީ އިމްތިހާނުގައި ވަކި މާއްދާއެއްގެ ގޮތުގައި މި އަހަރު ޕައިލެޓް ޕްރޮގްރާމެއް ކުރިއަށް ގެންދަވާނެ ކަމަށް ވެސް މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ ގުރުއާން މާއްދާ އެސްއެސްސީގައި ރަސްމީކޮށް ހިމަނައި 2027 ވަނަ އަހަރުގެ ސާނަވީ އިމްތިހާނު ދިނުމަށް ނިންމާފައިވާ ކަމަށެވެ.
އާޓިފިޝަލް އިންޓަލިޖެންސް(އޭއައި)ގެ ބޭނުންތެރިކަން މަސައްކަތުގެ މާހައުލުގައި ބޮޑުވެފައިވާއިރު، މިފެށޭ ދިރާސީ އަހަރުވެގެންދާނީ އޭއައިއަށް ސްކޫލުތަކުގެ މުދައްރިސުން އަހުލުވެރި ކުރުވުމުގެ ހާއްސަ ޕްރޮގްރާމްތަކެއް ކުރިއަށް ގެންދާނެ އަހަރަކަށް ކަމަށް ވެސް މިނިސްޓަރު ވިދާޅުވި އެވެ.
ކޮންމެ ދަރިވަރަކީ އަމިއްލަ އުނގެނުމަށް ޒިންމާވާ ދަރިވަރަކަށް ވުމަށް ވެސް މިނިސްޓަރު ވަނީ ނަސޭހަތްތެރިވެވަޑައިގެންފަ އެވެ. އަދި އިސްލާމް ދީނަށް ލޯބިކުރާ، މައިންބަފައިންނަށް ކިޔަމަންތެރިވެ އެކަކު އަނެކަކަށް އިހްތިރާމްކުރާ ކުދިބަޔަކަށް ވުމަށް މިނިސްޓަރު ގޮވާލެއްވި އެވެ. އަދި އުނގެނުމަށް ލިބިފައިވާ ރަނުގެ ފުރުސަތުގެ ބޭނުން އެންމެ ހެޔޮގޮތުގައި ހިފައި މުދައްރިސުން ދެކެ ލޯބިވާ އަދި މުދައްރިސުންނަށް އިހުތިރާމްކުރާ ބަޔަކަށް ވުމަށް ވެސް މިނިސްޓަރު އެދިވަޑައިގަތެވެ.