އާދަޔާހިލާފަށް ތޫނުފިލި ކުދިން ކިޔެވުންމަތިން ފޫހިކޮށްނުލައި، ކުއްޖާގެ ތޫނުފިލިކަމާ އެކަށީގެންވާ ގޮންޖެހުންތައް ކުރިމަތިކުރުވަނިވި އުނގެނުމުގެ ނިޒާމެއްގެ ތެރެއިން ތައުލީމް ހާސިލްކުރަން މަގުފަހިކޮށްދޭން ޖެހޭ ކަމަށް ހައި ކޯޓުން ބުނެފި އެވެ.
ހައި ކޯޓުން އެހެން ބުނީ އެޑިއުކޭޝަން މިނިސްޓްރީން ނެރުނު ސާކިއުލާއަށް އަމަލުކުރުމުގެ ގޮތުން ދަރިވަރަކު ޕްލޭ ސްކޫލުން ބޭބީ ނާސަރީއަށް ޕްރޮމޯޓް ނުކޮށް، ޕްލޭ ސްކޫލް ރިޕީޓްކުރި މައްސަލައިގައި އެ ކުއްޖާގެ މަންމަ ކޮށްފައިވާ ދައުވާއާ ގުޅިގެން އިއްޔެ އިއްވި ހުކުމްގަ އެވެ.
ރާއްޖެއަކީ ދުނިޔޭގެ ނިސްބަތުން ކުޑަ، އިގްތިސާދީ އަދި އެހެނިހެން ގޮތްގޮތުން އެންމެ ކުރިއަރާފައިވާ ގައުމުތަކުގެ ތެރޭގައި ހިމެނޭ ގައުމަކަށް ނުބެލެވުނަސް، މި ކުޑަކުޑަ ދިވެހިރާއްޖޭގައި ވެސް ދުނިޔޭގެ ފެންވަރުގައި ފާހަގަކުރެވޭފަދަ ތޫނުފިލި ގާބިލު ކުދިންނާއި މީހުން ތިބެދާނެކަމީ ގަބޫލުކުރަންޖެހޭ ހަގީގަތެއް ކަމަށް ހުކުމުގައި ބުންޏެވެ.
މިހާރުވެސް ރާއްޖޭގައި އޯލެވެލް އަދި އެ ފެންވަރުގައި ފާހަގަކުރެވޭ ތައުލީމީ ގާބިލު ކުދިން ތިބިކަން ހުކުމްގައި ފާހަގަކުރި އެވެ.
"އޭލެވެލް ނަތީޖާތައް އެކަމަށް ހެކިވެ އެވެ. އެހެންކަމުން، ކުޑަކުދިންގެ ގާބިލުކަން އެންމެމަތީ ދަރަޖަ އަށް ގެންދިޔުމަށް މަސައްކަތް ކުރުމަށް ދައުލަތުގެ މައްޗަށް އޮތް ޒިންމާގެ ތެރެއިން ތައުލީމީ މަރުހަލާއެއް ފުރިހަމަ ނުކުރެވ،ި ރިޕީޓު ކުރަންޖެހޭ ކުދިންނަށް ހާއްސަ އެހީތެރިކަން ދީގެން ދެން އޮތް ތައުލީމުގެ ހަރުފަތަށް ކުއްޖާ ގެންދިއުމަށް ތައުލީމުގެ ނިޒާމުން މަސައްކަތްކުރާ ބީދައިން، ތޫނުފިލި ކުއްޖާ ކިޔެވުން މަތިން ފޫހިކޮށްނުލައ،ި ކުއްޖާގެ ތޫނުފިލިކަމާ އެކަށީގެންވާ ގޮންޖެހުންތައް ކުރިމަތިކުރުވަނިވި އުނގެނުމުގެ ނިޒާމެއްގެ ތެރެއިން ކުއްޖާގެ އެންމެމަތީ ގާބިލުކަމަށް ވާސިލުވުމަށް ސަރުކާރުން މަގުކޮށައިދޭން ޖެހޭނެ ކަމަށް ދެކެމެވެ،" ހުކުމްގައި ބުންޏެވެ.
ހުކުމްގައި ބުނީ ތޫނުފިލި ނުވަތަ ތަބީއީ އުމުރަށް ވުރެ ގާބިލުކަން އިތުރު ކަމަށް ބެލެވޭ ރާއްޖޭގެ ކުދިންނަށް، އެ ކުއްޖެއްގެ އެންމެމަތީ ގާބިލުކަމަށް ވާސިލުވުމަށް މަސައްކަތް ކުރެވޭނެ ނިޒާމެއް ދައުލަތުގެ ފަރާތުން މިނިސްޓްރީ މެދުވެރިކޮށް އެކަށައަޅަން ވާނެ ކަމަށެވެ.
ކުއްޖާގެ މައިންބަފައިން އަމިއްލަ ހައިސިއްޔަތުން ހަދާ ޓެސްޓުތަކަށް އެކަނި ބެލުމުގެ ބަދަލުގައ،ި އާދަޔާ ހިލާފު ގާބިލުކަން ހުރި ކުދިންގެ ތައުލީމީމަގު އެ ކުދިންގެ ގާބިލުކަމުގެ ދުވެއްޔާ އެއްހަމަކުރުމަށްޓަކައ،ި އުމުރަށް ވުރެ ގާބިލުކަން އިތުރު ކުދިންތައް ވަޒަން ކުރާނެ އެއްހަމަ ސިޔާސަތުތަކަކާއި މިންގަނޑުތަކަކާއި އުސޫލުތަކެއް މިނިސްޓްރީން އެކުލަވާލަން ޖެހޭ ކަމަށް ހައި ކޯޓުން ބުންޏެވެ.
މިފަދަ ނިޒާމެއް ގާއިމުކުރުމަށް ދިރާސާކޮށް އިންތިޒާމުތައް ހަމަޖެއްސުމަށް ވަގުތު ނަގާނެ ކަމަށް ބެލެވޭއިރު، ރާއްޖޭގެ ތޫނުފިލި އަދި އާދަޔާ ހިލާފަށް ގާބިލު ކުދިންނަށް އުޖާލާ އަދި އާ މަގެއް ދައުލަތަށްވީ އެންމެ އަވަހަކަށް ކޮށައިދޭން ޖެހޭ ކަމަށް ވެސް ހުކުމްގައި ވެ އެވެ.
"އެއް ކުއްޖަކަށް މުޅި ނިޒާމު ބަދަލު ނުކުރެވުމަކީ ބައެއް ހާލަތުގައި ބަލައިގަންނަންޖެހޭ ހަގީގަތެއް ކަމުގައިވާއިރު ހަމަ އެއާއެކުއެކީގައ،ި އުމުރަށް ވުރެ ތަބީއީ ގޮތުން ތޫނުފިލި އަދި އިތުރު ގާބިލުކަން ލިބިފައިވާ ތަފާތު ކުއްޖަކާއި އެ ކުއްޖާއާ އެއްފަދަ އެހެން ކުދިންނަށް އެ ކުދިންގެ ހައިސިއްޔަތަށް ރިއާޔަތްކޮށް، އެ ކުދިންގެ މަސްލަހަތު ވެސް ކުރިއެރުވޭނެ ނިޒާމެއް މި ރާއްޖޭގައި ވެސް އޮންނަން ވާނެ ކަމަށް ދެކެމެވެ،" ހުކުމްގައި ބުންޏެވެ.
ހުކުމްގައި ބުނީ ރާއްޖޭގެ ތައުލީމުގެ ނިޒާމުގައ،ި ކުއްޖާގެ ހާއްސިއްޔަތަށް ރިއާޔަތްކޮށް އިތުރުއެހީ ބޭނުންވާ ކުދިންނަށް މަދަރުސާ މެދުވެރިކޮށް ހާއްސަ ކުލާސްތައް ހިންގައ،ި ވަކިވަކި ކުދިންނަށް އިތުރު ސަމާލުކަންދީ އިތުރު މުދައްރިސުންނާ އެކު އެ ކުދިން އުނގެނުމަށް ރާއްޖޭގައި މިހާރު ވެސް މަގުފަހިކޮށްދޭ ކަމަށެވެ. އަދި ތައުލީމުގެ އެއްހަރުފަތުން އަނެއްހަރުފަތަށް ބަދަލު ކުރުމުގެ ބަދަލުގައ،ި ގުރޭޑް ރިޕީޓުކުރުމުގެ މަސްލަހަތު ބޮޑު ކުދިންގެ މައިންބަފައިނާ މަޝްވަރާކޮށް ކޮންމެ ކުއްޖެއްގެ ތައުލީމަކީ މައިންބަފައިނާ މަޝްވަރާކުރާ ކަމަށާއި ކޮންމެ ކުއްޖަކަށް ހާއްސަ އުނގެނުމުގެ ތަޖުރިބާއަކަށް ހެދުމަށް ދިވެހި ދައުލަތުން ވެސް މަސައްކަތްކުރާ ކަމަށެވެ.
"ކުދިން އުނގެނުމަށް ހުންނަ ޝައުގުވެރިކަން ދަމަހައްޓައ،ި ކުދިން ފޫހިނުވާ އީޖާދީ ވިސްނުންތަކުގެ މައްޗަށް ބިނާވެފައިވާ ތައުލީމުގެ ނިޒާމެއް ބައްޓަންކުރަން މަސައްކަތް ކުރާ ކަމަށް ވެސް ބެލެވެ އެވެ." ހުކުމްގައިވެ އެވެ.
ކުއްޖާގެ ހެދިބޮޑުވުމުގައި ނަފުސާނީ ގޮންޖެހުންތަކެއް ހުރިނަމަ، އެ ކުދިންގެ ހާއްސއްޔަތަށް ރިޢާޔަތްކޮށް ތައުލީމުގެ ނިޒާމު އެ ކުއްޖަކަށް ހާއްސަވާ ގޮތަށް ދައުލަތާއި އަމިއްލަ ފަރާތްތަކުން ހިންގާ މަދަރުސާތަކުގައި ވެސް ބައްޓަން ކުރުމަށް ރާއްޖޭގައި މަސައްކަތް ކުރެވާ ކަން ވެސް ހައި ކޯޓުގެ ހުކުމްގައި ފާހަގަކޮށްފައިވެ އެވެ.
މި ހުކުމް އިއްވާފައިވަނީ ފަނޑިޔާރު ދީބާނާޒް ފަހުމީ އެވެ. އެ ފަނޑިޔާރުގެ ރައުޔަށް ތާއިދު ކުރެއްވީ ފަނޑިޔާރު ފާތިމަތު ފަރްހީޒާ އަދި ފަނޑިޔާރު މުހައްމަދު ޝަނީޒް އަބްދުﷲ އެވެ.