ގިރާވަރުފަޅުގެ އާ ލޭންޑް ޔޫސް ޕްލޭނެއް ތައްޔާރުކޮށް، އެ ޕްލޭނުގެ ދަށުން ގޯތި ލިބުނު ސަރަހައްދުތައް ބަދަލުވެފައިވާތީ ގޯތީގެ ގުރު ނެގުން އަންނަ ހޮނިހިރު ދުވަހު ބާއްވަން ހައުސިން މިނިސްޓްރީން ނިންމައިފި އެވެ.
މިނިސްޓްރީން ކުރި އިއުލާނެއްގައި ބުނީ ބިންވެރިޔާ ސްކީމުގެ ދަށުން ގިރާވަރުފަޅުން ގޯތި ލިބިފައިވާ ފަރާތްތަކުގެ ގޯތީގެ ސަރަހައްދަށް ބަދަލު އައިސްފައިވުމުން، ގޯތީގެ ގުރު ނެގުން މިމަހުގެ 31 ވާ ހޮނިހިރު ދުވަހު ކުރިއަށް ގެންދަން ނިންމާފައިވާ ކަމަށެވެ.
ޕީއެސްއެމް އިން ލައިވްކޮށްގެން ކުރިއަށް ގެންދާ އެ ގުރު ނެގުން އޮންނާނީ 9:30 ގައި ސޯޝަލް ސެންޓަރުގަ އެވެ.
ގުރު ނަގާނީ އެތަނަށް ހާޒިރުވާ މީހުންގެ ކުރިމަތީގައި މިނިސްޓްރީގެ މުވައްޒަފުންނެވެ.
މިނިސްޓްރީން ބުނި ގޮތުގައި ގުރުއަތުލާ ހޯލަށް ވަދެވޭނީ ބިން ލިބިފައިވާ ފަރާތް ނުވަތަ ފަރާތްތަކުގެ ތެރެއިން ކޮންމެ ޕްލޮޓަކަށް ވެސް އެކަކަށެވެ. އަދި ގުރު ނަގައިގެން ލިބޭ ޕްލޮޓު ހިޔާވަހި ޕޯޓަލް މެދުވެރިކޮށް ވަގުތުން ފެންނާނެ ކަމަށް މިނިސްޓްރީން ބުންޏެވެ. އަދި އެ މީހަކަށް ލިބުނު ޕްލޮޓް ނަމްބަރު އެސްއެމްއެސް މެދުވެރިކޮށް ފޮނުވާނެ އެވެ.
މިނިސްޓްރީން ވަނީ ގިރާވަރުފަޅުން ގޯތި ލިބޭ ފަރާތްތަކުގެ ޕްލޮޓްތައް ތަރުތީބު ކުރެވިފައިވާ ގޮތުގެ ޗާޓު ވެސް މިރޭ އާންމުކޮށްފަ އެވެ.
ގިރާވަރުފަޅުން ދޫކުރަނީ 1،250 އަކަފޫޓުގެ 2،605 ޕްލޮޓާއި 1،650 އަކަފޫޓުގެ 1،213 ޕްލޮޓާއި 2050 އަކަފޫޓުގެ 253 ޕްލޮޓުގެ އިތުރުން 2،450 އަކަފޫޓުގެ އެއް ޕްލޮޓެވެ.
މިނިސްޓްރީން ބުނި ގޮތުގައި ގޯތި ލިބޭ މީހުންގެ ގުރު ނަގައި ނިމުމުން ގޯތި ހަވާލުކުރުމުގެ އެއްބަސްވުމުގައި ސޮއިކުރުމާއި ގޯތީގެ ރަޖިސްޓްރީ ހަވާލުކުރުމުގެ މަސައްކަތް ކުރިއަށްދާނެ ގޮތުގެ މައުލޫމާތު ފަހުން ހިއްސާކުރާނެ އެވެ.