ކުރިއަށް އޮތް ދެ ދުވަހު ރާއްޖޭގެ ސަރަހައްދުގައި ވައި ނުސާފުވުމުގެ މައްސަލަ ބޮޑުވާނެ ކަމަށް ލަފާކުރެވޭތީ އެކަމަށް ރައްކާތެރިކަމުގެ ފިޔަވަޅު އަޅަން އެޗްޕީއޭއިން މިއަދު އެދިއްޖެ އެވެ.
މެޓުގެ ތަފާސްހިސާބުތަކާ ހަވާލާދީ، އެ އިދާރާއިން ސޯޝަލް މީޑިއާގައި ކުރި ޕޯސްޓެއްގައި ބުނީ ރާއްޖޭގެ ސަރަހައްދުތަކަށް، ހާއްސަކޮށް މެދު ރާއްޖެތެރޭގެ އަތޮޅުތަކަށް ދުންފުސް ނުވަތަ ވައި ނުސާފުވުމުގެ އަސަރު ވަރަށް ބޮޑަށް ކުރާ ކަމަށެވެ.
އެ އަސަރު ކުރިއަށް އޮތް ދެ ދުވަހު ވެސް ރާއްޖޭގެ ސަރަހައްދުގައި ހުންނާނެ ކަމަށް ބެލެވޭތީ އެކަމަށް ރައްކާތެރިކަމުގެ ފިޔަވަޅުތައް އެޅުމަށް ހާއްސަ ސަމާލުކަން ދިނުމަށް ވަނީ އެދިފަ އެވެ. އެކަންކަމުގެ ތެރޭގައި؛
- ނޭވާލާ ނިޒާމުގައި މައްސަލަ ހުންނަ މީހުން ބޭރުގައި ކުޅިވަރުތައް ކުޅުން މަޑުޖައްސާލުން.
- ނޭވާލާ ނިޒާމުގައި މައްސަލަ ހުންނަ މީހުން ބޭރަށް ނުކުންނައިރު މާސްކު އެޅުން.
- ނޭވާލާ ނިޒާމުގައި މައްސަލަ ހުންނަ މީހުން ބޭރަށް ނުކުންނައިރު މާސްކު އެޅުން.
- ބޭރުގެ ނުސާފު ވައި ނުވަންނަހެން ގޭގެ ދޮރުތައް ލައްޕާފައި ބެހެއްޓުން.
- އެއާ ޕިއުރިފައިއާ ބޭނުންކުރުން.
ވައި ސާފު މިންވަރު ބަލަން އެންވަޔަރްމަންޓް މިނިސްޓްރީގެ ލިންކުން ނުވަތަ އައިކިއުއެއާ ވިޝުއަލް އެޕް އަޅައިގެން ބެލޭނެ ކަމަށް ބުންޏެވެ.
މޫސުމާ ބެހޭ ގައުމީ އިދާރާއިން މިއަދު ހެނދުނު ނެރުނު ބަޔާނެއްގައި ބުނީ ދުންފުހުގެ އަސަރު ރާއްޖޭގެ ހުރިހާ ސަރަހައްދަކަށް ނުރައްކާތެރި މިންވަރަކަށް މިއަދު މަތިވެފައިވާ ކަމަށެވެ. މިއީ، މިދިޔަ ހަފުތާއެއްހާ ދުވަހުގެ ތެރޭގައި އެންމެ ބޮޑަށް ވައި ނުސާފުވި ދުވަސް ކަމަށް ވެސް އެ އޮފީހުން ބުންޏެވެ.
މެޓް އޮފީހުން ބުނީ ވައި ނުސާފުވެ، ދުރު ފެންނަ މިންވަރު ދެ ކިލޯމީޓަރަށް ވުރެ ވެސް ދަށްވެފައިވާ ކަމަށެވެ.
"ކުރިއަށް އޮތް ދެ ދުވަހު ވެސް އިރުއުތުރުން އަންނަ ވަޔާއެކު، ދުންފުހުގެ އަސަރު ރާއްޖެ މަތީގައި ހުންނާނެ ކަމަށް ބެލެވޭ،" މެޓް އޮފީހުން ބުންޏެވެ.
މިހާރު އާންމުކޮށް ކޮންމެ އަހަރަކު ވެސް، އިރުވައި މޫސުމުގައި ރާއްޖެ އަށް ޖައްވު ތަޣައްޔަރުވުމުގެ ސަބަބުން ފުސްކަމުގެ އަސަރު ކުރެ އެވެ. ރާއްޖެ އަށް މިކަން ދިމާވަނީ އުތުރު އިންޑިއާގެ ސަރަހައްދުތަކުގައި އަންނަ ނުސާފު ވައިގެ ސަބަބުންނެވެ.
އެ ސަރަހައްދުތަކުން އަންނަ މި ތަޣައްޔަރު ވައިގައި އެކުލެވިގެން ވަނީ ހިރަފުހާއި ކާރުހާނާތަކުން އަރާ ދުމެވެ. ދުން ގިނަވެ، ފުސްވުމުގެ ސަބަބުން ލޮލަށް ފެންނަ ދުރުމިން ދަށްވުމުން ދަތުރުފަތުރު ކުރުމަށް ވެސް އުނދަގޫވެ އެވެ. އަދި ސިއްހީ އެކި މައްސަލަތައް ވެސް ކުރިމަތިވެ އެވެ.