ބ. ގޮއިދޫގައި ކެންސަރު ގިނަވާ ސަބަބު ދެނެގަންނަން އެމްއެފްޑީއޭއާއެކު މަސައްކަތް ފަށައިފި އެވެ.
އެގްރިކަލްޗާ މިނިސްޓްރީން މިއަދު ބޭއްވި ނިއުސް ކޮންފަރެންސްގައި، ނޫސްވެރިއެއްގެ ސުވާލަކާ ގުޅިގެން މިނިސްޓަރު މަރިޔަމް މާރިޔާ ވިދާޅުވީ އެމްއެފްޑީއޭއިން ޓެސްޓުކޮށް، އެކަން ދިމާވާ ސަބަބުތައް ބަލަމުން އަންނަ ކަމަށެވެ.
ފުޅާދާއިރާއެއްގައި ދަނޑުވެރިކަން ކުރާ ގޮއިދޫގައި ކެންސަރު ގިނަވާ ކަމުގެ ކަންބޮޑުވުންތައް ފުރަތަމަ ހިއްސާކުރީ، މިދިޔަ އަހަރުގެ ޑިސެމްބަރު މަހުގެ ތެރޭގައި ޝަހުލާ ވަޖީހު ނަމަކަށް ކިޔާ މީހެކެވެ.
ފޭސްބުކްގައި އޭނާ އާއްމުކުރި ސިޓީގައި ބުނީ ގާތްގަނޑަކަށް 500 މީހުން އުޅޭ ގޮއިދޫގައި ގައިން ގަޔަށް ނާރާ ބަލިތައް ވަރަށް ބޮޑަށް އިތުރުވަމުންދާ ކަމަށެވެ. އޭގެ ތެރެއިން ވެސް ކެންސަރު ޖެހޭ މިންވަރު އިތުރުވެފައިވާ ކަމަށް އޭނާ ބުންޏެވެ.
ޝަހުލާ ބުނީ މިދިޔަ ފަސް އަހަރު ތެރޭގައި ގޮއިދޫއިން ނުވަ މީހަކަށް ކެންސަރު ޖެހި އަދި ތިން މީހަކު މަރުވެފައިވާ ކަމަށެވެ.
އެ ރަށުގެ ދަނޑުތަކުގެ 95 ޕަސެންޓު ބިދޭސީންގެ އަތްމައްޗަށް ދޫކޮށްލާފައިވާ ކަމަށާއި އަދި ގިނަ ދަނޑުތަކުގައި ހައްދާ ތަކެއްޗަށް އިންސާނުންގެ ފުރާނައަށް ނުރައްކާ މިންވަރަށް "ޕެސްޓިސައިޑްސް" އަދި އެ ނޫން ވެސް ކެމިކަލް އަޅައި ތަޣައްޔަރުކޮށްފައިވާ ކަމަށް ޝަހުލާ ބުންޏެވެ.
މިނިސްޓަރު މާރިޔާ ވިދާޅުވީ، ޕެސްޓިސައިޑު ބޭނުންކުރުމާ ގުޅޭ ގާނޫނެއް ހަދާފައި އޮތަސް އޭގެ ދަށުން ހަދަންޖެހޭ ޕޮލިސީތައް ނުހަދާ ހުރުމުން އެ މަސައްކަތް ފެށީ މިދިޔަ މަހު ކަމަށެވެ.
"އިރާދަކުރެއްވިއްޔާ ވަރަށް އަވަހަށް މި ޕޮލިސީތައް ތަންފީޒުވެގެންދާނެ ކަމަށް އަޅުގަނޑުމެން މި އުއްމީދު ކުރަނީ،" މިނިސްޓަރު ވިދާޅުވި އެވެ.