ސޯޝަލްމީޑިއާ ޕްލެޓްފޯމު ޓިކްޓޮކްގައި އިސްލާމްދީނަށް ފުރައްސާރަކުރާ މީހަކު ހޯދަން ފުލުހުން ވަނަވަރު އާއްމުކޮށްފި އެވެ.
އެ މައްސަލާގައި ހޯދަން އިއުލާނު ކުރީ ނ. ކުޑަފަރި، ހިޔަލީގެ، ހުސައިން ޔޫސުފް 44، އެވެ.
ފުލުހުން ބުނީ އޭނާ ހޯދަނީ އިސްލާމްދީނަށް ތައުހީނުކޮށް ފުރައްސާރަކުރުމާއި، ދިވެހި ރައްޔިތުންގެ އެއްބައިވަންތަކަން ނަގާލަން މަސައްކަތްކުރުމުން ކަމަށެވެ.
އަދި މީހުންގެ މެދުގައި ދީނީ ގޮތުން ބައިބައިވުން އުފެދޭ ބާވަތުގެ ވާހަަކަ އާއި އިސްލާމްދީނުގެ އަސްލުތަކާ ގުޅޭ ގޮތުން ދޮގު މައުލޫމާތު، ޓިކްޓޮކް މެދުވެރިކޮށް ފެތުރިކަމަށް ތުހުމަތު ކުރެވޭ ކަމަށް ވެސް ފުލުހުން ބުންޏެވެ.
އޭނާ ހޯދަނީ ފުލުހުން ތަހުގީގު ކުރަމުން އަންނަ މައްސަލައެއްގެ ތަހުގީގަށް ހާޒިރުކުރަން ބޭނުންވެ، އުޅޭ ވަކި ތަނެއް ނޭނގުމުގެ ސަބަބުން، ތަހުގީގަށް ހާޒިރުވާން ޗިޓު ރައްދު ނުކުރެވޭތީ ކަމަށް ވެސް ފުލުހުން ބުންޏެވެ.
އެނގިފައިވާ ގޮތުގައި ހުސައިން ޔޫސުފަކީ ސްވިޓްޒަލެންޑްގެ ކެންޓަން ތުރުގައުގެ އަވަށެއް ކަމަށްވާ ރޮމަންސްހޯންގައި، އެ ގައުމުގެ މީހަކާ ކައިވެނިކޮށް ރަށްވެހިކަން ވެސް ހޯދައިގެން އެތަނުގައި ދިރިއުޅޭ މީހެކެވެ.
ފުލުހުން ވަނީ މި މަހުގެ 18 ވަނަ ދުވަހުގެ މެންދުރު 12:00 އަށް ސާޖަންޓް އާދަމް ހަލީމް ކުރިމިނަލް އިންވެސްޓިގޭޝަން ބިލްޑިންގަށް އޭނާ ހާޒިރުވާން އަންގައި އިއުލާނުކޮށްފަ އެވެ.
ސޯޝަލް މީޑިއާގައި އޭނާ ދައްކާފައި ހުރި ވާހަކަތަކުގެ ތެރޭގައި އޭނާއަށް ވަހީ އަންނަ ކަމަށާއި އިސްލާމީ އަގީދާ އަދި ކީރިތި މާތް ނަބިއްޔާއަށް ތައުހީނުވާ ގޮތަށް ވާހަކަދައްކާފައިވެ އެވެ. އަދި އިސްލާމްދީނަށް ހަޖޫޖަހައި، ދީނާ ގުޅޭގޮތުން ތަފާތު ވާހަކަތައް ދައްކާފައިވެ އެވެ.
އެ ޕްލެޓްފޯމުގައި އޭނާ ވަނީ މާތްﷲ އޭނާއަށް ވަހީ ބާވާލައްވާފައިވާ ކަމަށާއި ވަހީ ބާއްވާލައްވަނީ ކީރިތި ރަސޫލާއަށް އެކަނި ނޫން ކަމަށް ބުނެ، ދީނަށް ފުރައްސާރަކޮށްފަ އެވެ. މި ނޫން ވެސް ދީނަށް ފުރައްސާރަކޮށް ގިނަ ވާހަކަތަކެއް އޭނާ ދައްކާފައިވެ އެވެ.
އޭގެ އިތުރުން އޭނާ ވަނީ އެއީ ޔޫސުފްގެފާނު ކަމަށް އަމިއްލައަށް ދައުވާކޮށްފަ އެވެ.