އަނބިމީހާ/ ފިރިމީހާގެ ބޯހިޔާވަހިކަމެއް އޮތް ނަމަވެސް ގޯއްޗަށް އެދި ހުށަހެޅޭ ގޮތަށް އެކުލަވާލާފައިވާ އުސޫލުގެ ދަށުން "ގޯތިގެދޮރު" ޕްރޮގްރާމުގައި ގޯއްޗަށް އެދި ފޯމު ހުށަޅަން މިއަދު ހުޅުވާލައިފި އެވެ.
ހައުސިން މިނިސްޓްރީން ބުނީ އެ ޕްރޮގްރާމުގެ ދަށުން އެޕްލިކޭޝަން ހުށަހެޅުމުގެ ފުރުސަތު މިއަދުން ފެށިގެން އަންނަ އޭޕްރީލް 30 ވާ ބުރާސްފަތި ދުވަހުގެ ރޭގަނޑު 11:59 އަށް ހުޅުވާލާފައިވާ ކަމަށެވެ. ގޯއްޗަށް އެދި ކުރިމަތިލާން ޖެހެނީ ބޯހިޔާވަހިކަން ޕޯޓަލު މެދުވެރިކޮށެވެ.
މިނިސްޓްރީން ބުނި ގޮތުގައި އެ އުސޫލުގެ ދަށުން ދޫކުރާނީ ރަސްމާލެއިން 1،250 އަކަފޫޓުގެ ގޯއްޗެވެ. "ގޯތިގެދޮރު" ޕްރޮގްރާމްގައި ދެ ކެޓަގަރީއެއް ވަނީ ހިމަނައިފަ އެވެ. ކެޓަގަރީ އެކެއްގައި ހިމެނެނީ މާލޭ ރަށްވެހިންނެވެ. ދެވަނަ ކެޓަގަރީ ހާއްސަ ކޮށްފައި ވަނީ މާލޭގައި ދިރިއުޅޭ އެހެން ރަށްރަށުގެ ރަށްވެހިންނަށެވެ.
އެކަމަށް އެދޭއިރު ހުށަހަޅަންޖެހޭ ލިޔުންތަކުގެ ތެރޭގައި ހިމެނެނީ އަމިއްލަ ނަމުގައި ރަޖިސްޓަރީ ކޮށްފައިވާ ފުލެޓެއް/ ބިމެއް ނަމަ، ރަޖިސްޓަރީ އާއި މާލޭ ރަށްވެއްސެއް ނަމަ މާލޭގައި ރަޖިސްޓަރީވެފައިވާ ތާރީހު އެނގޭ ގޮތަށް ދައުލަތުގެ އިދާރާއަކުން ދޫކޮށްފައިވާ ލިޔުމެވެ. އަދި މާލޭގައި އުޅުނުކަން ސާބިތުކުރުމަށް ޕެންޝަން ސްކީމަށް ހިއްސާކުރާ ވަޒީފާދޭ އަމިއްލަ ފަރާތަކުން ދޫކޮށްފައިވާ ރަސްމީ ވަޒީފާގެ ލިޔުން ނުވަތަ ސަރުކާރުގެ އިދާރާއަކުން ދޫކޮށްފައިވާ ވަޒީފާގެ ލިޔުން ހުށަހެޅިދާނެ އެވެ. އަދި އެ މުއްދަތު ސާބިތުކުރުމަށް ތައުލީމީ މަރުކަޒުތަކުން ދޫކޮށްފައިވާ ލިޔުން ވެސް ހުށަހެޅިދާނެ ކަމަށް އިއުލާނުގައިވެ އެވެ.
އެކަމާ ގުޅޭ އިތުރު މައުލޫމާތު މިނިސްޓްރީގެ ހޮޓްލައިން ނަމްބަރުތަކަށް ގުޅައިގެން ލިބޭނެ ކަމަށް ބުންޏެެވެ.
އެ ޕްރޮގްރާމުގެ އިތުރުން "ބިންވެރިޔާ" ހާއްސަ ސްކީމަކަށް ވެސް ހުޅުވާލާނެ އެވެ. އެއީ ކުރީގެ ސަރުކާރުން ކުރިއަށް ގެންދިޔަ ބިންވެރިޔާ ސްކީމަށް ޖޮއިންޓް އެޕްލިކޭޝަން ހުށަހަޅައިގެން ގޯތި ލިބުނު އެންމެން އެ ގޯތި ދޫކޮށްލަން އެއްބަސްވާ ނަމަ، އެ މީހުންނަށް ވަކިވަކިން ގޯތި ދޫކުރަން ހިންގާ ޕްރޮގްރާމެކެވެ.
ބޯހިޔާވަހިކަމުގެ އާ ޕްރޮގްރާމްތަކަކީ މި އަހަރުގެ ރިޔާސީ ބަޔާން އިއްވަވަމުން ރައީސް ޑރ. މުހައްމަދު މުއިއްޒު އިއުލާން ކުރެއްވި ޕްރޮގްރާމްތަކެކެވެ.
ސަރުކާރުން މިދިޔަ ޖެނުއަރީ މަހު ހުޅުވާލި ފްލެޓާއި ގޯތި ޕްރޮގްރާމުތަކުގައި އަނބިމީހާ ނުވަތަ ފިރިމީހާ އަށް މާލެ ސަރަހައްދުން ބޯހިޔާވަހިކަމެއް ލިބިފައިވާ ނަމަ، ކުރިމަތިނުލެވެ އެވެ. އެހެންވެ، ރައީސް ވަނީ ވަކި ޕްރޮގްރާމެއްގެ ގޮތުގައި އަނބިމީހާ ނުވަތަ ފިރިމީހާގެ ނަމުގައި މާލެ ސަރަހައްދުން ބޯހިޔާވަހިކަމެއް އޮތަސް ކުރިމަތިލެވޭނެ ގޮތަށް ޕްރޮގްރާމެއް ހުޅުވާލާނެ ކަމަށް އިއުލާނުކުރައްވައިފަ އެވެ.
މީގެ ކޮންމެ ޕްރޮގްރާމެއްގެ ދަށުން 1،000 ގޯތި ދޫކުރާނެ ކަމަށް ރައީސް މުއިއްޒު ވިދާޅުވެފައިވެ އެވެ.
"ބިންވެރިޔާ" ހާއްސަ ސްކީމްގެ ޕްރޮގްރާމް އެޕްލިކޭޝަން ހުށަހަޅަން ހުޅުވާލާނީ މި މަހު 24 އިން ފެށިގެން އަންނަ މަހުގެ 30 ވަނަ ދުވަހުގެ ނިޔަލަށް ކަމަށް، ހައުސިން މިނިސްޓްރީން ކުރިން ބުނެފައިވެ އެވެ.