ސަރުކާރުގެ ބޯހިޔާވަހިކަމުގެ މަޝްރޫއުގެ ދަށުން ހުޅުވާލާ ބޯހިޔާވަހިކަމުގެ އާ ދެ ޕްރޮގްރާމް ދަށުން ގޯތި ދޭ އުސޫލު މިއަދު އާންމުކޮށްފި އެވެ.
ގެޒެޓުގައި މިއަދު އާންމުކޮށްފައިވާ އެ ދެ ޕްރޮގްރާމަކީ "ބިންވެރިޔާ" ހާއްސަ ސްކީމާއި "ގޯތި-ގެދޮރު" ޕްރޮގްރާމުގެ ދަށުން، މާލޭގައި ދިރިއުޅޭ މީހުންނަށް ދިރިއުޅުމަށް ބަންޑާރަ ގޯތި ދޫކުރާ ސްކީމެވެ.
ބޯހިޔާވަހިކަމުގެ އާ ޕްރޮގްރާމްތަކަކީ މި އަހަރުގެ ރިޔާސީ ބަޔާން އިއްވަވަމުން ރައީސް ޑރ. މުހައްމަދު މުއިއްޒު އިއުލާން ކުރެއްވި ޕްރޮގްރާމްތަކެކެވެ.
ސަރުކާރުން މިދިޔަ ޖެނުއަރީ މަހު ހުޅުވާލި ފްލެޓާއި ގޯތި ޕްރޮގްރާމުތަކުގައި އަނބިމީހާ ނުވަތަ ފިރިމީހާއަށް މާލެ ސަރަހައްދުން ބޯހިޔާވަހިކަމެއް ލިބިފައިވާނަމަ، ކުރިމަތިނުލެވެ އެވެ. އެހެންވެ، ރައީސް ވަނީ ވަކި ޕްރޮގްރާމެއްގެ ގޮތުގައި އަނބިމީހާ ނުވަތަ ފިރިމީހާގެ ނަމުގައި މާލެ ސަރަހައްދުން ބޯހިޔާވަހިކަމެއް އޮތަސް ކުރިމަތިލެވޭނެ ގޮތަށް ވަރަށް އަވަހަށް ހުޅުވާލާނެކަން އިއުލާން ކުރައްވައިފަ އެވެ.
އެހެންވެ، އެފަދަ މީހުންނަށް "ގޯތި-ގެދޮރު" ޕްރޮގްރާމުގެ އުސޫލުގެ ދަށުން ގޯއްޗަށް ދެން ކުރިމަތިލެވޭނެ އެވެ.
"ބިންވެރިޔާ" ހާއްސަ ސްކީމަކީ ކުރީގެ ސަރުކާރުން ކުރިއަށް ގެންދިޔަ ބިންވެރިޔާ ސްކީމަށް ޖޮއިންޓް އެޕްލިކޭޝަން ހުށަހަޅައިގެން ގޯތި ލިބުނު އެންމެން އެ ގޯތި ދޫކޮށްލަން އެއްބަސްވާނަމަ، އެމީހުންނަށް ވަކިވަކިން ގޯތި ދޫކުރާ އުސޫލެކެވެ. އަދި ކުރީގެ ސްކީމަކުން ފްލެޓެއް ލިބިފައި އޮވެގެން ބިންވެރިޔާ ސްކީމަށް ކުރިމަތި ނުލެވުނު މީހުންނަށް ވެސް އާ ޕްރޮގްރާމްގެ ދަށުން ގޯއްޗަށް ކުރިމަތިލެވޭނެ ކަމަށް އުސޫލުގައިވެ އެވެ.
މީގެ ކޮންމެ ޕްރޮގްރާމެއްގެ ދަށުން 1،000 ގޯތި ދޫކުރާނެ ކަމަށް ރައީސް މުއިއްޒު ވިދާޅުވެފައިވެ އެވެ.
ރައީސް ވިދާޅުވެފައިވާ ގޮތުގައި، ކޮންމެ ރައްޔިތަކީ ބޯހިޔާވަހިކަން ކަށަވަރުވެފައިވާ މީހަކަށް ހެދުމަށް "ބޯހިޔާވަހިކަން އެންމެންނަށް" ސިޔާސަތުގެ ދަށުން މިހާރު ފަށާފައި ވަނީ "އާއިލީ ބޯހިޔާވަހިކަން"ގެ ފުރަތަމަ ފިޔަވަހި ކަމަށެވެ.
ފުރަތަމަ ފިޔަވަހީގައި މާލޭގައި ދިރިއުޅޭ މީހުންނަށް މާލެ ސަރަހައްދާއި ރަސްމާލެއިން 15،000 ގޯތި އަދި ހުޅުމާލެ އާއި ވިލިމާލެއިން ތިން ކޮޓަރީގެ 7،900 ފްލެޓަށް ކުރިމަތިލާން އަންނަ މަހުގެ 30 ވަނަ ދުވަހުގެ ނިޔަލަށް ވަނީ ހުޅުވާލައިފަ އެވެ.
ހައުސިން މިނިސްޓްރީން މިއަދު ކުރި އިއުލާނެއްގައި ބުނީ "ގޯތި-ގެދޮރު" ޕްރޮގްރާމަށް އެޕްލިކޭޝަން ހުށަހެޅޭނީ އަންނަ އާދިއްތަ ދުވަހުން ފެށިގެން އަންނަ މަހުގެ 30 ވަނަ ދުވަހުގެ ނިޔަލަށް ކަމަށެވެ. އަދި "ބިންވެރިޔާ" ހާއްސަ ސްކީމްގެ ޕްރޮގްރާމް އެޕްލިކޭޝަން ހުށަހެޅޭނީ މި މަހު 24 އިން ފެށިގެން އަންނަ މަހުގެ 30 ވަނަ ދުވަހުގެ ނިޔަލަށް ކަމަށް، ހައުސިން މިނިސްޓްރީގެ އިތުރު އިއުލާނެއްގައި ބުންޏެވެ.
މި ދެ ޕްރޮގްރާމަށް ވެސް ފޯމު ހުށަހަޅަން ޖެހޭނީ ބޯހިޔާވަހިކަން ޕޯޓަލް މެދުވެރިކޮށެވެ.