ދިގުރަށު އަލިފާނުގެ ހާދިސާއަށް މަހެއް، ތަހުގީގު ކުރިތޯ ބަލަން މަޖިލީހަށް

އދ. ދިގުރަށުގައި ބިދޭސީން ތިބި އެކޮމަޑޭޝަން ބްލޮކެއްގައި ހިނގި އަލިފާނުގެ ހާދިސާއަށް މަހެއްހާ ދުވަސްވީއިރު، ކަމާބެހޭ އިދާރާތަކުން މައްސަލަ ތަހުގީގު ކުރިތޯ ބެލުމަށް ރައްޔިތުންގެ މަޖިލީހުގައި މިއަދު އެދިއްޖެ އެވެ. 

މިދިޔަ މަހުގެ 12 ވަނަ ދުވަހު ރޭ ދަންވަރު 2:00 ހާއިރު ދިގުރަށުގައި ބިދޭސީންތަކެއްގައި ދިރިއުޅެމުން ދިޔަ އެކޮމަޑޭޝަން ބްލޮކްގައި ރޯވެ، އަަށް މީހަކު ފިހި، އޭގެ ތެރެއިން ފަސް މީހުން މަރުވިއިރު ދެ މީހަކު އިތުރު ފަރުވާއަށް މާލެ ގެނަ އެވެ. އަދި ތިން ވަނަ މީހާއަށް އެ ރަށުގައި ފަރުވާ ދިނުމަށް ފަހު ވަނީ ދޫކޮށްލައިފަ އެވެ.

ގަލޮޅު އުތުރު ދާއިރާގެ އެމްޑީޕީ މެމްބަރު މުހައްމަދު އިބްރާހީމް (ކުޑޫ) ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުالله އަށް ފޮނުއްވި ސިޓީގައި އެދިވަޑައިގެންފައިވަނީ އެ ބިދޭސީންތައް މަރުވި މައްސަލައިގެ މައުލޫމާތުތައް މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީ މެދުވެރިކޮށް ސާފުކޮށްދެއްވުމަށެވެ.

ދިގުރަށުގެ އެކޮމަޑޭޝަން ބްލޮކެއްގެ ގޮތުގައި ބޭނުންކުރާ ގޭގައި ރޯވީ ގޭސް ލީކުވުމުގެ ސަބަބުންނެވެ. ނަމަވެސް އެ ހާދިސާ ހިނގި ގޮތާ ބެހޭގޮތުން ރަސްމީ މައުލޫމާތެއް އަދި ހާމަކޮށްފައެއް ނުވެ އެވެ. 

އެ ރަށުން ވާހަކަ ދެއްކި މީހަކު ބުނީ އަލިފާން ރޯވީ ދެ މީހަކު ދަންވަރު ކައްކަން އުޅެނިކޮށް ކަމަށާއި އެ ވަގުތު އެހެން ބިދޭސީން ތިބީ ނިދާފައި ކަމަށެވެ. އެނގިފައިވާ ގޮތުގައި އެ ތަނުގައި 30 ބިދޭސީން އުޅެ އެވެ.

ރޯވި ރޭގެ ވީޑިއޯތައް ސޯޝަލް މީޑިއާގައި ވެސް އާންމުވިއިރު، އެ ވީޑިއޯތަކުން ފެންނަނީ އެ ގޭގެ ފަހަތުން ފާރު ތަޅާލައިގެން މީހުން ސަލާމަތް ކުރުމުގެ މަސައްކަތް ކުރާ ތަނެވެ. އަދި މަރުވި މީހުންގެ ހަށިގަނޑުތައް ވެސް ނެރޭތަން ފެނެ އެވެ.