ސައުދީ އަރަބިއްޔާގައި ބާއްވާ "ކިންގް އަބްދުލްއަޒީޒް އިންޓަނޭޝަނަލް ކޮމްޕެޓިޝަން ފޯ ދަ މެމޮރައިޒޭޝަން، ރެސިޓޭޝަން އެންޑް އިންޓަޕްރިޓޭޝަން އޮފް ދަ ހޮލީ ގުރްއާން" މުބާރާތުގައި ރާއްޖެ ތަމްސީލު ކުރާނެ ބައިވެރިއެއް ހޯދަން ގައުމީ ގުރުއާނާ ބެހޭ މަރުކަޒުން އިއުލާންކޮށްފި އެވެ.
މައްކާގައި ބާއްވާ މި މުބާރާތުގެ 46 ވަނަ ބުރުގައި ބައިވެރިވުމުގެ ދައުވަތު ރާއްޖެއަށް ލިބިފައިވާއިރު، ހިތުން ކިޔުމުގެ ބަޔާއި ބަލައިގެން ކިޔުމުގެ ބައިން ކޮންމެ ބަޔަކުން އަންހެން އަދި ފިރިހެން ބައިވެރިއެކު ނަގާނެ އެވެ.
މުބާރާތުގައި ބައިވެރިވުމުގެ ޝަރުތަކުގެ ތެރޭގައި:
- ދިވެހި ރައްޔިތަކަށްވުން
- އުމުރުން 25 އަހަރު ނުވުން
- މީގެ ކުރިން އެ މުބާރާތުގައި ބައިވެރިވެފައިވާ މީހަކަށް ނުވުން
މުބާރާތުގައި ބައިވެރިވެވޭ ކެޓަގަރީތައް:
- މުޅި ގުރުއާން ހިތުދަސްކުރުމުގެ ބައި: ތަޖުވީދުގެ ހަމަތަކާ އެކު މުޅި ގުރުއާން އެއްކޮށް ހިތުން ކިޔަވަން އެނގޭ، ހިފްޒުކުރުމުގެ ސަނަދު އޮތް މީހަކަށް ވާން ޖެހޭ.
- ވިދިވިދިގެން 15 ފޮތް ހިތުދަސްކުރުމުގެ ބައި: ގުރުއާނުގެ ވިދިވިދިގެންވާ 15 ފޮތް ތަރުތީބުން، ތަޖުވީދުގެ ހުކުމްތަކާ އެކު ހިތުން ކިޔަވަން އެނގޭ މީހަކަށް ވާން ޖެހޭނެ.
ގުރުއާނާ ބެހޭ ގައުމީ މަރުކަޒުން ބުނި ގޮތުގައި، ރާއްޖެ ތަމްސީލުކުރާނެ ބައިވެރިން ހޮވާނީ ކުރިމަތިލާ މީހުންގެ މެދުގައި ބާއްވާ ހާއްސަ އިމްތިހާނަކަށް ފަހު އެވެ.
ހާއްސަ އެހީއަށް ބޭނުންވާ މީހެއް ނުވަތަ 17 އަހަރުން ދަށުގެ ކުއްޖަކު ހޮވިއްޖެ ނަމަ، އެ މީހެއްގެ ބެލެނިވެރިއަކު ދިއުމުގެ އިންތިޒާމު މުބާރާތް އިންތިޒާމުކުރާ ފަރާތުން ހަމަޖައްސައިދޭނެ ކަމަށް ވެސް ބުންޏެވެ.
އެ މުބާރާތަށް ކުރިމަތިލުމަށް ފޯމު ހުށަހަޅަންޖެހޭ އެންމެ ފަހު ތާރީހަކީ އަންނަ މަހުގެ ތިން ވަނަ ދުވަހެވެ.