ފަސާދައިން ސަލާމަތްވެފައިވާ ނަޒާހަތްތެރި ދައުލަތެއް ބިނާކުރަން "މަހޯލި" އަކީ ވަރަށް މުހިއްމު ހައްގަކަށް ވިއަސް އެކަމަށް ބައެއް މުއައްސަސާތަކުން ދޭ ސަމާލުކަން އަދިވެސް ވަރަށް ކުޑަ ކަމަށް އިންފޮމޭޝަން ކޮމިޝަނަރުގެ އޮފީހުން މިއަދު ބުނެފި އެވެ.
މައުލޫމާތު ހޯދައި ލިބިގަތުމުގެ ހައްގުގެ ބައިނަލްއަގުވާމީ ދުވަހުގެ މުނާސަބަތުގައި ނެރުނު ބަޔާނުގައި އިންފޮމޭޝަން ކޮމިޝަނަރު އަބްދުލް އަޒީޒް ޖަމާލް އަބޫބަކުރު ވިދާޅުވީ އެ ހައްގަށް އިދާރާތަކުގެ ސަމާލުކަން ކުޑަވަނީ އެ ތަންތަނަށް ކުރިމަތިވެފައިވާ ދަތިތަކުން ދިމާވާ ކަމަކުން ވެދާނެ ކަމަށެވެ.
އެހެންވެ، އެކަމަށް ބޭރުގެ އެހީ ހޯދައިގެން މަސައްކަތް ކުރެވޭތޯ ބަލަމުން އަންނަ ކަމަށް ވިދާޅުވި އެވެ.
"....މި ފަދަ ދަތިތައް ހައްލުކުރުމުގައި އެހީތެރިވެވޭނެ ފަދަ އިންތިޒާމް ހަމަޖެއްސޭތޯ އދ. ގެ ތަރައްގީއާ ބެހޭ ޕްރޮގްރާމާ ގުޅިގެން މަސައްކަތްތަކެއް ކުރެވެމުން އަންނަކަން ވެސް މި ފުރުސަތުގައި ފާހަގަކުރަމެވެ،" ބަޔާނުގައިވެ އެވެ.
އަޒީޒް ވިދާޅުވީ ކޮންމެ ބޭނުމަކު އާއްމުން ހުށަހެޅިއަސް މުއައްސަސާތަކުގައި ހުންނަ މައުލޫމާތެއް ހާމަކުރުމުން އެ ތަނަކަށް ލިބޭނެ އެއްވެސް ގެއްލުމެއް ނޯންނާނެ ކަމަށެވެ.
އޭގެ ބަދަލުގައި އެ އިދާރާއަކަށް ލިބޭނީ ތައުރީފާއި މަގުބޫލުކަން ކަން އޭނާ ފާހަގަކުރި އެވެ.
"މިކަން ހުރިހާ މުއައްސަސާތަކުން ގަބޫލުކުރާނެ ދުވަހަކަށް އިންފޮމޭޝަން ކޮމިޝަނަރުގެ އޮފީހުން އުއްމީދުކުރެ އެވެ،" ބަޔާނުގައިވެ އެވެ.
އަޒީޒް ވިދާޅުވި ގޮތުގައި ފަސޭހައިން މައުލޫމާތަށް އެދެވޭނެ ޕޯޓަލާއެކު ދައުލަތުގެ ކަންކަން ސާފުކުރަން އެދޭ މިންވަރު އެއް އަހަރުން އަނެއް އަހަރަށް އަންނަނީ އިތުރުވަމުންނެވެ.
މައުލޫމާތު ހޯދުމަށް އެދި އިންފޮމޭޝަން ކޮމިޝަނަރުގެ އޮފީހަށް ފޮނުވުމަކީ ކާމިޔާބީއެއް ނޫން ކަމަށާއި ފަސޭހަވާނީ އަމިއްލައަށް މައުލޫމާތު ހިއްސާކުރުމުން ކަމަށް ވާތީ އެކަމަށް ސަމާލުކަން ދިނުމަށް އެ އިދާރާއިން ވަނީ އެދިފަ އެވެ.
މި އަހަރުގެ މިހާތަނަށް 745 ރިކުއެސްޓު ފޮނުވިއިރު އޭގެ ތެރެއިން 260 ރިކުއެސްޓު ވަނީ ނިންމައިފަ އެވެ.
ވަރަށް މަދު މުވައްޒަފުންނާއެކު މަސައްކަތްކުރާ އެ އޮފީހަށް ދުވާލަކު އެވްރެޖުކޮށް ހަތަރު ރިކުއެސްޓު ލިބޭ ކަމަށް ވެސް ބަޔާނުގައިވެ އެވެ.
ހުށަހަޅާ ރިކުއެސްޓުތައް ގިނަވުމަކީ ކާމިޔާބީއެއް ނޫން ކަމަށާއި އެ ދާއިރާގައި ކުރިއެރުމަކީ އަމިއްލަ އިސްނެގުމަށް ދައުލަތުގެ އިދާރާތަކުން މައުލޫމާތު އާއްމުކުރުމުން، އެ މައުލޫމާތުތައް ހޯދަން އިދާރާތަކުގައި އެދެންޖެހޭ މިންވަރު މަދުވުން ކަމަށް ފާހަގަކޮށްފައިވެ އެވެ.
"އޭރުން ރައްޔިތުންނަށާއި ދައުލަތުގެ އިދާރާތަކަށް ވެސް ވަރަށް ބޮޑު ލުއިފަސޭހައަކަށް ވާނެ އެވެ. އެހެންކަމުން މި ނުކުތާއަށް ސަމާލުކަން ދެއްވުމަކީ ދައުލަތުގެ ހުރިހާ އިދާރާއަކަށް ނުހަނު އިހުލާސްތެރިކަމާއެކު ކުރާ އިލްތިމާސެކެވެ،"
އެ އޮފީހުން އިންފޮމޭޝަން ކޮމިޝަނަރުންގެ ބައިނަލްއަގުވާމީ ކޮންފަރެންސްގައި 2022 ވަނަ އަހަރުން ފެށިގެން ބައިވެރިވަމުން އަންނަ ކަމަށާއި މައުލޫމާތު ހޯދައި ލިބިގަތުމުގެ ހައްގުގެ ދާއިރާގައި ރާއްޖެ ހާސިލްކުރަމުން އަންނަ ކާމިޔާބީއަށް ދުނިޔޭގެ ގައުމުތަކުން ތައުރީފު ލިބޭ ކަމަށް ވެސް ބަޔާނުގައި ވެ އެވެ.
މައުލޫމާތު ހޯދައި ލިބިގަތުމުގެ ހައްގަކީ ހަމައެކަނި ގާނޫނު އަސާސީގައި ލިޔެވިފައި އޮންނަންޖެހގޭ އުސޫލެއް ނޫން ކަމަށާއި އެއީ ރާއްޖޭގެ ޑިމޮކްރަސީގެ މުސްތަގުބަލް ބައްޓަންކުރުމަށާއި ދައުލަތަކާއި ސުލްހަވެރި އަމާން މުޖުތަމައުއެއް ބިނާކުރަން ކޮންމެހެން ބޭނުން ހައްގެއް ކަމަށް ވެސް އަޒީޒް ވިދާޅުވި އެވެ.
"މި ހައްގުގެ ސަބަބުން މާހަރާކަމާއި ނަޒާހަތްތެރިކަން ދިވެހި މުޖުތަމައުގައި ގާއިމްވެއްޖެ ނަމަ އަޅުގަނޑުމެންނަށް ފެންނާނީ ފަސާދައިން ސަލާމަތްވެފައިވާ ނަޒާހަތްތެރި މާހަރާ ދައުލަތެކެވެ،" ބަޔާނުގައިވެ އެވެ.
"އެކަކު އަނެކަކަށް އިހުތިރާމްކޮށް އިތުބާރުކުރާ ކަށަވެތި [ކަށަވަރު] ރައްޔިތެކެވެ. އެކުވެރިކަމާއި އެއްބައިވަންތަކަން ފެތުރިފައިވާ އުފާވެރި، ސުލްހަވެރި، އަމާން މުޖުތަމައެކެވެ. އެއް ބަޔަކު އަނެއް ބަޔަކަށް އިހުތިރާމްކުރާ ބާއްޖަވެރި އުންމަތެކެވެ،"