ރާއްޖެއާ ކައިރިން އެކަމަކު ރާއްޖޭގެ އިގުިތިސާދީ ސަރަހައްދުން ބޭރުން ދާއަޅައިގެންނާއި މަސްވެރިކަމުގެ އެހެން ގޮތްތައް ބޭނުންކޮށްގެން ނަގާ މަސް ރާއްޖެއަށް ގެނައުމަކީ މަޝްވަރާ ކުރަންޖެހޭ ކަމެއް ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.
"އަހާ ފޯރަމް" ގެ ނަމުގައި ސަރުކާރުން ކުރިއަށް ގެންދާ ސިލްސިލާގެ ތެރެއިން ރޭ ބޭއްވި ފޯރަމްގައި އާންމު މީހަކު ކުރި ސުވާލަކަށް ޖަވާބު ދެއްވަމުން ޝިޔާމް ވިދާޅުވީ އާމްދަނީ އިތުރުކުރަން ބޭނުންވާ ކަމަށާއި ކަނޑުގައި މަސް ހުންނަ ކަން ވެސް އެނގޭ ކަމަށެވެ. ކަނޑުގެ މަތީ ފަށަލައިން ކުރާ މަސްވެރިކަން، މޫސުމަށް އަންނަ ބަދަލާ އެކު ދަށްވާކަން ފާހަގަކުރެވޭ ކަމަށް ވެސް އޭނާ ވިދާޅުވި އެވެ.
"ކަނޑުގައި، އަޅުގަނޑުމެންގެ އީއީޒެޑްގައި އަދި އީއީޒެޑުން ބޭރުގައި ވެސް މަސް ހުންނާތީތާ ދާޖަހައިގެން ނޫނީ އެހެން ކަހަލަ މަސްވެރިކަމުން ވެސް މަސް ނަގައިގެން އެހެން ގައުމުތަކަށް ގެންގޮސް ޕްރޮސެސް ކޮށްގެން ބާޒާރުތަކަށް އެބަ ނެރޭނީ. މިއީ އަޅުގަނޑުމެން މަޝްވަރާކުރަން ޖެހޭ ކަމެއްގެ ގޮތުގައި އަޅުގަނޑު ދެކެނީ،" ޝިޔާމް ވިދާޅުވި އެވެ.
ދާޖަހައިގެން ނުވަތަ މަސްވެރިކަމުގެ އެހެން ގޮތެއް ބޭނުންކޮށްގެން ރާއްޖެއާ ކައިރިން ނަގާ މަަސް ރާއްޖެއަށް ގެނެވިދާނެ ގޮތުގެ މިސާލެއްގެ ގޮތުގައި މިނިސްޓަރު ދެއްކެވީ އައްޑޫގައި މަސް ބަނދަރެއް ހަދައިގެން އެ މަސައްކަތް ކުރުމެވެ.
"މިސާލަކަށް އައްޑޫ ސިޓީ، އެ ހިސާބުގައި އަޅުގަނޑުމެން މަސްބަނދަރެއް ޖަހައިގެން އެކަން ކޮށްފި ކަމަށް ވަންޏާ [މަސް ގަނެ، ޕްރޮސެސްކުރާ ކަމަށް ވަންޏާ] އަޅުގަނޑުމެންނަށް އާމްދަނީ އެބަ ލިބޭ. ދެން އެކަމުގައި އަޅުގަނޑުމެން ބަލަން ޖެހޭނީ ކޮން ގޮތަކަށްތޯ އަޅުގަނޑުމެން އެކަން މެނޭޖްކުރާނީ،" މިނިސްޓަރު ވިދާޅުވި އެވެ.
އެއީ މަޝްވަރާކުރަން ވަރަށް ރަނގަޅު ކަމެއް ކަމަށް ވެސް އޭނާ ވިދާޅުވި އެވެ.
ޝިޔާމް ވިދާޅުވި ގޮތުގައި ލޭނު އަަޅަން ހުއްދަ ދޭން ސަރުކާރުން ކުރިން ނިންމީ ވެސް ކަނޑުގެ މަތީ ފަށަލައިން ކުރާ މަސްވެރިކަން ދަށަށް ދާތީ އެވެ. ލޭނު އަޅަން [ލޯންގްލައިން މަސްވެރިކަމަށް] ހުއްދަ ދޭން އުޅުނީ ވަރަށް ރަނގަޅު ފިޔަވަޅުތަކަކާ އެކުގައި ކަމަށް ވެސް އޭނާ ވިދާޅުވި އެވެ.
ރަައީސް ޑރ. މުހައްމަދު މުއިއްޒު އެކަން "އިހަށް މަޑުޖައްސާލެއްވީ" މިނިސްޓަރު ވިދާޅުވި ގޮތުގައި މަސްވެރިންނަށް ދެރައެއް ލިބިދާނެތީ އެވެ.
ޕެސިފިކްގައި މިހާރު އުފެދިފައިވާ ވަރުގަދަ އެލްނީނޯގެ ސަބަބުން ކަނޑުގެ ލޮނުގަނޑު ހޫނުވެ، ގާހުދުވުމުގެ މައްސަލަ ރާއްޖެއަށް ދިމާވާނެ ކަމަށް ބެލެވޭތީ، ދޮށީގެ މަސްވެރިކަން ނޫން އެހެން ގޮތެއް ވެސް ހޯދަން ޖެހޭ ކަމަށް ޝިޔާމް "މިހާރު" އަށް ދެއްވި އިންޓަވިއުއެއްގައި ވެސް ވިދާޅުވެފައި ވެ އެވެ.
އެލްނީނޯގައި ކަނޑުގެ މަތީ ފަށަލަ ހޫނުވެ، ތާމޯކްލައިން ފުންވުމުން މަސް ތިލަ ނުވިޔަސް މަސްތައް އެއަށް ވުރެ އަޑީގައި މަސްއައިންތައް އުޅެ އެވެ. ރާއްޖޭގައި ކުރާ ދޮށްޓާއި ނަނުގެ މަސްވެރިކަމަށް އަސަރު ކުރަނީ މަސް ތިލަ ނުވާތީ އެވެ. އެހެންވީމާ ތަންކޮޅެއް ފުނުން ވެސް މަސް ބޭނޭނެ ގޮތްތަކަކަށް ހިނގައްޖެ ނަމަ މިފަދަ މޫސުމީ ބަދަލުތަކާ އެކުގައި ވެސް މަސްވެރިކަން ކުރެވިދާނެ އެވެ.
"އެންމެ ބޮޑަށް އަޅުގަނޑުމެން ބޭނުންވަނީ، އަޅުގަނޑު ހަމަ ބޭނުންވޭ އޯލްޓަނޭޓިވްއެއް މީގައި ހޯދަން. ކަނޑުގެ ރިސޯސަސް އެބަ ހުރޭ. އޭގައި މައިގްރޭޝަން ޕެޓާން އަށް ބަދަލު މި އަންނަނީ،" މިނިސްޓަރު ވިދާޅުވި އެވެ.
"ޑީޕާ ޑައިވް މިކުރަނީ. އެހެންވީމާ އަޅުގަނޑުމެންނަށް އެބަ އެނގޭ ރިސޯސަސް އެބަހުރި ކަން. ރިސޯސް ހުންނަ ތަންތަން މި ބަދަލުވަނީ. ދާއިރު އެއާ އެކީގައި މަސްވެރިކަން ކުރާ ގޮތަށް ބަދަލުތަކެއް ގެންނަން މި ޖެހެނީ."
ދޮށީގެ މަސްވެރިކަން ދަށްވާ ހާލަތުގައި މަސްވެރިކަން ކުރެވޭނެ އަނެއް ގޮތަކީ އިންޑިއާ ކަނޑުުން މަސްވެރިކަން ކުރާ އެހެން ގައުމުތަކުން ވެސް އަމަލުކުރާ ގޮތަށް ދާއެޅުމެވެ. އެކަމަކު އޯލްޓަނޭޓިވްއަކީ އެއީ ކަމަކަށް މިނިސްޓަރު ވިދާޅެއް ނުވެ އެވެ. ވިދާޅުވީ މަސްވެރިކަމާ ގުޅޭ އެފަދަ ނިންމުމެއް ނިންމާ އިރު ރިއާޔަތް ކުރަން ޖެހޭ ގިނަ ކަންތައްތަކެއް އެބަހުރި ކަމަށެވެ.