ގއ. ވިލިނގިއްޔަށް ފޮނުވި ޑިޖިޓަލް އެކްސްރޭ މެޝިން ބޭނުން ނުކޮށް، ގުދަނުގައި ހުންނަތާ ދެ އަހަރަށް ވުރެ ގިނަ ދުވަސްވެއްޖެ އެވެ.
އެ އަތޮޅު ހޮސްޕިޓަލްގެ މެނޭޖަރު އަލީ ޝަމީމް "މިހާރު" އަށް މިއަދު ވިދާޅުވީ 2024 ވަނަ އަހަރުގެ މެދު ތެރޭގައި ސަރުކާރުން ފޮނުވި މެޝިން ބޭނުން ނުކުރެވި ލަސްވަނީ ހޮސްޕިޓަލްގެ ކަރަންޓު ވިއުގަ ރަނގަޅު ކުރުމާއި އެ މެޝިން ބަހައްޓަން ސްޓްރަކްޗާއަށް ބަދަލުތައް ގެންނަން ޖެހޭތީ ކަމަށެވެ.
އޭގެ ތެރެއިން ކަރަންޓު ވިއުގަ ރަނގަޅު ކުރުމުގެ މަސައްކަތް މިހާރު ކުރަމުންދާ ކަމަށް ވެސް ޝަމީމް ވިދާޅުވި އެވެ.
ނަމަވެސް، ސްޓްރަކްޗާއަށް ބަދަލުތައް ގެނެސް އެ މެޝިން ބަހައްޓަން ހޭދަވާނެ މުއްދަތެއް އަދި ސާފެއްނުވެ އެވެ.
ޝަމީމް ވިދާޅުވީ ސްޓްރަކްޗާއަށް ބަދަލުތައް ގެނައުމާއި މެމޮގްރާމްގެ ހިދުމަތް ފެށުމަށް ތައްޔާރުވުމަށް ހެލްތު މިނިސްޓްރީން ވަރަށް އަވަހަށް އިއުލާންކުރާނެ ކަމަށެވެ.
ކުރީގެ ސަރުކާރުގެ ބަދަލުވުމުގެ މަރުހަލާގައި ވިލިނގިލީ ހޮސްޕިޓަލަށް ވަނީ ޑިޖިޓަލް އެކްސްރޭގެ އެހެން މެޝިނެއް ފޮނުވި ނަމަވެސް އެ ހޮސްޕިޓަލުގައި ހުރި ސިސްޓަމާ ދިމާނުވާތީ އެ މެޝިން އަނބުރާ ފޮނުވާލީ އެވެ. އަދި މިހާރު ހުރީ މީގެ ދެ އަހަރު ކުރިން ފޮނުވި މެޝިނެވެ.
އެ އަތޮޅުގެ ގިނަ ބަޔަކު ފަރުވާ ހޯދާ ވިލިނގިލީ ހޮސްޕިޓަލުގައި މި ވަގުތު ބޭނުންކުރަނީ އާދައިގެ އެކްސްރޭ މެޝިނެވެ. ނަމަވެސް، އާ މެޝިނުން އަވަހަށް ނަތީޖާ ލިބުމާއި ރޭޑިއޭޝަންގެ އަސަރު ކުޑަވުން ހިމެނެ އެވެ.