ގަވާއިދާ ހިލާފަށް ވިލިމާލެ ފަޅު ބޭނުންކުރި 12 އުޅަނދެއް މާލެ ސިޓީ ކައުންސިލުން ޖޫރިމަނާ ކޮށްފި އެވެ.
މާލެ ސިޓީ ކައުންސިލުން ބުނީ އެ އުޅަނދުތަކަކީ ގަވާއިދުން ހުއްދަ ނަގައިގެން ފަޅު ބޭނުންކުރާ އޮޑިދޯނިފަހަރަށް ދަތިވާގޮތަށް، އުސޫލުތަކާ ހިލާފަށް ފަޅުތެރޭގައި އަޅާފައި އޮތް އުޅަނދުތަކެއް ކަމަށެވެ.
ފަޅުތެރޭގެ ތަރުތީބު ގެއްލޭގޮތަށް ހުރި އެ އުޅަނދުތަކާ މެދު ފިޔަވަޅު އަޅަން ފަށާފައިވަނީ ފަޅު ބޭނުންކުރާ އެހެން މީހުންނަށް ކުރިމަތިވާ ދަތިތަކަށް ހައްލެއް ހޯދައިދިނުމުގެ ގޮތުން ކަމަށް ވެސް ކައުންސިލުން ބުންޏެވެ.
ކޮންމެ އުޅަނދެއް ވެސް ޖޫރިމަނާ ކުރަނީ 500ރ. އިންނެވެ.
ކައުންސިލުން ވަނީ ފަޅު ބޭނުންކުރުމުގައި ކަނޑައެޅިފައިވާ ގަވާއިދުތަކަށް އިހުތިރާމްކުރަން އިލްތިމާސް ކޮށްފަ އެވެ.
ގަވާއިދާ ހިލާފަށް ހުންނަ އުޅަނދުތަކާމެދު ކުރިއަށް އޮތް ތަނުގައި ވެސް ފިޔަވަޅު އަޅަމުންދާނެ ކަމަށް ވެސް އެ ކައުންސިލުން ބުންޏެވެ.
ވިލިމާލޭގެ ފަޅަކީ ސިޓީ ކައުންސިލްގެ ބެލުމުގެ ދަށުން ބަލަހައްޓަމުން އަންނަ ސަރަހައްދެކެވެ. ފަޅުތެރޭގެ އިންތިޒާމުތައް ހަމަޖެއްސުމަށާއި، ހުއްދަ ނެތި ފަޅު ބޭނުންކުރާ އުޅަނދުތައް މަދުކުރުމަށް ކައުންސިލުން އަންނަނީ މަސައްކަތްތަކެއް ކުރަމުންނެވެ.
މީގެ ކުރިން ވެސް ކައުންސިލުން ވަނީ މާލެ އާއި ވިލިމާލެ ފަޅުގައި ގަވައިދާ ހިލާފަށް އަޅާފައި ހުރި އުޅަނދުތައް ޖޫރިމަނާ ކޮށްފަ އެވެ.