ކޫރިއާގައި ރާއްޖެއަށް 11 ކިލޯއަށް ވުރެ ގިނަ މަސްތުވާތަކެތި އެތެރެކުރަން އުޅެނިކޮށް އަތުލައިގެންފައިވާ ކަމަށް މޯލްޑިވްސް ކަސްޓަމްސް އިން މިރޭ ބުނެފި އެވެ.
ކަސްޓަމްސް އިން ބުނީ ސެޕްޓެމްބަރު 7 ވަނަ ދުވަހު ކޫރިއާ މެދުވެރިކޮށް ރާއްޖެއަށް އެތެރެކުރަން އުޅުނު 11 ކިލޯއަށް ވުރެ ގިނަ މަސްތުވާތަކެތި އަތުލައިގެންފައިވަނީ ވެލާނާ އިންޓަނޭޝަލް އެއާޕޯޓުގައި ކަމަށެވެ. އެއީ 11.7 ކިލޯގެ ކެނަބިސް ކަމަށް ކަސްޓަމްސް އިން ބުންޏެވެ.
ކަސްޓަމްސް އިން ބުނި ގޮތުގައި އެތަކެތި އަތުލައިގެންފައި ވަނީ ކޫރިއާ މެދުވެރިކޮށް ރާއްޖެއަށް ގެނެސްފައިވާ ދެ ޕެކޭޖެއް ބަލައިފާސްކުރަމުން ދިޔައިރު، އޭގެ ތެރޭގައި މަސްތުވާތަކެތި ފޮރުވާފައި ހުރި ކަމަށް ކަސްޓަމްސްއަށް ޝައްކުކުރެވިގެން އިތުރަށް ބަލައިފާސްކުރުމުގެ ތެރެއިންނެވެ.
ނަމަވެސް އެ މައްސަލައާ ގުޅިގެން މިހާތަނަށް މީހަކު ހައްޔަރުކުރި ކަމެއް އަދި ސާފެއް ނޫނެވެ.
މީގެ ކުރިން ވެސް ކޫރިއާ ސާވިސް މެދުވެރިކޮށް ރާއްޖެއަށް މަސްތުވާތަކެތި އެތެރެކުރަން އުޅެނިކޮށް އަތުލައިގެންފައިވެ އެވެ.
މި މަހުގެ 22 ވަނަ ދުވަހު ކަސްޓަމްސް އިން ވަނީ ގަން އިންޓަނޭޝަނަލް އެއާޕޯޓު މެދުވެރިކޮށް ރާއްޖެއަށް އެތެރެކުރަން އުޅުނު 3.3 ކިލޯގެ ޑްރަގު ވެސް އަތުލައިގެންފަ އެވެ.