ހެންވޭރުގެ ގެއެއްގައި ވަގަށް އުފެއްދި 4،000 އަށް ވުރެ ގިނަ ސިނގިރޭޓް ކާޓަން ނައްތާލައިފި އެވެ.
އެއީ ހެންވޭރު ގެއެއްގެ އެޕާޓްމަންޓުގައި ހިންގަމުން އައި އޮފީހެއްގައި ގާނޫނާ ހިލާފަށް، ސިނގިރޭޓް އުފެއްދުމަށް މެޝިން ބަހައްޓައިގެން ސިނގިރޭޓް އުފައްދާ ކަމަށް ތުހުމަތު ކުރެވޭ މައްސަލައާ ގުޅިގެން މިދިޔަ ޖެނުއަރީ މަހު ފުލުުހުން ހިންގި އޮޕަރޭޝަނެއްގައި އަތުލައިގެން ތަކެއްޗެވެ.
ސިނގިރެޓް ކާޓަންތަކުގެ އިތުރުން 232 ފޮށި ސިނގިރޭޓް އަދި 93.60 ކިލޯގެ ދުންފަތް ވެސް އެ އޮޕަރޭޝަންގައި އަތުލައިގަތެވެ.
ފުލުހުން މިއަދު ބުނީ އެ ހުރިހާ ތަކެތި އިއްޔެ ދޫނިދޫގައި ނައްތާލައިފައިވާ ކަމަށެވެ.
އެ ތަކެތި ނައްތާލާފައި ވަނީ ފުލުހުންގެ ބެލުމުގެ ދަށަށް ގެނެވޭ މިފަދަ ތަކެތި ނައްތާލުމުުގައި އަމަލުކުރާނެ އުސޫލުގެ ދަށުން އެކަމަށްޓަކައި އެކުލަވައިލި ކޮމިޓީގެ ބެލުމުގެދަށުން ކަމަށް ވެސް ފުލުހުން ބުންޏެވެ.
ދުންފަތް ކޮންޓްރޯލް ކުރުމުގެ ގާނޫނަށް މި ސަރުކާރުން ގެނައި އިސްލާހުގެ ދަށުން ސިނގިރެޓާއި ދުންފަތުގެ ބާވަތްތައް ރާއްޖޭގައި އުފެއްދުމަކީ ގާނޫނީ ގޮތުން ކުށެކެވެ.