ކުޑަކުދިންނަށް ކުރާ އެކި ބާވަތުގެ އަނިޔާ ހުއްޓުވުމަށާއި ކުޑަކުދިންގެ ހައްގުތައް ރައްކާތެރިކުރުމުގެ ނިޒާމު ވަރުގަދަކޮށް، ކުޑަކުދިންނަށް އަނިޔާކޮށްގެން ހުށަހަޅާ މައްސަލަތަކަށް އިޖާބަދިނުމުގެ ކަންކަން ގައުމީ އަދި ބައިނަލްއަގްވާމީ ފެންވަރުގައި ހަރުދަނާކުރުމަށް "ބޮގޯޓާ ކޯލް ޓު އެކްޝަން" ގަރާރުގައި ރާއްޖެއިން މިއަދު ސޮއިކޮށްފި އެވެ.
ރާއްޖޭގެ ފަރާތުން އެ ގަރާރުގައި ސޮއިކުރެއްވީ ހެލްތު މިނިސްޓަރު ގީލާ އަލީ އެވެ.
ބޮގޯޓާ ކޯލް ޓު އެކްޝަނަކީ ނޮވެމްބަރު 2024 ގައި ކޮލަމްބިއާގެ ބޮގޯޓާގައި ބޭއްވި ކުޑަކުދިންނަށް ކުރާ އަނިޔާ ހުއްޓުވުމާ ބެހޭ ފުރަތަމަ ބައިނަލްއަގުވާމީ މަހާސިންތާގައި ބައިވެރިވި ގައުމުތަކުން އިސްނަގައިގެން އިފްތިތާހުކުރި ގަރާރެކެވެ.
އެ ގަރާރުގެ މައިގަނޑު ބޭނުމަކީ ކުޑަކުދިންނަށް ކުރާ އަނިޔާ ހުއްޓުވުމާއި އެފަދަ ކަންކަމާ ގުޅިގެން ފިޔަވަޅު އެޅުމަށް ބައިނަލްއަގްވާމީ ފެންވަރުގައި ކުރެވޭ މަސައްކަތްތައް ހަރުދަނާކޮށް ކުޑަކުދިން ރައްކާތެރިކުރުމުގެ ނިޒާމު އިތުރަށް ވަރުގަދަކުރުމެވެ.
ހެލްތު މިނިސްޓްރީން ބުނީ އެ ގަރާރުގައި މައިގަނޑު ގޮތެއްގައި އަލިއަޅުވާލާފައި ވަނީ ހޯދުންތަކާއި ހެކިތަކުގެ މައްޗަށް ބިނާވެފައިވާ ރައްކާތެރިކަމުގެ ފިޔަވަޅުތައް އެޅުމަށް ކަމަށާއި ގާނޫނީ އަދި ސިޔާސަތުތަކުގެ އޮނިގަނޑުތައް ހަރުދަނާކުރުމާއި ކުޑަކުދިން ހިމާޔަތްކުރުމުގެ ނިޒާމުތައް ވަރުގަދަކުރުމުގެ މައްޗަށް ކަމަށެވެ.
ޑިޖިޓަލް މާހައަލުތަކުގައި ކުޑަކުދިންނަށް ރައްކާތެރިކަން ކަށަވަރު ކޮށްދިނުމާއި އިދާރީ ގުޅުންތަކާއި ބައިވެރިވުން އިތުރުކުރުމުގެ އިތުރުން ކުޑަކުދިންގެ ރައްކާތެރިކަމާއި ލާބައާ ގުޅުން ހުރި ނިންމުންތަކުގައި އެ ކުދިންގެ ބައިވެރިވުން މާނަ ހުރި ގޮތެއްގައި ހިމެނުމަށް ގަރާރުގައި ބާރު އަޅާ ކަމަށް މިނިސްޓްރީން ބުންޏެެވެ.
އޭގައި ހިމެނޭ ކަންކަމަކީ ކުޑަކުދިންނަށް ކުރާ އަނިޔާ ހުއްޓުވުމާއި އެފަދަ ކަންކަމަށް އިޖާބަ ދިނުމަށް ރާއްޖެއިން 2024 ވަނަ އަހަރު އެކުލަވާލި "ނޭޝަނަލް އެކްޝަން ޕްލޭން އޮން ޕްރިވެންޝަން އެންޑް ރެސްޕޯންޑިން ޓު ވަޔަލެންސް އަގެއިންސްޓް ޗިލްޑްރަން" އާ ގުޅިލާމެހިފައިވާ ކަންކަމެވެ.
މިނިސްޓްރީން ބުނި ގޮތުގައި، ރާއްޖެއިން އެކުލަވާލި އެ ޕްލޭންގެ މައިގަނޑު އަމާޒަކީ އަނިޔާއިން ރައްކާތެރިވުމަށް އިސްކަންދީގެން، ގޭތެރޭގެ މާހައުލާއި ތައުލީމުދޭ މަރުކަޒުތަކާއި މުޖުތަމައު އާއި އިންޓަނެޓްގެ ވަސީލަތްތައް ބޭނުންކުރުމުގައި ވެސް ކުޑަކުދިންނަށް އަމާން އަދި ރައްކާތެރި މާހައުލެއް ކަށަވަރުކޮށްދިނުން ކަމަށެވެ.
އެ ޕްލޭނުގައި ކުޑަކުދިން ރައްކާތެރިކުރުމުގެ ނިޒާމު އިތުރަށް ހަރުދަނާކުރުމަށް އިސްކަންދީފައިވާ ކަމަށާއި އޭގެ މަގުސަދަކީ ނުރައްކަލަށް ހުށަހެޅިފައިވާ ކުދިން ދުރާލައި ދެނެގަނެ، އެ ކުދިންނަށް ފުރިހަމަ ރައްކާތެރިކަމާއި އަޅާލުމާއި އެހީތެރިކަން އެންމެ އެދެވޭ ގޮތެއްގައި ފޯރުކޮށްދެވޭނެ ކަމަށެވެ.
އަނިޔާގެ މައްސަލައެއް ހުށަހެޅިއްޖެ ހާލަތުގައި ފޯރުކޮށްދެވޭ ހިދުމަތްތަކަކީ ރައްކާތެރި އަދި އެކުދިންގެ މަސްލަހަތު އެންމެ އިސްކޮށްގެން ދެވޭ ހިދުމަތްތަކެއްކަން ކަށަވަރުކުރުން ހިމެނޭ ކަމަށް ވެސް މިނިސްޓްރީން ބުންޏެެވެ.
އެ ގަރާރުގައި ސޮއިކުރުމަށް ބޭއްވި ރަސްމިއްޔާތުގައި މިނިސްޓަރު ގީލާ ވިދާޅުވީ ކުޑަކުދިންނަށް ކުރާ އަނިޔާ ހުއްޓުވުމުގައި މާނަހުރި ކުރިއެރުމެއް ހޯދުމަށް ދެމެހެއްޓެނިވި މަސައްކަތްތަކެއް ބޭނުންވާ ކަމަށެވެ. ދައުލަތުގެ މުއައްސަސާތަކާއި އާއިލާތަކާއި މަދަނީ ޖަމުއިއްޔާތަކާއި ތަރައްގީގެ ބައިވެރިން އަދި ކުޑަކުދިން ވެސް ހިމެނޭހެން، މުޅި މުޖުތަމައު ބައިވެރިވާ ފުރިހަމަ ނިޒާމެއްގެ ތެރެއިން އެކަމަށް އެހީތެރިކަން ބޭނުންވާ ކަމަށް ގީލާ ވިދާޅުވި އެވެ.