އާމްދަނީގެ ގޮތުގައި މަހަކު 60،000ރ. ލިބޭ މީހުންނަށް މާދަމާއިން ފެށިގެން އާސަންދަ ލިމިޓްކުރާނެ ކަމަށް ކުރިން އިއުލާން ކުރިޔަސް، އެކަން މިވަގުތު އޮތީ މަޝްވަރާގެ މަރުހަލާގައި ކަމަށް ހެލްތު މިނިސްޓަރު ގީލާ އަލީ މިއަދު ވިދާޅުވެއްޖެ އެވެ.
ރައީސް އޮފީހުގައި މީގެ ކުރިން ބޭއްވި ނިއުސް ކޮންފަރެންސްގައި ރައީސް ޑރ. މުހައްމަދު މުއިއްޒު ވިދާޅުވީ އާސަންދަ މިހާރު ދެނީ އެންމެ މުއްސަނދި މީހާ އާއި އެންމެ ފަގީރު މީހާއާ މެދު އެއްވެސް ތަފާތެއް ނެތި ކަމަށެވެ.
އެއީ އެންމެ ރަނގަޅު ގޮތް ކަމަށް ގަބޫލު ނުކުރައްވާތީ އެ ނިޒާމަށް އޮކްޓޯބަރު 1 އިން ފެށިގެން ބަދަލުތައް ގެންނަވާނެ ކަމަށް ރައީސް ވިދާޅުވެފައިވެ އެވެ.
"އެހެންވީމާ މުއްސަނދިންނާއި، އިންކަމް ޓެކްސް ޕޭކުރާ ފަރާތްތައް މުއްސަނދިންނަށް ކޮންމެހެން އާންމުންނަށް މި ލިބޭ ގޮތަށް ހުރިހާ ކަމެއް ފްރީކޮށް ލިބޭކަށް ނުޖެހޭ. އެހެންވީމަ އެ ބަދަލު މި އަންނަ މަހުން ފެށިގެން ގެނެވޭނެ،" މި މަހުގެ ހަތް ވަނަ ދުވަހު ބޭއްވި ޕްރެސް ކޮންފަރެންސްގައި ރައީސް ވިދާޅުވި އެވެ.
ރައިސް އޮފީހުން މިއަދު ބޭއްވި ޕްރެސް ކޮންފަރެންސްގައި ނޫސްވެރިއެއްގެ ސުވާލަކާ ގުޅިގެން މިނިސްޓަރު ގީލާ ވިދާޅުވީ ވަކި ބަޔަކަށް އާސަންދަ ލިމިޓުކުރުމަކީ މަޝްވަރާ މޭޒުގައި އޮތް ކަމެއް ކަމަށެވެ. އެހެންވެ، އެކަމާ މެދު ވަކި ގޮތެއް ނުނިމޭ ކަމަށް އޭނާ ވިދާޅުވި އެވެ.
"ތިކަން ތިގޮތަށް ކުރިއަށް ގެންދިއުމާ މެދު ވެސް އަދި ނުނިންމަވާ. އެހެން ނަމަވެސް، ފިނޭންސް މިނިސްޓްރީއާ ހެލްތު މިނިސްޓްރީ އަދި ކަމާބެހޭ އެހެން އިދާރާތަކާއެކު، އާސަންދަ އާއި އެހެން ހޮސްޕިޓަލްތަކާއެކުގައި ވެސް އަޅުގަނޑުމެން މަޝްވަރާތައް އެބަ ކުރިއަށް ގެންދަން ތިކަމުގައި ހުރި އެންމެ ފީސިބަލް ގޮތަކީ ކޮބާތޯ،" އޭނާ ވިދާޅުވި އެވެ.
ޕްރެސް ކޮންފަރެންސަށްފަހު މިނިސްޓަރު ވިދާޅުވީ ކަމާގުޅޭ އިދާރާތަކާއެކު މަޝްވަރާ ކުރުމަށްފަހު ވަކި ބަޔަކަށް އާސަންދަ ލިމިޓުކުރުމުގެ މައްސަލަ ކެބިނެޓަށް ވެސް ހުށަހަޅާނެ ކަމަށެވެ. އެހެންވެ، އެ އުސޫލަށް މާދަމާ އަމަލުކުރަން ނުފެށޭނެ ކަމަށާއި އެކަން ތަންފީޒުވާނެ ދުވަހެއް އަދި ނޭނގޭ ކަމަށް ގީލާ ވިދާޅުވި އެވެ.