މިހާރު އަމަލުކުރާ ހެއްކާބެހޭ ގާނޫނު އޮތްގޮތުން ކުރީގެ ނައިބު ރައީސް އަހުމަދު އަދީބާއި މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ކުރީގެ މެނޭޖިން ޑިރެކްޓަރު އަބްދުﷲ ޒިޔަތުގެ ހެކިބަސް މިހާރު ބަލައިނުގަނެވޭނެ ކަމަށް ކުރީގެ ރައީސް އަބްދުﷲ ޔާމީންގެ ވަކީލުން ވިދާޅުވެއްޖެ އެވެ.
ވ. އާރަށް ކުއްޔަށް ދޫކުރުމުގެ މުއާމަލާތާ ގުޅިގެން ރިޝްވަތު ގަބޫލު ކުރައްވައި، މަނީ ލޯންޑާ ކުރެއްވި ކަމަށް ބުނެ ޔާމީންގެ މައްޗަށް 11 އަހަރުގެ ޖަލު ހުކުމެއް އިއްވާފައި ވަނިކޮށް، އެ ހުކުމް ބާތިލް ކުރުމަށްފަހު، ހައި ކޯޓުން ވަނީ އެ މައްސަލަ ކްރިމިނަލް ކޯޓުގައި އަލުން ބަލަން އަމުރުކޮށްފަ އެވެ.
ހައި ކޯޓުގެ ހުކުމުގައި އާ ހެކިތަކެއް ބަލައިނުގަނެވޭނެ ކަމަށް ނިންމާފައިވާތީ، އެ ބައި ދައުލަތުން ސުޕްރީމް ކޯޓުގައި އިސްތިއުނާފްކުރި ނަމަވެސް އެ ކޯޓުން ވެސް ނިންމާފައިވާ އާ ހެކިތައް ބަލައިނުގަނެވޭނެ ކަމަށެވެ. އެހެންވެ، އެ ނިންމުމަށްފަހު ކްރިމިނަލް ކޯޓުން މިއަދު ވަނީ އެ މައްސަލައިގެ ޝަރީއަތް އަލުން ފަށައިފަ އެވެ.
ޝަރީއަތް ފެށުމުގެ ކުރިން ހުށަހަޅާ ހުށަހެޅުމެއްގެ ގޮތުން ޔާމީންގެ ފަރާތުން ވަނީ އަދީބާއި ޒިޔަތުގެ ހެކިބަސް ބަލައިނުގަތުމަށް އެދިފަ އެވެ. އެގޮތަށް އެދުނީ މިހާރު އަމަލު ކުރަމުންދާ ހެއްކާބެހޭ ގާނޫނު އޮތްގޮތުން އެ ދެ މީހުންގެ ހެކިބަސް ބަލައިނުގަނެވޭނެ ކަމަށް ގަބޫލު ކުރެވޭތީ އެވެ.
އެ މައްސަލާގައި ކްރިމިނަލް ކޯޓުން އެންމެ ފުރަތަމަ ހުކުމް އިއްވިއިރު ހެއްކާބެހޭ އާ ގާނޫނަށް އަމަލުކުރަން ނުފަށަ އެވެ. ނަމަވެސް، މައްސަލަ އަލުން ބެލުމަށް ހައި ކޯޓުން ކްރިމިނަލް ކޯޓުން އެންގިިއިރު އަމަލުކުރަމުންދަނީ ހެއްކާބެހޭ އާ ގާނޫނަށެވެ.
ޔާމީންގެ ވަކީލު ހަމްޒާ ލަތީފް ފާހަގަކުރެއްވީ ހެއްކާބެހޭ ގާނޫނުގެ 48 ވަނަ މާއްދާ އަދި 49 ވަނަ މާއްދާ އެވެ. އެ މާއްދާގައި ބުނަނީ:
- ހެކިބަސް ދޭ ފަރާތުގެ ތެދުވެރިކަމާއި އިންސާފުވެރިކަމާމެދު ސުވާލު އުފެދޭ ފަރާތްތަކަކީ، ހެކިބަސް ދިނުމުގެ އަދުލުވެރިކަން ގެއްލިފައިވާ ފަރާތްތަކެއް ކަމުގައި ބެލޭނެ
- އެގޮތުން ވައްކަމާއި ޓެކުމާއި ހިޔާނާތް އަދި ފޭރުމުގެ ކުށްތަކާއި އޮޅުވާލުމާއި މަކަރާއި ހީލަތް ހެދުމުގެ ކުށްތަކާއި ކޮރަޕްޝަންގެ ކުށްތައް ސާބިތުވެފައިވާނަމަ ތެދުވެރިކަމާއި އިންސާފުވެރިކަމާމެދު ސުވާލު އުފެދިފައިވާ ފަރާތެއް ކަމުގައި ބެލޭނެ
- އަދުލުވެރި ނޫން މީހެއްގެ ހެކިބަސް ބަލައިގަނެވޭނީ ވަކި ވާގިއާއަކާ ގުޅޭގޮތުން ކާފީ ހެއްކަކަށްވާ މިންވަރަށް ހެކިބަސް ދޭނެ އެހެން ފަރާތެއް ނެތް ހާލަތެއްގައި
ހަމްޒާ ވިދާޅުވި ގޮތުގައި ހެއްކާބެހޭ ގާނޫނަށް އަމަލުކުރުމުގެ ކުރިން ވެސް ގއ. ވޮޑަަމުލާގެ މައްސަލާގައި އަދީބާއި ޒިޔަތުގެ ހެކިބަސް ބަލައިގަނެވޭނެ ކަމަށް އޮތީ ކަނޑައަޅައިފަ އެވެ. އެއީ އެ ދެ މީހުންނަކީ ޔާމީންއާ މެދު އަދާވަތްތެރިކަން އޮތް ކަމަށް ސުޕްރީމް ކޯޓަށް ގަބޫލުކުރެވޭތީ އެވެ.
ޔާމީންގެ ވަކީލަށް ރައްދު ދެއްވަމުން ދައުލަތުގެ ވަކީލް އަހުމަދު ޝަފީއު ވިދާޅުވީ އަދީބާއި ޒިޔަތަކީ މައްސަލައިގެ ހިމެނޭ ކޮރަޕްޝަންގެ މައުލޫމާތު އެންމެ ރަނގަޅަށް އެނގޭނެ ދެ މީހުން ކަމަށް ބަލަންޖެހޭ ކަމަށާއި އެ ދެ މީހުންގެ ހެކިބަހަށް ބާރުދޭނެ އެހެން ހެކި ބަސް ދައުލަތުން ހުށަހަޅާނެ ކަމަށް އޭނާ ވިދާޅުވި އެވެ.
އަދީބާއި ޒިޔަތުގެ ހެކިބަހުގެ އިތުރުން ރައްޔިތުންގެ މަޖިލީހުގެ ކުރީގެ ނައިބު ރައީސް އަހުމަދު ނާޒިމްގެ ހެކިބަސް ބަލައިނުގަތުމަށް ވެސް ޔާމީންގެ ފަރާތުން ހުށަހެޅި އެވެ. އެއީ އޭނާގެ ހެއްކެއްގެ ގޮތުގައި ހުށަހަޅާފައިވަނީ ވ. އާރަށުގެ މައްސަލަ ސާފުކޮށް ނޭނގި، އެމްއެމްޕީއާރްސީގެ ކޮރަޕްޝަންގެ މައުލޫމާތު ކޮންމެވެސް މިންވަރަކަށް އެނގޭތީ ކަމަށް ބުނެ ކަމަށްވާތީ ކަމަށް ވަކީލް ވިދާޅުވި އެވެ.
ދައުލަތުން ވެސް ވަނީ ޔާމީންގެ ދިފާއީ ހެކިތައް ބަލައިނުގަތުމަށް ހުށަހެޅުމެއް ހުށަހަޅައިފަ އެވެ. އެގޮތަށް އެދުނީ ދައުލަތުގެ ވަކީލް ވިދާޅުވި ގޮތުގައި އެ މައްސަލައިގެ ތަހުގީގު މަރުހަލާގައި ޔާމީން ހަނު ހުންނެވުމަށްފަހު އެ މަރުހަލާގައި ހާމަނުކުރާ ހެކިތަކަށް ޝަރީއަތުގައި ފުރުސަތު ދެވިގެންނުވާނެތީ ކަމަށް ބުނެ އެވެ.
ދައުލަތުން ބަލައިނުގަތުމަށް އެދުނު ހެކިތަކަކީ މާލޭގެ ކުރީގެ ޑެޕިއުޓީ މޭޔަރު އަހުމަދު ނަރީޝް އާއި އަބްދުﷲ ރަޝީދު ކިޔާ މީހަކާއި ވިލިމާލެ ދާއިރާގެ މަޖިލިސް މެންބަރު މުހައްމަދު އިސްމާއީލް އަދި ހުޅުދޫ ދާއިރާގެ މަޖިލިސް މެންބަރު މުހައްމަދު ޝާހިދެވެ. އަދި ޑޮލަރު މާރުކުރިކަން ބަޔާންކޮށްދޭ ލިޔުމެއް ވެސް ހެކީގެ ގޮތުގައި ބަލައިނުގަތުމަށް އެދިފައިވެ އެވެ.
ޔާމީނާއި ޔޫސުފް ނައީމް ވެސް އެ މައްސަލާގައި ދިފާއުއެއްގެ ގޮތުގައި ނަގަނީ ޔާމީންގެ އެކައުންޓަށް ޖަމާވި އެއް މިލިއަން ޑޮލަރަކީ ޑޮލަރު މާރުކުރުމުގެ މުއާމަލާތަކުން ލިބުނު ފައިސާ ކަމަށާއި އަދި އެ ޑޮލަރަށްވާ ދިވެހި ފައިސާ ޔޫސުފް ނައީމްއާ ހަވާލުކުރީ ނަގުދު ފައިސާގެ ގޮތުގައި ކަމަށެވެ. އަދި އެ ފައިސާ ގުނައިގެން ހަވާލުކުރި ކަމަށް ބުނެ މީގެކުރިން ނަރީޝް ހެކިބަސް ދީފައިވެ އެވެ.
އެކަމަކު، އޭނާގެ އެ ހެކިބަހާ މެދު ބޮޑެތި ސުވާލުތައް އުފެދިފައިވާއިރު، ޔާމީންގެ މައްޗަށް ދައުވާކުރާ ރ. ފުއްގިރި މައްސަލައިގައި ދިފާއީ ހެއްކެއްގެ ގޮތުގައި ހެކިބަސް ދޭން އޭނާ ވަނީ ދެކޮޅު ހަދައިފަ އެވެ.
ރ. ފުއްގިރި ކުއްޔަށް ދިނުމުގެ މުއާމަލާތާ ގުޅިގެން ރިޝްވަތު ގަބޫލުކޮށް އަދި އެ ފައިސާ ލޯންޑާކުރި ކަމަށް ބުނާ މައްސަލާގައި ޔާމީންގެ މައްޗަށް ކުރާ ދައުވާގެ ޝަރީއަތް ވެސް ކްރިމިނަލް ކޯޓުގައި ކުރިއަށް ގެންދެ އެވެ. އެ މައްސަލައިގެ އަޑުއެހުމެއް މިދިޔަ ހަފުތާއަށް ތަވާލުކުރި ނަމަވެސް ކެންސަލްކުރި އެވެ.
ފުއްގިރި ކުއްޔަށް ދިނުމުގެ މުއާމަލާތާ ގުޅިގެން ރިޝްވަތުގެ ގޮތުގައި އެއް މިލިއަން ޑޮލަރު ގަބޫލު ކުރައްވައި، އެ ފައިސާ ލޯންޑާ ކުރެއްވި ކަމަށް ބުނެ ޔާމީންގެ މައްޗަށް ދައުލަތުން ކުރާ ދައުވާ ގުޅިގެން ހެކިބަސް ނެގުމުގެ މަރުހަލާ ނިމި، މިހާރު އޮތީ ހެއްކާބެހޭ ގޮތުން ވާހަކަ ދެއްކުމުގެ މަރުހަލާގަ އެވެ. އަދި އެ ހިސާބުގައި މައްސަލަ އޮންނަތާ ވަނީ ގިނަ ދުވަސްތަކެއްވެފަ އެވެ.