ބޮމެއް އޮތް ކަމަށް ބުނެ ވެލާނާ އިންޓަނޭޝަނަލް އެއާޕޯޓުގައި ސަމާސާކުރުމުން ހައްޔަރުކުރި މީހާ، އެ ގައުމުގެ ސަރުކާރުން އެދިގެން މިނިވަންކޮށް އެ ގައުމަށް ގެންގޮސްފި އެވެ.
މި މައްސަލައާ ގުޅިގެން ހައްޔަރުކުރީ ޕީޓާ ސަމާން މަރުޒޫކް ސަމާން ކިޔާ އުމުރުން 38 އަހަރުގެ މީހެކެވެ. މިސްރުގެ ޑޮކްޓަރެއް ކަމަށްވާ އެ މީހާ ރާއްޖެ އައީ، އެނގިފައިވާ ގޮތުގައި އާއިލާ އެކު ޗުއްޓީ ހޭދަކުރުމަށެވެ.
އޭނާ ހައްޔަރުކުރީ އެއާޕޯޓްގެ ޑިޕާޗާ ސްކްރީން ސަރަހައްދުގައި އެމީހާގެ ދައްތަގެ ދަބަސް އިތުރަށް ޗެކް ކުރަމުންދިޔަ ވަގުތު އެ ދަބަހުގައި ބޮމެއް އޮތް ކަމަށް ބުނެފައިވާތީ އެވެ.
އެއާޕޯޓްގައި މީހުން ބިރުގަންނަ ގޮތަށް މިފަދަ ވާހަކަ ދެއްކުމަކީ ވެސް ގާނޫނީ ކުށަކަށް ވާތީ ވަގުތުން މިސްރު މީހާ ހައްޔަރުކުރި އެވެ. އޭނާ ވަނީ ހައްޔަރުކުރަން އުޅުމުން އެއީ މަޖަލަކަށް ދެއްކި ވާހަަކައެއް ބުނެ، މާފަށް އެދިފަ އެވެ.
ބަންދާ މެދު ގޮތެއް ނިންމަން ކްރިމިނަލް ކޯޓަށް ހާޒިރު ކުރުމުން ވެސް މާފަށް އެދި، އެއީ މަޖަލަށް ދެއްކި ވާހަކައެއް ކަމަށް ބުންޏަސް، ކޯޓުން ނިންމީ ފަސް ދުވަހަށް ބަންދުކުރުމަށެވެ.
އެހެންވެ، މިކަމުގެ ތެރެއަށް މިސްރުގެ ސަރުކާރުން ވަނެވެ.
ޕީޓާ ސަމާން މަރުޒޫކް ރާއްޖޭގެ ޖަލުން މިނިވަންކުރަން އެ ގައުމުގެ ފޮރިން މިނިސްޓްރީން ސްރީލަންކާގައި ހުންނަ އެ ގައުމުގެ އެމްބަސީއާ އެކު މަސައްކަތްކޮށް، އޭނާ ވަނީ މިނިވަންކޮށްފަ އެވެ.
މިސްރުގެ ފޮރިން މިނިސްޓްރީއާ ހަވާލާދީ އެ ގައުމުގެ ނޫސްތަކުން ރިޕޯޓްކޮށްފައިވާ ގޮތުގައި މިސްރުގެ ކޮންސިއުލާ އެފެއާޒްގެ އެސިސްޓަންޓް ފޮރިން މިނިސްޓަރު ހައްދާދު އަބްދުއްތައްވާބު އަލްޖައުހަރީ ވަނީ ރާއްޖޭގެ ފޮރިން މިނިސްޓްރީގެ ކޮންސިއުލާ ޑިޕާޓްމަންޓުގެ ޑިރެކްޓަރާ ގުޅުއްވައި، ޑޮކްޓަރާ މެދު އިހުތިރާމާއެކު އަމަލުކުރުމަށާއި ވީ އެންމެ އަވަހަކަށް މިނިވަންކުރުމަށް އެދިވެޑައިގެންފަ އެވެ.
މި މަސައްކަތްތަކުގެ ނަތީޖާއެއްގެ ގޮތުން، ދެ ގައުމުގެ ދެމެދުގައި އޮތް ގާތް ގުޅުމުގެ ތެރެއިން ދިވެހި ސަރުކާރުން އޭނާ ދޫކޮށްލީ ކަމަށް ފޮރިން މިނިސްޓްރީން ބުނެފައިވެ އެވެ.
އޭނާ އެނބުރި ގައުމަށް ދިއުމުން، ސަފީރު އަލްޖައުހަރީ ވަނީ އެ ފަރާތާއި އާއިލާއާ މިނިސްޓްރީގައި ބައްދަލުކުރައްވައިފަ އެވެ. މި ބައްދަލުވުމުގައި، މިނިސްޓްރީ އާއި ކަމާގުޅުންހުރި އިދާރާތަކުން ކުރި މަސައްކަތްތަކަށްޓަކައި އާއިލާގެ ފަރާތުން ޝުކުރު އަދާކޮށްފައިވެ އެވެ.
މިސްރުގެ ފޮރިން މިނިސްޓްރީން ވަނީ ގައުމުން ބޭރަށް ދަތުރުކުރާ އެ ގައުމުގެ ރައްޔިތުން، އެ ގައުމެއްގެ ގާނޫނުތަކާއި ގަވާއިދުތަކަށް ބޯލެނބުމަށް އިލްތިމާސްކޮށްފަ އެވެ.