ހަތަރު މިލިއަނެއްހާ ބޭރު ފައިސާ ރާއްޖެއިން ގެންދަން އުޅުނު މީހުންގެ ބަންދަށް މަސް ދުވަސް

ރާއްޖެއިން ބޭރަށް ފުރަން ވެލާނާ އިންޓަނޭޝަނަލް އެއާޕޯޓަށް ގޮސް ތިބި ބިދޭސީ ބައެއްގެ އަތުން ގާތްގަނޑަކަށް 3.8 މިލިއަން ރުފިޔާގެ ބޭރު ފައިސާ ފެނުނު މައްސަލާގައި ހައްޔަރުކުރި މީހުން 30 ދުވަހަށް ބަންދުކުރަން ކޯޓުން އަމުރުކޮށްފި އެވެ. 

ގަވާއިދާ ހިލާފަށް ބޭރު ފައިސާ ގަނެވިއްކުމުގެ މުއާމަލާތްތައް ހިންގާ ފަރާތްތައް ހޯދައި، ގާނޫނީ ފިޔަވަޅު އެޅުމަށް ކުރަމުން އަންނަ މަސައްކަތްތަކުގެ ތެރެއިން، އެ ކަމަށް ހާއްސަ ކޮށްފައިވާ ޓާސްކްފޯހަށް ލިބުނު މައުލޫމާތަކާ ގުޅިގެން މި މަހުގެ 18 ގައި ހިންގި އޮޕަރޭޝަނެއްގައި ވަނީ ހަ ބިދޭސީއަކު އެއާޕޯޓުން ހިފަހައްޓައިފަ އެެވެ. 

ބަންގްލަދޭޝްގެ އެ މީހުންނަށް ކުރަނީ މަނީ ލޯންޑްރިންގެ ތުހުމަތެވެ. އެ އެންމެންގެ ބަންދުގެ މުއްދަތު އިތުރުކުރުމަށް ކޯޓަށް ހާޒިރުކުރުމުން ވަނީ 30 ދުވަހަށް ބަންދުކުރަން އަމުރުކޮށްފަ އެވެ. 

ކޯޓު އަމުރުގައިވާ ގޮތުން އެމްޑީ މޮހިއްދީނަކީ މީގެ ކުރިން ވެސް އެފަދަ ގޮތްގޮތަށް ރާއްޖެއިން ފައިސާ ބޭރުކުރުމަށް މަސައްކަތް ކުރަމުން އައި ފަރާތެއްކަން ފާހަގަކުރެވިފައިވެ އެވެ. ރަޖިބުގެ އަމުރުގައިވާ ގޮތުން އޭނާގެ ފަރާތުން ބުނެފައިވަނީ އެ ތުހުމަތުކުރެވޭ މައްސަލައާ އޭނާއާ ގުޅުމެއް ނެތް ކަމަށެވެ. 

ޝަހިންގެ ކޯޓު އަމުރުގައި ބުނީ އޭނާއާ ދެކޮޅަށް ހުށަހަޅާފައިވާ ސީސީޓިވީ ފުޓޭޖްގެ ސްނެޕް ޝޮޓްތަކަށް ބަލާއިރު އޭނާގެ ބައިވެރިވުން އެ ކުށުގެ އަމަލު ހިނގުމަށް އޮތްކަން ޔަގީންވާ ކަމަށެވެ. އަދި މައިނުއްދީންގެ އަމުރުގައިވާ ގޮތުން އޭނާގެ ވަކީލު ވަނީ އޭނާއަކީ ހަމައެކަނި މީހަކު ފުރުވަން އެއާޕޯޓަށް ދިޔަ މީހެއް ކަމަށް ބުނެފަ އެވެ. އެކަމަކު އޭނާއާ ދެކޮޅަށް ހުށަހަޅާފައިވާ ސީސީޓީވީ ފުޓޭޖްގެ ސްނެޕް ޝޮޓްތަކަށް ބަލާއިރު އޭނާގެ ބައިވެރިވުން ވެސް އިތުރަށް އޮތްކަމަށް ޔަގީންވާކަން ފާހަގަކުރެ އެވެ. 

ފުލުހުން ކުރިން ބުނެފައިވާ ގޮތުގައި އެ ހަ މީހުންގެ އަތުން 174,161 ޔޫއެސް ޑޮލަރާއި 56,760 ޔޫރޯ އާއި 1،815 ސްޓާލިން ޕައުންޑް ހިމެނޭހެން ޖުމުލަ 18 ގައުމެއްގެ ފައިސާ ފެނުނު ކަމަށެވެ. އެ ފައިސާގެ ޖުމުލަ އަގު ގާތްގަނޑަކަށް 3.8 މިލިއަން ރުފިޔާ އަށް އަރާ ކަމަށް ވެސް ފުލުހުން ބުނެފައިވެ އެވެ. 

ފުލުހުން އާންމުކޮށްފައިވާ ފޮޓޯގައިވާ ގޮތުން އެ ފައިސާ ފޮރުވާފައި ހުރީ ސީރިއަލް ޕެކެޓުތަކެއްގެ ތެރޭގަ އެވެ.