ބްލޮގަރު ޔާމީން ރަޝީދު މަރާލި މައްސަލާގެ ޝަރީއަތުގެ އަޑުއެހުންތައް ކްރިމިނަލް ކޯޓުން މިއަދު ނިންމާލައިފި އެވެ.
އޭޕްރީލް، 2017 ގައި، ޔާމީން ދިރިއުޅުނު ގޭގެ ސިޑިގޮޅި ތެރޭގައި ތޫނު އެއްޗެހިން ހަމަލާދީ ޔާމީން މަރާލި މައްސަލާގައި ދައުލަތުން ފުރަތަމަ ދައުވާކުރީ ހ. އަންނާރުމާގޭ އިސްމާއިލް ހައިޝަމް ރަޝީދާއި މ. އިރަސްމިކުގޭ އަހުމަދު ޒިހާން އިސްމާއިލާއި ގދ. ގައްދޫ ސިންދުބާދުގޭ މުހައްމަދު ދިފްރާނާއި މ. ކުދެހިގޭ ހަސަން ޝިފާޒްގެ އިތުރުން މ. ތާއިފް އިސްމާއިލް ރަޝީދު އަދި މ. ކޮޅުފުށީ އީސްޓް، ހުސައިން ޒިޔާދުގެ މައްޗަށެވެ.
އޭގެ ތެރެއިން ހައިޝަމާއި ޒިހާންގެ މައްޗަށް 2022 ވަނަ އަހަރު ކުށް ސާބިތުވެ، އެ މީހުން އުމުރަށް ޖަލަށްލާން ކްރިމިނަލް ކޯޓުން ހުކުމް ކޮށްފައި ވަނިކޮށް އެ މައްސަލަ އެ މީހުންގެ ފަރާތުން އިސްތިއުނާފް ކުރުމުން ހައި ކޯޓުން ވަނީ އެ މައްސަލަ އަލުން ބަލަން އަމުރުކޮށްފަ އެވެ. އަދި ކުށް ސާބިތުނުވި އިސްމާއިލް ރަޝީދާއި ދިފްރާންގެ މައްސަލަ ދައުލަތުން އިސްތިއުނާފް ކުރުމުން އެ ދެ މީހުންގެ މައްސަަލަ ވެސް އަލުން ބަލަން ހައި ކޯޓުން އޮތީ އަމުރުކޮށްފަ އެވެ.
އެހެންވެ، ކްރިމިނަލް ކޯޓުން އެ މައްސަލަތައް އަލުން ބެލުމަށް ހިންގާ ޝަރީއަތުގައި މިއަދު ކުރިއަށް ގެންދިޔައީ އިސްމާއިލާއި ދިފްރާންގެ ބައި އެވެ.
މިއަދުގެ އަޑުއެހުމުން ދައުލަތުން ބުނީ ޔާމީން ރަޝީދަށް ހަމަލާދިން ރޭ، އޭނާ ދިރިއުޅުނު ގޭގެ ބޭރުގައި އިސްމާއިލް ރަޝީދު ސައިކަލެއްގައި މަޑުކޮށްގެން ހުރިކަން ހެކިންގެ ބަހުން އެނގޭއިރު، ހަމަލާދިން މީހުން އެގެއިން ނިކުތުމުން އޭގެ ތެރެއިން އެކަކު ގޮވައިގެން ސައިކަލުގައި ދިޔައީ އިސްމާއިލް ރަޝީދުކަން ވެސް ހެކިންގެ ބަހުން އެނގޭ ކަމަށެވެ. އަދި އެއީ ކުށްކުރި މީހުންނަށް އެހީތެރިވުމުގެ އަމަލެއް ކަމަށް ދައުލަތުން ބުންޏެވެ.
މީގެ އިތުރުން ޔާމީން މަރާލުމަށް ހިނގި މަޝްވަރާތަކުގައި އިސްމާއިލް ބައިވެރިވި ކަމަށް ވެސް ހެކިން ބުނާ ކަމަށް ދައުލަތުން ބުންޏެވެ.
ދައުލަތުން ބުނިގޮތުގައި ޔާމީން ރަޝީދަށް ފާރަލުމުގެ އަމަލުގައި ދިފްރާން ބައިވެރިވިކަން ހެކިންގެ ބަހުން އެނގެ އެވެ. އަދި ޔާމީން ރަޝީދު މަރާލުމުން ޖެހިގެން އައި ދުވަހު، އޭނާ ދިރިއުޅުނު ގެ ކައިރިީގައި ވެސް އޭނާ އިތުރު މީހަކާއެކު ހަރަކާތްތެރިވާ މަންޒަރު ވީޑިއޯ ފުޓޭޖްތަކުން ފެންނަ ކަމަށް ވެސް ދައުލަތުން ބުންޏެވެ.
އެހެންވެ، އެ ދެ މީހުންގެ މައްޗަށް ކުށް ސާބިތުވާ ކަމަށް ކަނޑައަޅަން ދައުލަތުން އެދުނެވެ.
އިސްމާއިލާއި ދިފްރާންގެ ވަކީލް ވިދާޅުވި އެ ދެ މީހުންނާ ބެހޭގޮތުން ސިއްރު ހެކިވެރިން ހެކިބަސް ދީފައިވަނީ ގަބޫލުކުރާ ކުރުމެއްގެ މައްޗަށް ބިނާކޮށް ކަމަށެވެ. އަދި އެ ހެކިން ހެކިބަސް ދިނީ ދައުލަތުން "ދޯ ދޭ އުސޫލުން" ބައެއް ކަންކަން ބުނެދިނުމުން ކަމަށް ވެސް ވަކީލް ވިދާޅުވި އެވެ. ނަމަވެސް ދިފާއުގެ ގިނަ ސުވާލުތަކަށް ސިއްރު ހެކިން ޖަވާބުދޭން ދެކޮޅު ހެދިކަން ވަކީލް ފާހަގަ ކުރެއްވި އެވެ.
ވަކީލް ވިދާޅުވި ގޮތުގައި އެ މައްސަލާގައި އެންމެ މުހިންމު ހެކިބަހެއް ދިން ސިއްރު ހެކިވެރިޔާގެ ހެކިބަހަށް ބަލާއިރު އޭނާއަކީ ދައުވާލިބުނު ދެކޮޅަށް ހެކިބަސް ދޭން ހުރި މީހެއްކަން އޭނާގެ ހެކިބަހުގައި ސާފުކޮށް ބުނެފައިވެ އެވެ. އަދި އޭނާއަކީ ތެދު ހެކިބަހެއް ދެވޭނެ މީހެއް ކަމާ މެދު ސުވާލު އުފެދޭ ކަންކަން ހެކިބަހުން ފެންނަން ހުރި ކަމަށް ވެސް އޭނާ ވިދާޅުވި އެވެ.
މީގެ އިތުރުން އެ މައްސަލާގައި ހުށަހެޅި ގިނަ ވީޑިއޯތަކުގެ ސްނެޕްޝޮޓްތަކަކީ މީހުން ދެނެގަނެވޭ މިންވަރަށް ވުރެ ނުސާފު ސްނެޕްޝޮޓްތަކެއް ކަމަށް ވަކީލުން ބުންޏެވެ. އަދި އެ ވީޑިއޯއިން ފެންނަނީ އެހެން ބަޔަކު ކަމަށް ވެދާނެތޯ ކުރި އެއްވެސް ސުވާލަކަށް ވީޑިއޯ އެނަލިސިސް ރިޕޯޓް ތައްޔާރުކުރި ފުލުސް މީހާއަށް ކޯޓުގައި ޖަވާބު ދެވިފައިނުވާ ކަމަށް ވެސް ވަކީލް ވިދާޅުވި އެވެ.
ވަކީލް ވިދާޅުވި ގޮތުގައި އެ މައްސަލާގައި ވީޑިއޯ ފުޓޭޖްތައް ހޯދުމާއި އެނަލިސިސް ހެދުމުގައި ފުލުހުންގެ ފަރާތުން ފަރުވާކުޑަ ކޮށްފައިވާ ކަމަށް ކުރިން ކްރިމިނަލް ކޯޓުން އެ މައްސަލަ ނިންމިއިރު ފާހަގަކޮށްފައިވެ އެވެ. އަދި އެފަދަ ހެކިތަކެއްގެ މައްޗަށް ބިނާކޮށް ދައުވާ ސާބިތުވާނަމަ، ދެން ރާއްޖޭގައި ސާބިތު ނުކުރެވޭނެ ދައުވާއެއް ނޯންނާނެ ކަމަށް ވެސް ވަކީލް ވިދާޅުވި އެވެ.
އެހެންވެ، ވަކީލް އެދިވަޑައިގަތީ އެ ދެ މީހުންގެ މައްޗަށް ކުށް ސާބިތުނުވާ ކަމަށް ނިންމައި ދިނުމަށެވެ.
އެ މައްސަލާގައި ދެން ދައުވާލިބޭ ހައިޝަމާއި ޒިހާންގެ ބައި ވެސް އޮތީ ކުރިން އަޑުއެހުންތައް ނިންމާލައިފަ އެވެ. އެހެންވެ، ދެން އެ މައްސަލާގައި އޮންނާނީ ހަތަރު މީހުންގެ މައްސަލާގައި ވެސް ހުކުމް އިއްވުން ކަމަށް ފަނޑިޔާރުންގެ ބެންޗުން އިއުލާން ކުރެއްވި އެވެ.
އެ މައްސަލަ ކްރިމިނަލް ކޯޓުން ބައްލަވަނީ ގާޒީ އިބްރާހިމް އިހްސާނާއި ގާޒީ މުހައްމަދު މިސްބާހުގެ އިތުރުން ގާޒީ އަލީ ނަދީމެވެ. އަދި އެ ބެންޗުގެ ރިޔާސަތަކީ ގާޒީ އިހްސާނެވެ.