ރާއްޖޭގެ އުތުރުގެ ސަރަހައްދުގައި މިހާތަނަށް ބާއްވާ އެންމެ ބޮޑު ބާޒާރު ކަމަށްވާ "ބޮޑުތިލަދުންމަތީ ބޮޑު ބާޒާރު" އަދި “އައިލެންޑް ކާނިވަލް” ކުޅުދުއްފުށި ސިޓީގައި މިއަދު ފަށައިފި އެވެ.
އެ ހަރަކާތް ރަސްމީކޮށް ފައްޓަވައިދެއްވީ ކުޅުދުއްފުށި ސިޓީގެ މޭޔަރު މުހައްމަދު އާތިފެވެ.
ކުޅުދުއްފުށި ސިޓީ ކައުންސިލްގެ އިސްނެގުމާ އެކު އެޑްވެންޗާ އަޕްއާ ގުޅިގެން މުޅި ބޮޑުތިލަދުންމައްޗަށް އަމާޒުކޮށްގެން ކުރިއަށް ގެންދާ އެ ފެސްޓިވަލް ކުރިއަށްދާނީ މިއަދުން ފެށިގެން އަންނަ މަހުގެ ހަތަރު ވަނަ ދުވަހުގެ ނިޔަލަށެވެ.
ކުޅުދުއްފުށީ ސިޓީ ކައުންސިލުން ބުނި ގޮތުގައި އެ ފެސްޓިވަލްގެ ތެރެއިން 21 ސްޓޯލް އެކުލެވޭ ބޮޑުބާޒާރެއް ކުރިއަށް ދާއިރު، އެއީ ވިޔަފާރިތައް އެއްފަހަރާ ބޮޑު މާކެޓަކަށް އިޝްތިހާރުކޮށް ވިޔަފާރި ހިންގުމަށް ލިބިގެންދާ ރަނުގެ ފުރުސަތެކެވެ.
މީގެ އިތުރުން ކުޑަކުދިންނާއި ބޮޑެތި މީހުންނަށް ވެސް ބައިވެރިވެވޭ ގޮތަށް ކުރިއަށް ގެންދާ "އައިލެންޑް ކާނިވަލް" ގައި، ލޭޒާޓެގް ފަދަ ތަފާތު ގިނަ ކުޅިވަރުތައް ތަޖުރިބާކޮށްލުމުގެ ފުރުސަތު ލިބިގެންދާނެ ކަމަށް ކައުންސިލުން ބުންޏެވެ.
މީގެ އިތުރުން ސްޕޮންސަރުންގެ ޓެންޓުތަކުން ހިދުމަތްތައް ފޯރުކޮށްދިނުމާއި ފޯރިގަދަ ސްޓޭޖް ޝޯތަކާއި އެކި މުބާރާތްތައް ވެސް އެ ހަރަކާތުގެ ތެރެއިން ކުރިއަށްދާނެ ކަމަށް އެ ކައުންސިލުން ބުންޏެވެ.
ކުޅުދުއްފުށީ ސިޓީ މޭޔަރު ވިދާޅުވި ގޮތުގައި އެ ބާޒާރު ވެގެންދާނީ މުނިފޫހިފިލުވުމުގެ އީދަކާއެކު މުޅި އުތުރަށް އަންނަ ވިޔަފާރީގެ އީދަކަށެވެ. މޭޔަރު ވަނީ މި ބާޒާރަށް ދައުވަތު ދިނުމުގެ ގޮތުން ހދ. އާއި ހއ. އަދި ށ. އަތޮޅުގެ ހުރިހާ ރަށަކަށް ވަކިވަކިން ވަޑައިގެންފަ އެވެ.