ރާއްޖޭގެ ކަނޑުގެ ހާއްސަ އިގުތިސޯދީ ސަރަހައްދުގައި ގާނޫނާ ހިލާފަށް ހަރަކާތްތެރިވަމުން ދިޔަ ބޭރުގެ މަސްބޯޓެއް އެމްއެންޑީއެފްގެ ކޯސްޓްގާޑުން އަތުލައިގެންފި އެވެ.
އެމްއެންޑީއެފްއިން ބުނި ގޮތުގައި އެމްއެންޑީއެފް ކޯސްޓްގާޑް ޝިޕް އިމާދުއްދީނުގެ ބެލުމުގެ ދަށަށް ގެންގޮސްފައިވާ މަސް ބޯޓުގައި ހަތް މީހުން ތިއްބެވެ.
އެ ބޯޓު އޮތީ ހއ.ތުރާކުނުގެ ހުޅަނގުއުތުރުން 46 ނޯޓިކަލް މޭލު ބޭރުގަ އެވެ. އަދި ބޭރުގެ ބޯޓު ހދ.ކުޅުދުއްފުށްޓަށް ގެނައުމުގެ މަސައްކަތް މިހާރު ކުރަމުންދާ ކަމަށް އެމްއެންޑީއެފް އިން ބުންޏެވެ.
މިއީ ކޮން ގައުމަކަށް ނިސްބަތްވާ ބޯޓެއް ކަމެއް އަދި އޭގައި ތިބީ ކޮން ގައުމެއްގެ ބައެއް ކަމެއް އެމްއެންޑީއެފްއިން އަދި ހާމައެއް ނުކުރެ އެވެ.
އެމްއެންޑީއެފްއިން ދޭތެރެ ދޭތެރެއިން ރާއްޖޭގެ ކަނޑުގެ ސަރަހައްދުގައި ގަވައިދާ ހިލާފަށް އުޅޭ ބޭރުގެ މަސް ބޯޓުތައް އަތުލައިގަންނައިރު، އޭގެ ތެރޭގައި ގިނައީ އީރާނުގެ ބޯޓުތަކެވެ.
ގަވައިދާ ހިލާފަށް އުޅޭ ބޭރުގެ މަސް ދޯންޏެއް ސިފައިން އަތުލައިގަތްއިރު، އިންޑިއާގެ ކޯސްޓް ގާޑުން ވެސް ވަނީ މަލިކުގެ ހުޅަނގުން 526 ކިލޯގެ މަސްތުވާތަކެއްޗާ އެކު އީރާނުގެ ބޯޓެއް އަތުލައިގެންފަ އެވެ.