ދިވެހި ޒުވާނުން ހެޔޮގޮތުގައި ބައްޓަން ކުރުމުގެ މަގުސަދުގައި ސަރުކާރުން މީގެ އެއް އަހަރު ކުރިން ތައާތަފުކުރި ދިވެހި ވަތަނީ ހިދުމަތުގެ ކުރިމަގު ފެންނަނީ ވަރަށް އުޖާލާކޮށް ކަމަށާއި އިތުރު ދާއިރާތައް ވެސް ތައާރަފު ކުރައްވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ނޭޝަނަލް ސާވިސް ނުވަތަ ވަތަނީ ހިދުމަތް ފެށިތާ މިއަދަށް އެއް އަހަރު ފުރުމާ ދިމާކޮށް ކުރެއްވި ޕޯސްޓެއްގައި ރައީސް ވިދާޅުވީ، އެ ޕްރޮގްރާމްގެ ތެރެއަށް ފަންނީ އިތުރު ދާއިރާތައް ތައާރަފު ކުރައްވާނެ ކަމަށެވެ.
"އަދި ނޭޝަނަލް ސާވިސްގެ ތަމްރީނުތައް ފުރިހަމަކުރާ ޒުވާނުންނަށް ވަޒީފާގެ ފުރުސަތުތައް ފަހިކޮށްދިނުމަށް ކުރާ މަސައްކަތުގައި ނޭޝަނަލް ކެރިއާ ސާވިސްގެ ދައުރު ފުޅާކުރުމަކީ ވެސް ސަރުކާރުގެ އަމާޒެއް،" ރައީސް މުއިއްޒު ވިދާޅުވި އެވެ.
އެ މަނިކުފާނު ފާހަގަކުރެއްވި ގޮތުގައި، ވަތަނީ ހިދުމަތުގެ ތެރެއިން ކޮންމެ އަހަރަކު ވެސް 1،000 ޒުވާނުން ތަމްރީން ކުރުމަށް ސަރުކާރުން ކަނޑައެޅި ލަނޑުދަނޑި ފުރަތަމަ އަހަރު ވެސް ވަނީ ހާސިލް ވެފަ އެވެ. މި އަހަރު އެކަނި ވެސް 1،028 ޒުވާނުން ތަމްރީން ކޮށްފައިވާ ކަމަށް ރައީސް ވިދާޅުވި އެވެ.
އެ މަނިކުފާނު ވިދާޅުވީ، ނޭޝަނަލް ސާވިސް އިނީޝަލް ޓްރޭނިންގެ ތެރެއިން 1،028 ދިވެހި ޒުވާނުން ތަމްރީނު ކޮށްފައިވާއިރު، ނޭޝަނަލް ސާވިސް ސްކިލް ޓްރޭނިން ޕްރޮގްރާމުން 136 ޒުވާނުން ވަނީ ތަމްރީން ކޮށްފަ އެވެ.
"މާތް ﷲ އަށް ހމްދުކުރާ ހާލު، މި މުނާސަބާގައި ދިވެހި ވަތަނީ ހިދުމަތުގެ ތަމްރީނުތައް ފުރިހަމަކުރި ޒުވާނުންނަށާއި އާއިލާތަކަށް ތަހުނިޔާ ދަންނަވަން. އަދި ދިވެހި ވަތަނީ ހދުމަތުގެ ކާމިޔާބު ހަރަކާތް ކުރިއަށް ގެންދިއުމުގައި ޝާމިލުވާ ހުރިހާ ފަރާތްތަކަށް ހައްގު ޝުކުރު އަދާކުރަން،" ރައީސް މުއިއްޒު ވިދާޅުވި އެވެ.
ވަތަނީ ހިދުމަތުގެ ޕްރޮގްރާމަކީ ސީދާ އެ މަނިކުފާނުގެ އިސްނެންގެވުމަކަށް އެއް އަހަރު ކުރިން ރާއްޖެ އަށް ތައާރަފުކުރި ޕްރޮގްރާމެކެވެ. އޭގެ މަގުސަދަކީ ސަރުކާރުން ބުނެފައިވާ ގޮތުގައި ދިވެހި ގައުމިއްޔަތަށް ލޯބިކުރާ، އިސްލާމްދީނަށް ފަރުވާތެރި، ޒިންމާދާރު، ޖިސްމާނީ ގޮތުންނާއި ރޫހާނީ އަދި ނަފުސާނީ ގޮތުން ދުޅަހެޔޮ ބަޔަކު ތަމްރީން ކުރުމެވެ.