މިރޭ ފެށުމަށް ހަމަޖެހިފައިވާ އެމްޑީޕީގެ ކޮންގްރެސްއަށް ރަޖިސްޓްރީވުމުގެ އިތުރު ފުރުސަތެއް އެ ޕާޓީން މިއަދު ހުޅުވާލައިފި އެވެ.
މިއަދުން ފެށިގެން އަންނަ ހޮނިހިރުގެ ނިޔަލަށް މާލޭ ސިޓީ ކައުންސިލްގެ އިދާރާގެ ގޯތި ތެރޭގައި ކުރިއަށްދާ ކޮންގްރެސްއަށް ރަޖިސްޓްރީވުމުގެ މުއްދަތު މިދިޔަ މަހުގެ 25 ވަނަ ދުވަހަށް ވަނީ ހަމަވެފަ އެވެ.
އެ މުއްދަތުގައި 900 އަށްވުރެ މަންދޫބުން ރަޖިސްޓްރީކޮށްފައިވާ ކަމަށް އެ ޕާޓީން ބުނެފައިވެ އެވެ.
އެމްޑީޕީން މިއަދު ނެރުނު އިއުލާނެއްގައި ބުނީ ކޮންގްރެސްގައި ބައިވެރިވުމުގެ ހައްގު ލިބިފައިވާ ފަރާތްތަކުގެ ތެރެއިން ރަޖިސްޓަރީ ނުވުމުގެ ސަބަބުން ކޮންގްރެސްގައި ބައިވެރިވުމުގެ ފުރުސަތު ގެއްލިފައިވާ ފަރާތްތަކަށް ރަޖިސްޓަރީވުމުގެ ފުރުސަތު ދިނުމަށް ނިންމާފައިވާ ކަމަށެވެ.
ޕާޓީގެ މަގްސަދަކީ ކޮންގްރެސްގައި ބައިވެރިވުމުގެ ހައްގު ލިބިފައިވާ ވީހާ ވެސް ގިނަ ފަރާތްތަކަށް މަންދޫބުންގެ ގޮތުގައި ކޮންގްރެސްގައި ބައިވެރިވުމުގެ ފުރުސަތު ފަހިކޮށްދިނުން ކަމަށް އިއުލާނުގައި އެވެ.
އެހެންވެ، ކޮންގްރެސް ބޭއްވުމަށް ހަމަޖެހިފައިވާ މާލަމަށް މާދާމާގެ މެންދުރުފަހު 2:30 ން ފެށިގެން ރޭގަނޑު 10:00 އާ ހަމައަށް ދިޔުމުން ރަޖިސްޓަރީކޮށްދިނުމުގެ އިންތިޒާމް ހަމަޖެހޭނެ ކަމަށް އެމްޑީޕީން ބުންޏެވެ.
ކޮންގްރެސްއިން ނިންމުންތައް ނިންމުމުގެ މައި ހަރަކާތް އޮތީ ހޮނިހިރު ދުވަހު އެވެ. މިރޭ ކޮންގްރެސް ފެށުމުގެ ޖަލްސާ ބާއްވަން ނިންމާފައިވާއިރު، މާދަމާ އޮތީ ޕަބްލިކް-ޕްރައިވެޓް ޕާޓްނަޝިޕް އުސޫލުން ލޯކަލް ކައުންސިލްތަކުން ހިންގާ މަޝްރޫއުތަކަށް އިންވެސްޓްކުރާނެ އިންވެސްޓަރުން ހޯދަން ބާއްވާ އިންވެސްޓްމެންޓް ފޯރަމެކެވެ.