މިރޭ ފަށާ އެމްޑީޕީގެ ކޮންގްރެސްގައި ފާސްކުރަން ހުށަހަޅަން ނިންމާފައިވާ އެ ޕާޓީގެ އަސާސީ ގަވާއިދުގައި އެމްޑީޕީގެ ރައީސާއި ނައިބު ރައީސްގެ މަގާމު އުވާލުމަށް ހިމަނައިފި އެވެ.
އެންމެ ބޮޑު އިދިކޮޅު ޕާޓީގެ ރައީސާއި ނައިބު ރައީސްގެ މަގާމު އުވާލުމަކީ އެ ޕާޓީގެ ޗެއާޕާސަންގެ މަގާމުގައި ފައްޔާޒު އިސްމާއިލް ހުންނެވިއިރު ފާޅުކުރެއްވި ހިޔާލެކެވެ.
އަސާސީ ގަވައިދުގައިވާ ގޮތުން، އެމްޑީޕީގެ އެންމެ އިސް ފަރާތަކީ ޗެެއާޕާސަން އެވެ. އެއަށް ފަހު، ޗެއާޕާސަންގެ ނައިބުންނެވެ. ޕާޓީގެ ހިންގުމުގެ ހުރިހާ މަސްއޫލިއްޔަތެއް ވެސް އޮންނަނީ އެ ބޭފުޅުންގެ އަތުގަ އެވެ.
ނަމަވެސް، އެމްޑީޕީގައި ރައީސާއި ނައިބު ރައީސުން ވެސް ތިބޭތީ ޒިންމާތައް ފުށުއެރުމުގެ މައްސަލަތަކެއް މީގެ ކުރިން ފެންމަތިވެފައިވެ އެވެ.
އެމްޑީޕީގެ ރައީސާއި ނައިބު ރައީސްގެ މަގާމު އުވާލުމަށް ތައްޔާރުވަމުން އަންނައިރު، އެ ދެ މަގާމު ވެސް މި ވަގުތު އޮތީ ހުސްކޮށެވެ. ރައީސްކަން އެންމެ ފަހުން ފުރުއްވި އަބްދުﷲ ޝާހިދު ވަނީ އެމްޑީޕީގެ ރިޔާސީ ޕްރައިމަރީއަށް ވާދަކުރައްވަން އެ މަގާމު ދޫކޮށްލައްވައިފަ އެވެ.
އަދި، އެ ކެމްޕެއިންގައި އަމަލީ ގޮތުން ބައިވެރިވެވަޑައިގަތުމަށް ނައިބު ރައީސްގެ މަގާމުގައި ހުންނެވި ހިސާން ހުސެއިން ވެސް އިސްތިއުފާ ދެއްވި އެވެ.
އެމްޑީޕީގެ ރައީސްގެ މަގާމު ކުރީގެ ރައީސް މުހައްމަދު ނަޝީދު ވެސް ގިނަ އަހަރުތަކެއް ވަންދެން ފުރުއްވި އެވެ. އެ މަނިކުފާނު އެމްޑީޕީން ވަކިވެވަޑައިގެން ދަ ޑިމޮކްރެޓްސް ޕާޓީ އުފެއްދެވީ އެ މަގާމުން އިސްތިއުފާ ދެއްވުމަށް ފަހު އެވެ.
އަންނަ ހޮނިހިރު ދުވަހު ފާސްކުރަން އެޖެންޑާ ކޮށްފައިވާ އެމްޑީޕީގެ އާ އަސާސީ ގަވައިދުގައި އެހެން ބައެއް ބަދަލުތައް ވެސް ހިމަނައިފަ އެވެ. އެގޮތުން ޕާޓީގެ އެންމެ އިސް ފަރާތަކީ ޗެއާޕާސަން ކަމުގައި ވަނީ ކަނޑައަޅައިފަ އެވެ.
މިހާރު އަމަލުކުރަމުން އަންނަ އަސާސީ ގަވައިދުގައި އެމްޑީޕީއަށް ނިސްބަތްވާ ރައީސުލްޖުމްހޫރިއްޔާއެއް ހުންނަވާ ހާލަތުގައި، ޕާޓީގެ އެންމެ އިސް ފަރާތަކީ އެ ބޭފުޅާ ކަމަށް ބަޔާންކުރާ މާއްދާ އާ ގަވައިދަކު ނެތެވެ.