އެމްޑީޕީން މިއަދު ފެށި އިންވެސްޓްމެންޓް ފޯރަމްގައި ލޯކަލް ކައުންސިލްތަކުން ހުށަހަޅާ 76 މަޝްރޫއުއަކަށް އިންވެސްޓްމެންޓް ހޯދަން ހުޅުވާލައިފި އެވެ.
"ރަށްވެހި ތަރައްގީ" ގެ ނަމުގައި އެމްޑީޕީން ކުރިއަށް ގެންދާ އިންވެސްޓްމެންޓް ފޯރަމަކީ ކައުންސިލުތަކުން ހިންގަން ރާވާފައިވާ މަޝްރޫއުތަކަށް އިންވެސްޓްމެންޓް ހޯދުމުގެ މަގުފަހިކުރަން ބާއްވާ ފޯރަމެކެވެ.
މި ފޯރަމަށް 76 ޕްރޮޕޯސަލެއް ހުށަހަޅާނެ ކަަމަށް އެމްޑީޕީން ބުނެފައިވާއިރު، އޭގެ ތެރެއިން 40 ހުށަހެޅުމެއްގައި މަޝްރޫއުއަށް ހޯދާ އިންވެސްޓްމެންޓްގެ އަދަދު ބަޔާންކޮށްފައިވެ އެވެ. އެ އަދަދު 306 މިލިއަން ޑޮލަރަށް އަރަ އެވެ.
ފޯރަމަށް ހުށަހަޅާ 76 މަޝްރޫއުގެ ތެރެއިން އަގުގެ ގޮތުން އެންމެ ބޮޑު ޕްރޮޕޯސަލެއް ހުށަހަޅަނީ ތިނަދޫ ސިޓީ ކައުންސިލުންނެވެ. އެއީ ކާޑެއްދޫ އެއާޕޯޓު ތަރައްގީކުރުމާއި ދެކުނުގެ ސީޕްލޭން ހަބެއް އެޅުމެވެ.
އޭގެ އިތުރުން ވެސް ފަސް މަޝްރޫއުއަކަށް ތިނަދޫ ކައުންސިލުން ޕްރޮޕޯސަލް ހުށަހަޅަ އެވެ.
މާލޭ ސިޓީ ކައުންސިލުން ވެސް ވަނީ މާލޭގައި ކްލައިމެޓް ޕާކަކާއި ވޯޓާފްރޮންޓް ކްލައިންބިން ވޯލްއަކާއި ކަސްރަތުކުރާ ސަރަހައްދެއް ގާއިމުކުރަން ޕްރޮޕޯސަލް ހުށަހަޅައިފަ އެވެ.
އައްޑޫ ސިޓީ ކައުންސިލާއި ފުވައްމުލަކު ސިޓީ ކައުންސިލުން ސޯލާ ހޯމް ބެޓެރީ މަޝްރޫއުއެއް ހިނގަން އިންވެސްޓަރުން ހޯދާއިރު ކުޅުދުއްފުށީ ސިޓީ ކައުންސިލުން ވަނީ ގޭދޮށު އިންޖީނުގޭގެ ނަމުގައި އަވިން ހަކަތަ އުފައްދާ މަޝްރޫއުއެއް ހިނގަން ހުށަހަޅައިފަ އެވެ.
އައްޑޫ އަދި ފުވައްމުލަކު ސިޓީ ކައުންސިލުން އަށް މަޝްރޫއެއް ހިނގަން ފައިސާ ހޯދަން ވަނީ ހުށަހަޅައިފަ އެވެ. އޭގެ ތެރޭގައި އައްޑޫގައި ކޮންވެންޝަން ސެންޓަރެއް އެޅުން ވެސް ހިމެނެ އެވެ.
ސީޓިތަކުގެ އިތުރުން 27 ރަށު ކައުންސިލަކުން ވެސް ވަނީ އިންވެސްޓްމެންޓް ފޯރަމަށް ޕްރޮޕޯސަލްތައް ހުށަހަޅައިފަ އެވެ.