އަމީނިއްޔާ ސްކޫލުގެ ހުރިހާ ދަރިވަރުން ބައިވެރިވެގެން، މި އަހަރުގެ ކުޑަކުދިންގެ ދުވަސް ކުލަގަދަކޮށް މިއަދު ފާހަގަކޮށްފި އެވެ.
ހެންވޭރު ދަނޑުގައި ބޭއްވި ބޮޑު ހަރަކާތުގައި އެޑިއުކޭޝަން މިނިސްޓަރު ޑރ. އާއިޝަތު ޝިހާމް އަދި މޯލްޑިވްސް އެއާޕޯޓްސް ކޮމްޕެނީ (އެމްއޭސީއޭލް)ގެ މެނޭޖިން ޑިރެކްޓަރު އާދިލް މޫސާ ވެސް ބައިވެރިވެވަޑައިގަތެވެ.
މި ހަރަކާތުގެ ތެރޭގައި ކުދިންގެ ނެށުމާއި ޑްރިލް އަދި މެޖިކް ޝޯއަކާއި ދުނިޔޭގެ މަޝްހޫރު ތަންތަނުގެ މައުލޫމާތު ލިބޭނެ ސްޓޯލް އަކާއި ފޮޓޯ ބޫތެއް ވެސް ބަހައްޓާފައި ހުއްޓެވެ. އަދި ލަވަކިޔުންތެރިޔާ ސަމީއު އާއި ސުނީތާ އަލީގެ ނެށުމާއި ލަވަތައް ވެސް ހުށަޙަޅައިދީފައި ވެ އެވެ.
އަމީނިއްޔާ ސްކޫލުގެ އޮފިޝަލަކު ވިދާޅުވި ގޮތުގައި މިއީ އެ ސްކޫލުން މިހާތަނަށް ބޭއްވި އެންމެ ބޮޑު ހަރަކާތެވެ. ގްރޭޑް 1-10 އާ ހަމައަށް ކިޔަވާ ހުރިހާ ދަރިވަރުން ބައިވެރިކޮށްގެން މިފަދަ ބޮޑު ހަރަކާތެއް ބޭއްވީ، އޭނާ ވިދާޅުވިގޮތުގައި، އެއް ކުއްޖަކުު އަނެއް ކުއްޖަކަށް އިހުތިރާމްކޮށް އެއީ ސްކޫލުގެ ހުރިހާ މުވައްޒަފުން ވެސް ލޯބިވާ ކުދިންތަކެއް ކަމަށް އަންގައިދިނުމަށެވެ.
"ވަރަށް ކާމިޔާބު ހަރަކާތެއް. ސްކޫލުގެ ގާތްގަނޑަަކަށް ހުރިހާ ދަރިވަރުން ބައިވެރިވެ، އުފާވެރި މަޖާ ވަގުތުކޮޅެއް ހޭދަކޮށްލެވުނު،" އޮފިޝަލް ވިދާޅުވި އެވެ.