ސޯޝަލް މީޑިއާ އެކްޓިވިސްޓް އަޒްރާ ނަސީމް ވެސް ދެ ހަފުތާ ތެރޭގައި ފުލުސް އޮފީހަށް ހާޒިރުވާން މިއަދު އަންގައިފި އެވެ.
ފުލުހުން ނެރުނު ބަޔާނެއްގައި ބުނީ އަޒުރާ ހާޒިރުވާން އެންގީ އޭނާއާ ގުޅޭ ގޮތުން ތަހުގީގު ކުރަމުންދާ މައްސަލައެއްގައި ޖަވާބުދާރީވާން ކަމަށެވެ. އެކަމަކު އޭނާއާ ގުޅޭ ގޮތުން ތަހުގީގުކުރާ މައްސަލައިގެ ތަފްސީލެއް ފުލުހުން ނުދެ އެވެ.
ފުލުހުން ބުނީ އަޒްރާ އަށް ތުހުމަތުކުރެވޭ މައްސަލާގައި އޭނާއާ ސުވާލު ކުރުމަށާއި ތުހުމަތުތަކަށް ޖަވާބުދާރީވެ ދިފާއުގައި ވާހަކަދައްކަން 14 ދުވަހުގެ މުއްދަތެއް ދިނީ، ރާއްޖެ އިން ބޭރުގައި އޭނާ ދިރިއުޅޭތީ ތަހުގީގަށް ހާޒިރު ނުކުރެވިގެން ކަމަށެވެ.
މި މުއްދަތުގައި އަޒްރާ ހާޒިރު ނުވެއްޖެ ނަމަ އޭނާ އަށް ތުހުމަތު ކުރެވޭ މައްސަލާގައި، މިހާތަނަށް ލިބިފައިވާ ހެއްކާއި ގަރީނާތަކުގެ މައްޗަށް ބިނާކޮށް، ޣައިރު ހާޒިރުގައި ދައުވާ ކޮށްދޭން އެދި މައްސަލަ ޕްރޮސިކިއުޓަ ޖެނެރަލްގެ އޮފީހަށް ފޮނުވާނެ ކަމަށް ވެސް ފުލުހުން ބުންޏެވެ.
އަޒްރާގެ އިތުރުން ރާއްޖެ އިން ބޭރުގައި ދިރިއުޅެމުން އަންނަ އައިޝަތު ވެލެޒިނީ އާއި މުޒައްފަރު ނައީމް އަދި މ. ވިކްޓަރީ އަބްދުﷲ ހާނީ އާމިރު ވެސް ވަނީ ދެ ހަފުތާ ތެރޭގައި ޕޮލިހަށް ހާޒިރުވާން އަންގައިފަ އެވެ.