ވެރިކަން ކުރާ ޕީޕީއެމްގެ ދިދަ އާއި ލޯގޯ ބޭނުންކުރި ކަމަށް ބުނެ ކުރީގެ ރައީސް އަދި އެ ޕާޓީ އުފެއްދެވި މައުމޫން އަބްދުލް ގައްޔޫމްގެ ދަރިކަލުން އަހުމަދު ފާރިސް މައުމޫންގެ މައްޗަށް ދައުވާ ކޮށްދިނުމަށް އެދި ޕްރޮސެކިއުޓަ ޖެނެރަލް (ޕީޖީ) ގެ އޮފީހަށް ފޮނުވައިފި އެވެ.
ދިއްގަރު ދާއިރާގެ މެމްބަރު ފާރިސްގެ މައްޗަށް ދައުވާ ކޮށްދިނުމަށް އެދި ޕީޖީ އަށް ފޮނުވީ މީގެ ހަފުތާއެއްހާ ދުވަސް ކުރިން ކަމަށްވެ އެވެ. އެ މައްސަލާގައި ފާރިސްގެ މައްޗަށް ދައުވާ ކުރުމަށް ޕީޖީން ކްރިމިނަލް ކޯޓަށް މިއަދު ފޮނުވާފައިވާ ކަމަށް ބައެއް މީޑިއާތަކުން ވަނީ މިރޭ ރިޕޯޓް ކޮށްފަ އެވެ. އެކަމަކު ޕީޖީ އަދި ކޯޓުގެ އިސްބޭފުޅަކާ ގުޅޭ ގޮތް ނުވާތީ "މިހާރު" އަށް އަދި އެކަން ކަށަވަރެއް ނޫނެވެ.
ނަމަވެސް، ޕީޕީއެމްގެ ދިދަ އާއި ލޯގޯ ބޭނުންކުރި މައްސަލާގައި ފާރިސްގެ މައްޗަށް ދައުވާ ކޮށްދިނުމަށް އެދި ޕީޖީ އަށް ފޮނުވާފައިވާކަން ފުލުހުން ކަށަވަރު ކޮށްދެ އެވެ.
ޕީޕީއެމްގެ ދިދަ އާއި ލޯގޯ ބޭނުންކުރި މައްސަލާގައި ފާރިސް މިދިޔަ މަހު ފުލުސް އޮފީހަށް ހާޒިރުކޮށް ބަޔާން ވެސް ވަނީ ނަގައިފަ އެވެ.
ދައުލަތުން ކޮށްފައިވާ ޚަރަދެއް އަނބުރާ ނުދައްކާ ކަމަށް ބުނެ، ފާރިސްގެ މައްޗަށް ދައުވާ ކޮށްދިނުމަށް އެދި މީގެ ކުރިން ފުލުހުން ޕީޖީ އަށް މައްސަލައެއް ހުށަހެޅި އެވެ. އެކަމަކު ޖިނާއީ މައްސަލަތަކުގައި ދައުވާކުރުމަށް ގާނޫނުލް އުގޫބާތުގައި ދީފައިވާ މުއްދަތު ފާއިތުވެފައިވާތީ ޕީޖީ ވަނީ އެ މައްސަލަ އަނބުރާ ފުލުހުންނަށް ފޮނުވާލައިފަ އެވެ.
ފާރިސް އަށް ދައުވާކުރަން އޭރު ފޮނުވީ އޭނާގެ ބައްޕާފުޅު މައުމޫންގެ ވެރިކަމުގައި ކުރީގެ ރިޔާސީ ގަނޑުވަރު، ތީމުގޭގެ ބަޖެޓުން ކުރި ޚަރަދުތަކާ ގުޅިގެންނެވެ. އެ މައްސަލަ ޕީޖީ އަށް ފުލުހުން ފޮނުވީ އެންޓި ކޮރަޕްޝަން ކޮމިޝަނުން އެ މައްސަލަ ފުލުހުންނަށް ހުށަހެޅުމުންނެވެ.
ފާރިސްގެ މައްޗަށް ފުލުހުން މިހާރު ވެސް ވަނީ ރައްޔިތުންގެ މަޖިލީހުގެ ރައީސް އަބްދުﷲ މަސީހު މަގާމުން ދުރުކުރުމަށް މިދިޔަ މާޗްމަހު ނެގި ވޯޓުގައި މެމްބަރުންނަށް ރިޝްވަތު ދިނުމާއި ނުފޫޒު ފޯރުވުމުގެ ތުހުމަތު ކޮށްފަ އެވެ. އެ ތުހުމަތާ ގުޅިގެން މިދިޔަ ހޯމަދުވަހު ކުރެއްވި ޓްވީޓެއްގައި އޭނާ ވިދާޅުވީ، މެންބަރުންނަށް ރިޝްވަތު ދޭން އުޅުނު ކަމަށް ސަރުކާރުން ކުރާ ތުހުމަތުތަކަށް ކަނޑައެޅިގެން އިންކާރު ކުރައްވާ ކަމަށެވެ.
އަދި ވިދާޅުވީ ބިރު ދެއްކިޔަސް، މިހާރު ކުރައްވާ މަސައްކަތަށް އެއްވެސް ބަދަލެއް ނާންނާނެ ކަމަށެވެ.
ފާރިސްގެ މައްޗަށް އެކި ފަހަރު މަތިން ފުލުހުން ކުރަމުންދާ އެކިއެކި ބޮޑެތި ތުހުމަތުތަކާ ގުޅިގެން އޭނާގެ ޕާސްޕޯޓް ހިފަހައްޓައި ރާއްޖެ އިން ބޭރަށް ފުރުން މަނާކޮށްފައި އޮންނަތާ ވެސް ދުވަސްތަކެއް ވަނީ ވެފަ އެވެ.