ކުރީގެ ރައީސް މައުމޫން އަބްދުލްގައްޔޫމްގެ ދަރިކަލުން އަދި ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހުމަދު ފާރިސް މައުމޫނަށް ދައުވާ ކުރާ މައްސަލައިގެ ޝަރީއަތް މާދަމާ ފަށަން ކްރިމިނަލް ކޯޓުން ހަމަޖައްސައިފި އެވެ.
އިދިކޮޅު ކޯލިޝަންގައި ހިމެނިވަޑައިގަންނަވާ ފާރިސްގެ މައްޗަށް، ޝަހްސު އޮޅުވައިލުމުގެ ދައުވާ ކުރަނީ ޕީޕީއެމްގެ ދިދަ ގަވާއިދާ ޚިލާފަށް އޭނާ ބޭނުން ކުރެއްވި ކަމަށް ބުނެ އެވެ.
އެ މައްސަލައިގެ ލިޔުންތައް ފާރިސްއާ ކޯޓުން ކުރިން ހަވާލު ކޮށްފައިވާ އިރު އެ މައްސަލައިގެ ޝަރީއަތް ފަށަން ހަމަޖައްސާފައިވަނީ މާދަމާ ހެނދުނު 11:30 ގަ އެވެ.
ގާނޫނުލް އުގޫބާތުގެ 312 ވަނަ މާއްދާގެ ދަށުން ފާރިސަށް ކުރާ އެ ދައުވާ ސާބިތުވެއްޖެ ނަމަ އަދަބު ކަނޑައެޅުމުގެ އަސާސީ މިންގަނޑުން އޭނާ އަށް ދެވޭނެ އެންމެ ބޮޑު އަދަބަކީ ނުވަ މަހާއި 18 ދުވަހުގެ ޖަލު ހުކުމެކެވެ. ނަމަވެސް ބައެއް ހާލަތްތަކުގައި އެ އަދަބު އިތުރަށް ބޮޑުވުމުގެ ނުވަތަ އެ އަށް ވުރެ ކުޑަވުމުގެ ފުރުސަތު އޮވެ އެވެ. ފާރިސްއަށް ކޮށްފައިވާ ދައުވާގެ އެންމެ ބޮޑު އަދަބަކީ ދެ އަހަރު ދުވަހުގެ ޖަލު ހުކުމެކެވެ.
ގާނޫނުއަސާސީ ބުނާ ގޮތުން ރައްޔިތުންގެ މަޖިލިހުގެ މެމްބަރެއްގެ ގޮނޑި ގެއްލޭނީ އެއް އަހަރަށް ވުރެ ދިގު ހުކުމެއް އައިސްގެންނެވެ.
ޖަލު ހުކުމްތައް ޖޫރިމަނާއަށް ބަދަލުކުރުމުގެ ބާރު، އާ ގާނޫނުލް އުގޫބާތުން، ފަނޑިޔާރުންނަށް ލިބިގެންވެ އެވެ.
ކުރީގެ ރައީސް މައުމޫންގެ ވެރިކަމުގައި އޭރުގެ ރިއާސީ ގަނޑުވަރު ތީމުގޭގެ ބަޖެޓުން ގަވާއިދާ ޚިލާފަށް ކުރި ޚަރަދުތަކެއްގެ މައްސަލައިގައި ވެސް ފާރިސަށް ދައުވާ ކުރަން ފުލުހުން ޕްރޮސެކިއުޓާ ޖެނެރަލްގެ އޮފީހަށް ފޮނުވި އެވެ. އެކަމަކު އެ މައްސަލައިގައި ފާރިސަށް ދައުވާ ކުރެވެން ނެތް ކަމަށް ޕީޖީން ވަނީ ނިންމައިފަ އެވެ.