ފާރިސް ދައުވާ އަށް އިންކާރު ކުރައްވައިފި

ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު ފާރިސް މައުމޫން ޕީޕީއެމްގެ ދިދަ އާއި ލޯގޯ ގަވާއިދާ ޚިލާފަށް ބޭނުންކުރި ކަމަށް ބުނެ ފާރިސަށް ކުރާ ދައުވާ އަށް ކޯޓުގައި އޭނާ މިއަދު އިންކާރު ކުރައްވައިފި އެވެ.

ފާރިސް ޕީޕީއެމުން ވަކިކޮށްފައި ވަނިކޮށް މިދިޔަ މާޗް މަހުގެ ތެރޭގައި ބޭއްވި ޕްރެސް ކޮންފަރެންސެއްގައި، އެ ޕާޓީގެ ހުއްދަ ނެތި އެ ޕާޓީގެ ލޯގޯ އާއި ދިދަ ފާރިސް ބޭނުން ކުރި ކަމަށް ބުނެ އޭނާ އަށް ކުރާ ދައުވާގެ މިއަދު ބޭއްވި އިބްތިދާއީ އަޑުއެހުމުގައި ފާރިސް އެ ދައުވާ އަށް އިންކާރު ކުރެއްވިޔަސް އޭގެ ތަފްސީލަކަށް ވަޑައެއް ނުގަންނަވަ އެވެ.

ފާރިސް އެ ދައުވާ އަށް އިންކާރު ކުރެއްވުމުގެ ކުރިން ދައުލަތުން ވަނީ ފާރިސަށް ކުށް ސާބިތުވެއްޖެ ނަމަ އަންނާނެ އަދަބާއި އެއްބަސްވެއްޖެ ނަމަ ލިބޭނެ ލުއި އަދަބު ބަޔާންކޮށްދީފަ އެވެ. އަދި ފާރިސްގެ މައްޗަށް ކުށް ސާބިތުވިޔަސް އަސާސީ މިންގަނޑަށް ވުރެ އަދަބު ބޮޑުކުރަން ޖެހޭ ފަދަ ހާލަތެއް ނެތް ކަމަށް ދައުލަތުން ބުންޏެވެ.

މިއަދުގެ އަޑުއެހުމުގައި މައިގަނޑު ގޮތެއްގައި ކުރިއަށް ގެންދިޔައީ ފާރިސްގެ ފަރާތުން އެ މައްސަލައަށް ތައްޔާރުވާން ބޭނުންވާ ލިޔުންތައް ނުލިބޭ ކަމަށް ބުނެ ފާރިސްގެ ފަރާތުން ހުށަހެޅި ހުށަހެޅުންތަކާ މެދު ވާހަކަ ދެއްކުމެވެ. ފާރިސްގެ ވަކީލް މައުމޫން ހަމީދު ވިދާޅުވީ ޖިނާއީ އިޖްރައާތުގެ ގާނޫނުގެ ދަށުން ދައުލަތުން ފާރިސަށް ފޯރުކޮށްދޭން ޖެހޭ ހެކިތައް ނުލިބޭ ކަމަށެވެ.

އޭގެ ރައްދުގައި ދައުލަތުން ބުނީ ފާރިސްގެ ފަރާތުން އެދުނު ހެކިތަކުގެ ތެރެއިން ހެކިވެރިން ލިސްޓު ދޭން ދައުލަތުން ދެކޮޅު ހަދާ ކަމަށާއި ސަބަބަކީ ފާރިސާ ދެކޮޅަށް ދައުލަތުން ހުށަހަޅާ ހެކިތަކުގެ ތެރޭގައި ސިއްރު ދެ ހެކިވެރިއަކު ހިމެނޭތީ ކަމަށެވެ. އަދި ދެން ހުރި ހެކިތަކަކީ އެ މައްސަލައިގައި ދައުލަތުން ހުށަހަޅަން ގަސްދުކުރާ ހެކިތަކެއް ނޫން ކަމަށާއި ޖިނާއީ އިޖްރާއަތުގެ ގާނޫނުގައި އޮންނަ ގޮތުން މައްސަލާގައި ނުހިމެނޭ ހެކިތަކާއި ލިޔުންތަކަކީ ފޯރުކޮށްދޭން ޖެހޭ އެއްޗެއް ނޫން ކަމަށް ދައުލަތުން ބުންޏެވެ.

އެ މައްސަލާގައި ދެން ވެސް އޮންނާނީ އިބްތިދާއީ އަޑުއެހުމެކެވެ. އެ އަޑުއެހުން މިމަހުގެ 23 ވަނަ ދުވަހު ބާއްވާނެ ކަމަށް މައްސަލަ ބައްލަވާ ގާޒީ އިބްރާހިމް އަލީ ވިދާޅުވި އެވެ. އެ އަޑުއެހުމުގައި، ދައުވާ ކުރިއަށް ގެންދާނެތޯ ކަނޑައެޅުން ފަދަ ކަންކަން ކުރިއަށް ގެންދާނެ އެވެ.

ޝަރީއަތުގެ މަޖިލީހުގައި ދައުލަތުގެ ވަކީލުން ވަކި ޚާއްސަ ތަނެއްްގައި ބައިތިއްބާފައި ތިބޭތީ މައުމޫން އެކަމަށް ވަރަށް ބޮޑަށް ފާޑު ވިދާޅުވެ، ޝަކުވާ ކުރެއްވި އެވެ. މައުމޫން ވިދާޅުވީ ދައުލަތާއި ދައުވާލިބޭ ފަރާތަކީ ވެސް ޝަރީއަތުގެ ކުރިމަތީގައި ހަމަހަމަ ވެގެންވާ ބައެއް ކަމަށާއި ޝަރީއަތުގައި ތިބޭއިރު ވަކި ޚާއްސަ ތަނެއްގައި ދައުލަތުގެ ވަކީލުން ބައިތިއްބައިގެން ނުވާނެ ކަމަށެވެ. އަދި މިހާރު އިންސާފު ލިބޭނެ މަންޒަރު ނުފެންނަ ކަމަށް އޭނާ ވިދާޅުވި އެވެ.

"އިންސާފުގެ ދަރުބާރު މިއީ. މާ އަރިސް ގޮތަކަށް، ބޮޑުވަޒީރު އިންނަވާ ހެން ޕްރޮސެކިއުޓާ ޖެނެރަލްގެ ވަކީލު މި އިންނަވަނީ. މިއީ ކުރިން ކުރަމުން އައި ކަމެއް ނަމަވެސް ޖިނާއީ އިޖްރައާތުގެ ގާނޫނަށް ފަހު އެކަމެއް އެގޮތަކަށް ނުކުރެވޭނެ،" ގާޒީ އިންނަވާ ސްޓޭޖާ ކައިރީގައި ދައުލަތުގެ ވަކީލުން ތިއްބަވާތީ ފާޑު ވިދާޅުވެ، މައުމޫން ވިދާޅުވި އެވެ.

މައުމޫން އެގޮތަށް ވިދާޅުވިއިރު އެއީ ކްރިމިނަލް ކޯޓު ރޫމްތައް އަބަދުވެސް ހުންނަ ގޮތެވެ. ގާޒީ އިންނަވާ ސްޓޭޖުގެ ވާތް ފަރާތުގައި ދައުލަތުގެ ވަކީލުން ތިބޭއިރު ދައުވާލިބޭ ފަރާތާއި ދިފާއީ ވަކީލުން ތިބޭނީ ގާޒީގެ ކުރިމައްޗަށް ވާ ގޮތަށެވެ.

އެކަމާ ގުޅިގެން ގާޒީ އިބްރާހިމް ވިދާޅުވީ ޝަރީއަތް ހިނގަމުންދަނީ އެއްވެސް ފަރާތުގެ ނުފޫޒެއް އޮވެގެން ނޫން ކަމަށާއި ދައުލަތާއި ދައުވާލިބޭ ފަރާތްތަކަކީ ވެސް ޝަރީއަތުގެ ކުރިމަތީގައި ހަމަހަމަ ވެގެންވާ ކަމަށެވެ. އަދި މައުމޫން ކުރެއްވި ޝަކުވާއަކީ އިދާރީ ކަމަކާ ގުޅޭ ކަމަކަށްވާތީ އެކަމާ ބެހޭގޮތުން ކޯޓުގެ ކަމާބެހޭ ފަރާތްތަކާ މަޝްވަރާ ކުރައްވާނެ ކަމަށް ގާޒީ ވިދާޅުވި އެވެ.

ފާރިސްގެ މައްޗަށް އެ ކުށް ސާބިތުވެއްޖެ ނަމަ އަދަބު ކަނޑައެޅުމުގެ އަސާސީ މިންގަނޑުން ނުވަ މަހާއި 18 ދުވަހުގެ ޖަލު ހުކުމެއް ފާރިސަށް އަންނާނެ އެވެ. އެ ހުކުމާ އެކު ފާރިސްގެ މެމްބަރުކަމުގެ ގޮނޑި ނުގެއްލުނަސް ހުކުމުގެ މުއްދަތުގައި މަޖިލީހަކަށް ހާޒިރެއް ނުވެވޭނެ އެވެ.