ކޯޓު އަމުރެއްގެ ދަށުން މެންބަރު ވައްޑޭ ހައްޔަރު ކޮށްފި

ރައްޔިތުންގެ މަޖިލީހުގެ މެމްބަރުކަމުން ވަކި ވެފައިވާ ކަމަށް އިލެކްޝަންސް ކޮމިޝަނުން ކަނޑައަޅާފައިވާ، ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހީމް (ވައްޑޭ) ކޯޓު އަމުރެއްގެ ދަށުން މިރޭ ހައްޔަރު ކޮށްފި އެވެ.

މިރޭ 11:40 ހާއިރު ވައްޑޭ ހައްޔަރު ކުރީ، ޖުމްހޫރީ ޕާޓީގެ ހަރުގެ، މ. ކުނޫޒު ކުރިމަތީގައި މަޖިލީހުގެ އެހެން ބައެއް މެމްބަރުންނާ އެކު ހުންނަވަނިކޮށެވެ. ފުލުހުން ގޮސް ވައްޑެއާ ބައްދަލު ކުރުމަށް ފަހު، ކޯޓު އަމުރު އޭނާ އަށް ކިޔައިދިނުމަށް ފަހު ފުލުހުންގެ އުޅަނދަކަށް އަރުވައިގެން ގެންދިޔައީ އެވެ.

ކްރިމިނަލް ކޯޓުގެ ގާޒީ އަލީ އާދަމް ސޮއިކުރައްވައި މިރޭ 8:00 ގައި ނެރުއްވި އަމުރުގައި ވައްޑެ ހައްޔަރުކުރާ ސަބަބެއް ކަމަށް ބުނެފައި ވަނީ، ރައްޔިތުންގެ މަޖިލިހުގެ އިދާރާ ހިމެނޭ ސަރަހައްދު މިއަދު ބަންދުކޮށްފައި ވަނިކޮށް، މަޖިލިހުގެ މެމްބަރުން ނޫން ކަމަށް މަޖިލިހުން ކަނޑައަޅާފައިވާ ބަޔަކު، ފުލުހުންގެ ސަފުތައް ފަޅާލައި، މަޖިލިހުގެ އިދާރާގެ ތެރެއަށް ވަދެފައިވާ ކަމަށް ތުހުމަތު ކުރެވޭ މައްސަލައިގަ އެވެ. އަދި އެ މައްސަލާގައި ވައްޑެ ހައްޔަރު ނުކޮށް ބަހައްޓައިފި ނަމަ، އޭނާގެ ފަރާތުން މުޖުތަމައުގެ ސަލާމަތަށް ނުރައްކާ ވެދާނެތީ އާއި ހެއްކަށް ނުފޫޒު ފޯރަފާނެ ކަމަށް ފެންނާތީ ވައްޑެ ހައްޔަރު ކުރުމުގެ އަމުރު ނެރުނީ ކަމަށް އޭގައިވެ އެވެ.

ވައްޑެ ހައްޔަރުކުރުމާ ގުޅޭ ހެއްކެއް ކަމަށް އަމުރުގައި ވަނީ މަޖިލިހުގެ އިދާރާގެ ސިޓީ އާއި ކޮޕީ އެވެ.

މިއަދު މެންދުރު ފަހު މެންބަރުން މަޖިލީހަށް ވަދެ ތިއްބައި ފުލުހުންނާއި ސިފައިން މަޖިލީހަށް ވަދެ އެ މެމްބަރުން އެ ތަނުން ނެރުމަށް ފަހު، ވައްޑެ އާއި މަޑުއްވަރީ ދާއިރާގެ މުހައްމަދު އަމީތު ފުލުހުންގެ ބެލުމުގެ ދަށަށް ގެންގޮސް ބަޔާން ނަގާފައި ދޫކޮށްލި އެވެ.

ވައްޑެ މިރޭ ބުނި ގޮތުގައި މިއަދު މެންދުރު ފަހު ފުލުސް އޮފީހަށް ގެންގޮސް އޭނާގެ އަތުން ބަޔާނެއް ނެގީ، ފުލުހުން ބަންދު ކޮށްފައި އޮތް ސަރަހައްދަކަށް ވަން ކަމަށް ބުނެ އެވެ.

ވައްޑެ އަކީ މަޖިލިހުގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކަނޑައެޅި ހަ ބޭފުޅުންގެ ތެރޭގައި ހިމެނިވަޑައިގަންނަވާ ބޭފުޅެކެވެ. ނަމަވެސް އޭގެ ތެރެއިން ހަތަރު ބޭފުޅަކު ވަނީ އެ މައްސަލަ ބާތިލްކުރަން ސުޕްރީމް ކޯޓަށް ވަނީ މިދިޔަ ބުރާސްފަތި ދުވަހު ހުށަހަޅައިފަ އެވެ. އަދި އެ މައްސަލަ ސުޕްރީމް ކޯޓަށް ބަލައިގަތްކަން މިއަދު ވަނީ އަންގައިފަ އެވެ.

ސުޕްރީމް ކޯޓަށް މައްސަލަ ހުށަހެޅި ހަތަރު ބޭފުޅުންގެ ތެރޭގައި ވެސް ވައްޑެ ހިމެނިވަޑައިގަންނަވަ އެވެ. ދެން ތިއްބެވީ މަޑުއްވަރި ދާއިރާގެ މުހައްމަދު އަމީތާއި ވިލިނގިލި ދާއިރާގެ ސައުދު ހުސެއިން އަދި ދިއްދޫ ދާއިރާގެ އަބްދުއްލަތީފް މުހައްމަދެވެ.

ގޮނޑި ގެއްލުނު ކަމަށް އިލެކްޝަންސް ކޮމިޝަނުން ކަނޑައެޅި މެމްބަރުންގެ ތެރެއިން އަދި ސުޕްރީމް ކޯޓަށް ވަޑައިނުގަންނަވަނީ ދަނގެތި ދާއިރާގެ އިލްހާމް އަހުމަދާއި މައްޗަންގޮޅީ ދެކުނު ދާއިރާގެ އަބްދުﷲ ސިނާނެވެ. އެ ދެބޭފުޅުން އުޅުއްވަނީ ރާއްޖެ އިން ބޭރުގަ އެވެ.

ފުލުހުން މިއަދު މެންދުރު ފަހު ބުނި ގޮތުގައި ރައްޔިތުންގެ މަޖިލީހުގެ އިދާރާ އަށް ފުލުހުން ވަނީ މަޖިލީހުގެ މެންބަރުންގެ ތެރޭގައި ނުހިމެނޭ ބަޔަކު ވަދެ އުޅޭތީ އެ މީހުން ނެރުމުގެ އެހީތެރިވެދިނުމަށް ސިފައިން އެދުމުންނެވެ.