ރައްޔިތުން މަޖިލީހުގެ ތުުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހިމް (ލޯޔަރު ވައްޑެ)ގެ ބަންދަށް އިތުރު ހަތަރު ދުވަސް ކްރިމިނަލް ކޯޓުން މިއަދު ޖަހައިފި އެވެ.
ކުރިން ޖެހި 15 ދުވަސް ހަމަވުމުން، ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުވުމުން ވަނީ މައްސަލަ ތަހުގީގުކުރަން އިތުރަށް ހަތަރު ދުވަސް ދީފަ އެވެ.
ވައްޑެގެ ބަންދުގެ މުއްދަތު އިތުރުކުރި އިރު ކުރީގެ ބަންދާ މެދު ހައި ކޯޓުގައި ކުރި އިސްތިއުނާފުގެ އަޑުއެހުމެއް މާދަމާއަށް ވަނީ ތާވަލްކޮށްފަ އެވެ.
މިދިޔަ މަހުގެ 24 ގައި ވައްޑެ ހައްޔަރުކުރީ ރައްޔިތުންގެ މަޖިލީހުގެ މެމްބަރެއްގެ ގޮތުގައި ނުހިމެނޭ ބަޔަކު މަޖިލީހަށް ވެންނެވި ކަމަށް ބުނާ މައްސަލައިގަ އެވެ. އޭނާގެ ބަންދަށް 15 ދުވަސް އިތުރުކުރި މައްސަލަ ހައި ކޯޓުގައި އިސްތިއުނާފްކުރީ ޖުލައި 30 ގަ އެވެ.
ކްރިމިނަލް ކޯޓުގެ ގާޒީ އަލީ އާދަމް ސޮއިކުރައްވައި ނުރުއްވި އަމުރުގައި ވައްޑެ ހައްޔަރުކުރި ސަބަބެއް ކަމަށް ބުނެފައިވަނީ، ރައްޔިތުންގެ މަޖިލީހުގެ އިދާރާ ހިމެނޭ ސަރަހައްދު ބަންދުކޮށްފައި ވަނިކޮށް، މަޖިލީހުގެ މެމްބަރުން ނޫން ކަމަށް މަޖިލީހުން ކަނޑައަޅާފައިވާ ބަޔަކު، ފުލުހުންގެ ސަފުތައް ފަޅާލައި، މަޖިލީހުގެ އިދާރާގެ ތެރެއަށް ވަދެފައިވާ ކަމަށް ތުހުމަތުކުރެވޭ މައްސަލައިގައި ކަމަށެވެ.
އެ މައްސަލާގައި ވައްޑެ ހައްޔަރުނުކޮށް ބަހައްޓައިފި ނަަމަ، އޭނާގެ ފަރާތުން މުޖުތަމައުގެ ސަލާމަތަށް ނުރައްކާ ވެދާނެތީ އާއި ހެއްކަށް ނުފޫޒު ފޯރަފާނެ ކަމަށް ފެންނާތީ ވަހީދު ހައްޔަރުކުރުމުގެ އަމުރު ނެރުނީ ކަމަށް އަމުރުގައި ވެ އެވެ.
ވައްޑެ އަކީ މަޖިލީހުގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަން (އީސީ) އިން ކަނޑައެޅި ހަ މެމްބަރުންގެ ތެރެއިން އެއް މެމްބަރެވެ. އެ މައްސަލަ ސުޕްރީމް ކޯޓަށް ހުށަހަޅައ، ފުރަތަމަ އަޑުއެހުން ވަނީ އިއްޔެ ބާއްވައިފަ އެވެ.