ރައްޔިތުންގެ މަޖިލީހުގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކަނޑައަޅާފައި ވަނިކޮށް، މަޖިލިހުގެ އިދާރާ އަށް ވަން މައްސަލާގައި ހައްޔަރުކޮށްފައިވާ ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހީމް (ލޯޔަރު ވައްޑެ) ގެ ބަންދަށް ކްރިމިނަލް ކޯޓުން އަނެއްކާވެސް އިތުރު ހަތަރު ދުވަސް ޖަހައިފި އެވެ.
ގާނޫނީ ވަކީލު ވައްޑެގެ ބަންދަށް އަނެއްކާވެސް ހަތަރު ދުވަސް ޖެހީ، އޭނާގެ ބަންދުގެ ދެވަނަ އަމުރުގެ މުއްދަތު މިއަދަށް ހަމަވާތީ، ކޯޓަށް ހާޒިރު ކުރުމުންނެވެ. ވައްޑެ އިތުރު ހަތަރު ދުވަހަށް ބަންދު ކުރުމަށް އަމުރުކޮށް، އަދި ވައްޑެގެ މައްޗަށް ދައުވާ ކުރުމާ މެދު ޕްރޮސެކިއުޓަ ޖެނެރަލް އޭގެ ކުރިން ގޮތެއް ނިންމުމަށް ވެސް ފަނޑިޔާރު އެންގެވި ކަމަށް ވައްޑެގެ ވަކީލުން ވިދާޅުވެ އެވެ.
އިދިކޮޅު ހަރަކާތުގެ މައި ޖަގަހަ، މ. ކުނޫޒްގައި ހުންނަވަނިކޮށް، މިދިޔަ މަހުގެ 24 ވަނަ ދުވަހުގެ ރޭ ހައްޔަރުކޮށް، ވައްޑެ ބަންދުގައި ބަހައްޓަން ކޯޓުން ފުރަތަމަ ދިނީ 15 ދުވަހެވެ. އެ މުއްދަތު ހަމަވާތީ މިދިޔަ ބުދަ ދުވަހު ކޯޓަށް ހާޒިރުކުރުމުން އަނެއްކާވެސް އިތުރު ހަތަރު ދުވަހު ބަންދުގައި ބަހައްޓަން ފަނޑިޔާރު އަމުރު ކުރެއްވި އެވެ.
މަޖިލިހުގެ ގޮނޑި ގެއްލިފައިވަނިކޮށް، މަޖިލިހުގެ އިދާރާ އަށް ވަން މައްސަލާގައި ވައްޑެގެ އިތުރުން މަޑުއްވަރީ ދާއިރާގެ މެމްބަރު މުހައްމަދު އަމީތާއި ވިލިނގިލީ ދާއިރާގެ މެމްބަރު ސައުދު ހުސެއިން ވެސް ވަނީ ހައްޔަރުކޮށްފަ އެވެ. އެ ދެ ބޭފުޅުން ބަންދުގައި ބައިތިއްބަން ވެސް ކްރިމިނަލް ކޯޓުން ފުރަތަމަ އަމުރުކުރީ 15 ދުވަހަށެވެ. އެ މުއްދަތު އިއްޔެ އަށް ހަމަވާތީ، ކޯޓަށް ގެންދިއުމުން ވަނީ އަނެއްކާ ވެސް ބަންދަށް ހަތަރު ދުވަސް ޖަހައިފަ އެވެ. އެކަމަކު އަމީތާއި ސައުދުގެ މައްސަލައިގެ ތަހުގީގު ހަތަރު ދުވަސް ތެރޭގައި ނިންމައި ޕްރޮސެކިއުޓަ ޖެނެރަލްގެ އޮފީހަށް ފޮނުވުމަށް ފަނޑިޔާރު އާދަމް އާރިފް އިއްޔެ އަމުރުކުރި ކަމަށް ވަކީލުން ވިދާޅުވެފައިވެ އެވެ.