ރައްޔިތުންގެ މަޖިލީހުގެ އިދިކޮޅު މެމްބަރުންތަކެއްގެ ގޮނޑި ގެއްލިއްޖެ ކަމަަށް ކަނޑައަޅައި ބައި އިލެކްޝަންސް އަށް އިއުލާންކުރަން އިލެކްޝަންސް ކޮމިޝަން (އީސީ) އިން ބަޔާން ނެރުނީ އެ ކޮމިޝަނުގެ އެއްވެސް މެމްބަރަކު ޒިންމާ ނުނަންގަވާ ގޮތަށް ކަމަށް ގަލޮޅު ދެކުނު ދާއިރާގެ މެމްބަރު އަހްމަދު މަހްލޫފް ރޭ ވިދާޅުވެއްޖެ އެވެ.
ރައްޔިތުންގެ މަޖިލިހުގެ ރައީސް އަބްދުﷲ މަސީހުގެ އިތުބާރު ނެތްކަމުގެ މައްސަލާގައި ސޮއިކުރެއްވި ޕީޕީއެމްގެ 10 މެމްބަރުންގެ ތެރެއިން ދިއްދޫ ދާއިރާގެ އަބްދުއްލަތީފް މުހައްމަދާއި ދިއްގަރު ދާއިރާގެ މުހައްމަދު އަމީތާއި ތުލުސްދޫ ދާއިރާގެ މުހައްމަދު ވަހީދު (ވައްޑެ) އަދި ވިލިނގިލީ ދާއިރާގެ ސައުދު ހުސެއިންގެ ގޮނޑި ގެއްލިއްޖެ ކަމަށް ނިންމައި، އިލެކްޝަންސް ކޮމިޝަނުން ވަނީ އިއުލާންކޮށްފަ އެވެ.
އިދިކޮޅު ޕާޓީތަކުގެ ޕާލަމެންޓްރީ ގްރޫޕުން ކުނޫޒްގައި ބޭއްވި ޕްރެސް ކޮންފަރެންސްގައި މަހްލޫފް ވިދާޅުވީ މަޖިލީހުގެ މެމްބަރުންތަކެއް ވަކިވެފައިވާ ކަމަށް އިލެކްޝަންސް ކޮމިޝަނުން ބަޔާން ނެރުނީ މަސީހުގެ ވޯޓަށް ހުރަސްއަޅަން، ސަރުކާރުން އަންގައިގެން ރައްޔިތުންނަށް އޮޅުވާލަން ކަމަށެވެ. ކޮމިޝަންގެ ނިންމުން ކަމަށް ބުނެ ނެރުނު ބަޔާނުގައި ކޮމިޝަންގެ އެއްވެސް މެމްބަރަކު ސޮއި ކުރައްވާފައި ނުވާ ކަން މަހްލޫފް ފާހަގަކުރެއްވި އެވެ.
"މެމްބަރުންގެ ގޮނޑިއާ ގުޅޭގޮތުން ނެރުނު ބަޔާނުގައި ސޮއެއް ނެތް. ހަމައެކަނި ސްޓޭމްޕް ޖަހާފައި ނެރުނީ. އެ ބަޔާން އޮތީ އިލެކްޝަންސް އިން އާއްމުކޮށް ނެރޭ ބަޔާންތަކާ ވެސް ޚިލާފަށް، އެހެން ފޯމެޓެއްގައި. އެއީ އެއްވެސް މެމްބަރަކު ފަހުން ތިމަންނައޭ ސޮއިކޮށްފައި އޮތީ އެނގެން ބޭނުން ނުވާ ކަހަލަ ގޮތަކަށް ކޮށްފައި އޮތް ކަމެއް،" އޭނާ ވިދާޅުވި އެވެ.
މަހްލޫފް ވިދާޅުވި ގޮތުގައި މެމްބަރުންތަކެއްގެ ގޮނޑި ގެއްލުނު ކަން އީސީ އާއި ރައްޔިތުންގެ މަޖިލީހުން ވެސް މިހާތަނަށް އެ މެމްބަރުންނަށް އަންގާފައެއް ނުވެ އެވެ. މަޖިލީހުން މެމްބަރުންނަށް އަންގާ ރަސްމީ އެންގުންތައް މިހާރު ވެސް އެ މެމްބަރުންނަށް ލިބިވަޑައިގަންނަވާ ކަމަށް އޭނާ ވިދާޅުވި އެވެ.
"މަޖިލީހުގެ ޖަލްސާ 31 ގައި އޮންނާނެ ކަމަށް މެމްބަރުންނަށް ކުރި މެސެޖް ވެސް އެ މެމްބަރުންނަށް ލިބުނު،" މަހްލޫފް ވިދާޅުވި އެވެ.
ގާނޫނުއަސާސީ ބުނާ ގޮތުން ރައްޔިތުންގެ މަޖިލިހުގެ މެމްބަރެއްގެ ގޮނޑި ގެއްލިޖެ ކަމާ މެދު ޝައްކު އުފެދިއްޖެ ނަމަ އެއާ މެދު ގޮތެއް ނިންމާނީ ސުޕްރީމް ކޯޓުންނެވެ. އެހެންވެ އީސީގެ ނިންމުން، ހަތަރު މެމްބަރުން ސުޕްރީމް ކޯޓަށް ހުށަހެޅުމުން، އެ ކޯޓުން ވަނީ މައްސަލަ ބަލައިގެންފަ އެވެ. ހަތަރު މެމްބަރުންނަށް ސުޕްރީމް ކޯޓުން ފޮނުވި ލިޔުމުގައި ބުނެފައި ވަނީ މައްސަލަ ހުށަހަޅާފައި ވަނީ ސުޕްރީމް ކޯޓުގެ ގަވައިދާ އެއްގޮތްވާ ގޮތުގެ މަތިން ކަމަށް ފަނޑިޔާރުން ނިންމަވާފައި ވާތީ، މި މައްސަލަ ސުޕްރީމް ކޯޓަށް ހުށަހެޅުމުގެ ހުއްދަ ދީފައިވާ ކަމަށާއި ތިން ދުވަހުގެ ތެރޭގައި މައްސަލަ ރަޖިސްޓްރީ ކުރަން ޖެހޭނެ ކަމަށެވެ.