މިއަހަރުގެ މިނިވަން ދުވަހުގެ ރަސްމީ ކުޅިވަރުތައް ގަލޮޅު ދަނޑުގައި މިރޭ ބާއްވައިފި އެވެ.
ޕާކިސްތާނުގެ ބޮޑުވަޒީރު ނަވާޒް ޝަރީފް ޝަރަފްކޮށްދެއްވި ރަސްމިއްޔާތުގައި ރައީސް އަބްދުﷲ ޔާމީނާއި ކެބިނެޓްގެ މިނިސްޓަރުން ބައިވެރިވެވަޑައިގެންނެވި އެވެ.
މި ކުޅިވަރުތައް ބަލަން ދަނޑަށް ވަނުމުގެ ފުރުސަތު އާއްމުކޮށް ހުޅުވައެއް ނުލަ އެވެ. އަދި އެހެން އަހަރުތަކުގައި ބާއްވާ ފުޅަނދު ބުރެއް މި ފަހަރު ނުބާއްވަ އެވެ.
ރާއްޖޭގެ 52 ވަނަ މިނިވަން ދުވަސް ފާހަގަކުރުމަށް ބޭއްވި ރަސްމިއްޔާތު ފެށުމުގެ ގޮތުން އޮތީ ރައީސަށް ރިޔާސީ ކުރުނީހެއް އެރުވުމެވެ. އޭގެ ފަހުން ސިފައިންނާއި ސްކޫލްތަކުގެ އެއްކޮށްލެވިފައިވާ ބޭންޑްގައި ގައުމީ ސަލާން ކުޅެ، ސިފައިންގެ ލަޝްކަރީންނާ އެކު ސްކޫލްތަކުގެ އެއްކޮށްލެވިފައިވާ ހެވިކަމުގެ ލަޝްކަރުގެ ޝަރަފުގެ ހިނގާލުން އޮތެވެ.
ޕާކިސްތާނުގެ ބޮޑުވަޒީރުގެ ދެކަނބަލުންނަށް މަރުހަބާ ދެންނެވުމުގެ ގޮތުން ރާއްޖޭގެ ބައެއް ފަންނާނުން ހާއްސަ ލަވައެއް މި ހަފުލާގައި ވަނީ ހުށަހަޅައިދީފައެވެ. މިރޭ ހުށަހަޅައިދިން ކުޅިވަރުގެ ޕްރޮގްރާމްތަކުގައި މާފަންނު މަދުރަސާ، ކަލާފާނު ސްކޫލް، އަމީނިއްޔާ ސްކޫލް، ހިރިޔާ ސްކޫލް، އަހްމަދިއްޔާ އިންޓަނޭޝަނަލް ސްކޫލް، ތާޖުއްދީން ސްކޫލް އަދި މޯލްޑިވްސް ނޭޝަނަލް ޑިފެންސް ފޯސް ބައިވެރިވި އެވެ.
މިއަހަރުގެ ކުޅިވަރުތަކުގައި ހަ ސްކޫލަކުންނާއި ސިފައިން އަދި ނެޝަނަލް ސެންޓަ ފޯ ދި އާޓްސް (އެންސީއޭ)ގެ އެކި ހަރަކާތްތައް ބޭއްވިއިރު ވޭތުވެ ދިޔަ ދެ އަހަރާ ހިލާފަށް މި ފަހަރު ކޮންމެ ސްކޫލަކުން ވެސް ވަކިން އައިޓަމެއް ހުށަހަޅައިދީފައިވެ އެވެ. ކުރިން ކުޅިވަރުތައް ކުޅުނީ ސްކޫލުތައް އެއްކޮށްލައިގެންނެވެ. މިއަހަރުގެ މިނިވަން ދުވަހުގެ މުނާސަބަތުގައި ސްކޫލުތަކުން ނެށުންތައް ހުށަހަޅައިދިނީ މިނިސްޓްރީން ކަނޑައަޅާފައިވާ ތީމުތަކަކަށެވެ. ސްކޫލްތަކުގެ ކުޅިވަރުތަކުގެ އިތުރުން އެމްއެންޑީއެފްގެ ހާއްސަ ޑްރިލްއެއް ވެސް، އެހެން އަހަރުތަކެކޭ އެއްގޮތަށް މިރޭ ވެސް ބޭއްވި އެވެ.
މި އަހަރުގެ މިނިވަން ދުވަހުގެ ހަރަކާތުގައި ފުޅަނދު ބުރު ނެތަސް، މާދަމާ ހަވީރު މާލޭގެ މަގުތަކުގައި ކެޑޭޓުންގެ ރޫޓު މާޗު އޮންނާނެ އެވެ. އަދި އޭގެ އަނެއް ދުވަހު ހުޅުމާލޭގައި ސިފައިންގެ ރޫޓު މާޗު ވެސް އޮންނާނެ އެވެ.