ކޮންމެ އަހަރަކު ވެސް ދައުލަތުން ސިޔާސީ ޕާޓީތަކަށް ދޭންޖެހޭ ފައިސާ، އެމްޑީޕީ އަށް އިލެކްޝަންސް ކޮމިޝަން (އީސީ) އިން ނުދޭތީ، އަންނަ ހުކުރު ދުވަހު ބާއްވަން ހަމަޖެއްސި އެ ޕާޓީގެ ކޮންގްރެސް ފަސްކުރަން ގައުމީ މަޖިލީހުން ރޭ ނިންމައިފި އެވެ.
އެމްޑީޕީގެ ގައުމީ މަޖިލީހަށް އެ ޕާޓީގެ ނައިބު ރައީސް މުހައްމަދު ޝިފާޒު ހުށަހެޅުއްވި ގަރާރުގައި ވިދާޅުވީ އީސީން ދޭންޖެހޭ ފައިސާ ނުދީ ހިފަހައްޓާފައިވާތީ ދަތިތަކާ ކުރިމަތިވާ ކަމަށެވެ. އެހެންކަމުން އެކަމަށް ޚާއްސަ ފަންޑެއް ހުޅުވައިި، ބޭނުންވާ ވަރަށް ފައިސާ ލިބުމުން ކޮންގްރެސް ބޭއްވުމަށް ޝިފާޒު ހުށަހެޅުއްވި ގަރާރުގައި ވިދާޅުވެފައި ވެ އެވެ.
ރާއްޖޭގެ އެކި ސަރަހައްދުތަކުން ހާހެއްހާ މީހުން ކޮންގްރެސްގައި ބައިވެރިވާނެ ކަމަށް އެމްޑީޕީން ބުންޏެވެ. އަދި އެކަމަށް ބޮޑު ޚަރަދެއް ހިނގާތީ، ކޮންގްރެސް ބާއްވަން ފައިސާ ލިބުމުން ތާރީޚެއް އިއުލާން ކުރުމަށް ގަރާރުގައި ވެ އެވެ.
ރޭގެ ޖަލްސާގެ ރިޔާސަތު ބަލަހައްޓައި ވާހަކަ ދައްކަވަމުން އެމްޑީޕީގެ ޗެއާޕާސަން ހަސަން ލަތީފު ވިދާޅުވީ ކޮންގްރެސް ބޭއްވުމަށް ވާންޖެހޭ ވަރަށް ގިނަ ތައްޔާރީތައް ވެފައިވާ ކަމަށެވެ. އޭގެ ތެރޭގައި ޕާޓީގެ އަސާސީ ގަވާއިދަށް ގެންނަންޖެހޭ ބަދަލުތައް ދިރާސާކުރަމުން ގެންދިއުން ހިމެނެ އެވެ.
ހަސަން ވިދާޅުވިގޮތުގައި ކޮންގްރެސް އަށް 2.8 މިލިއަން ރުފިޔާގެ ބަޖެޓެއް ކަނޑައަޅާފައިވާއިރު 1،123 މީހުން ބައިވެރިވާނެ އެވެ.
އެމްޑީޕީގެ ކޮންގްރެސް އަންނަ ހުކުރު ދުވަހުން ބާއްވަން ކުރިން ނިންމީ އީސީން ފައިސާ ދޭނެ ކަމުގެ ޔަގީންކަން ސަރުކާރުން ދީފައި ވުމާއި އެއީ އެ ޕާޓީ އަށް ލިބެންޖެހޭ ފައިސާއަކަށް ވާތީ ކަމަށް އޭނާ ވިދާޅުވި އެވެ.
"ސެޕްޓެމްބަރު 15 ގައި ކޮންގްރެސް ބޭއްވުމަށް މި ގައުމީ މަޖިލީހުން ފާސްކުރިއިރު، ފިނޭންސް މިނިސްޓްރީން ވަނީ ބޭންކް އޮފް މޯލްޑިވްސް އަށް އެ ފައިސާ ފޮނުވާފައިވާ ކަމުގެ މައުލޫމާތު ވެސް ދީފައި،" ހަސަން ވިދާޅުވި އެވެ.
ކޮންގްރެސް ފަސްކުރުމުގެ ގަރާރަށް ޚިޔާލު ހުށަހަޅަމުން ބައެއް ބޭފުޅުން ވަނީ، ކޮންގްރެސް ބޭއްވުމަށް ވަަރަށް ގިނަ މަސައްކަތްތަކެއް ކޮށްފައިވާ ކަމަށާއި އެެހެންކަމުން އެ ޖަލްސާ ބޭއްވޭނެ އިތުރު ގޮތެއް ހޯދައިދިނުމަށް އެދިފަ އެވެ.
އީސީން ދޭން ޖެހޭ ފައިސާ ނުދީ ހިފަހައްޓާފައި ވީ ކަމުގައި ވިޔަސް، އެމްޑީޕީން އަމިއްލަ އަށް ފަންޑު ހޯދައިގެން ވީހާ ވެސް އަވަހަކަށް ކޮންގްރެސް ބާއްވައިދިނުމަށް ގައުމީ މަޖިލީހުގެ ބައެއް މެމްބަރުން ވަނީ އެދިފަ އެވެ.
