ކޮންގްރެސް ބާއްވަން އެމްޑީޕީން ފައިސާ ހޯދަން ފަށައިފި

އެމްޑީޕީގެ ކޮންގްރެސް ބާއްވަން ފައިސާ ހޯދުމުގެ މަސައްކަތް އެ ޕާޓީން ފަށައިފި އެވެ.

އެމްޑީޕީ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ޗެއާޕާސަން ހަސަން ލަތީފް ވިދާޅުވީ ކޮންގްރެސް ބޭއްވުމަށް ގިނަ މަސައްކަތްތަކެއް ކޮށްފައި ވާނެ ކަމަށެވެ. އެކަމަކު، ސަރުކާރުން ދޭންޖެހޭ ފައިސާ ނުދީ ލަސް ކުރާތީ ކޮންގްރެސް ފަސްކުރަން ޖެހުނީ ކަމަށް އޭނާ ވިދާޅުވި އެވެ.

އެމްޑީޕީން ކުރިން ނިންމާފައި އޮތީ މިދިޔަ މަހުގެ ކުރީކޮޅު ކޮންގްރެސް ބޭއްވުމަށެވެ. އެކަމަކު ޕާޓީގެ ގައުމީ މަޖިލީހުން މިހާރު ނިންމާފައި ވަނީ ކޮންގްރެސް ބާއްވަން ފަންޑެއް ހުޅުވުމަށެވެ. އަދި ކޮންގްރެސް ބާއްވަން ބޭނުންވާ ފައިސާ ލިބުމާ އެކު ކޮންގްރެސް ބާއްވާނެ ތާރީހެއް ކަނޑައެޅުމަށެވެ.

"ފަންޑަށް ފައިސާ ހޯދުމުގެ މަސައްކަތް ފަށައިފިން. ނަމަވެސް އެއީކީ އަދި ހުޅުވާލެވިގެން ފަންޑު ފޮއްޓެއްގެ ގޮތަށް ކުރާ މަސައްކަތެއް ނޫން. ފަންޑު ރެއިޒިންގެ ބައެއް މަސައްކަތްތައް ފަށައިފިން،" އޭނާ ވިދާޅުވި އެވެ.

ހަސަން ވިދާޅުވި ގޮތުގައި ސަރުކާރުން އެމްޑީޕީއަށް ދޭންޖެހޭ ފައިސާ ހޯދުމުގެ މަސައްކަތް އަންނަނީ ކުރަމުންނެވެ. އަދި އެކަމުގައި އަޅަންޖެހޭ ފިޔަވަޅުތައް އަޅާނެ ކަމަށާއި އެމްޑީޕީ މިހާރު ވެސް ހިންގަނީ ހެޔޮ އެދޭ ފަރާތްތަކުގެ އެހީގައި ކަމަށް ވެސް ހަސަން ވިދާޅުވި އެވެ.

އެމްޑީޕީން ކުރިން ބުނި ގޮތުގައި ކޮންގްރެސް އަށް 2.8 މިލިއަން ރުފިޔާގެ ބަޖެޓެއް ކަނޑައަޅާފައިވާއިރު 1،123 މީހުން ބައިވެރިވާނެ އެވެ.

މި އަހަރަށް ފާސްކުރި 27 ބިލިއަން ރުފިޔާގެ ބަޖެޓުން 0.1-0.2 ޕަސެންޓް (ގާތްގަނޑަކަށް 27 މިލިއަން ރުފިޔާ) ވަނީ ސިޔާސީ ޕާޓީތަކަށް ކަނޑައަޅައިފަ އެވެ.

ސިޔާސީ ޕާޓީތަކުގެ ގާނޫނުގައިވާ ގޮތުން މެމްބަރުންގެ އަދަދު 10،000 އަށް އަރާ ޕާޓީތަކަށް، އަހަރުގެ ފުރަތަމަ ތިން މަސް ދުވަހުގެ ތެރޭގައި އިލެކްޝަންސް ކޮމިޝަން (އީސީ) އިން ފައިސާ ޖަމާކޮށްދޭން ޖެހެ އެވެ. އެކަމަކު މި އަހަރު ނިމެން ދެ މަހަށް ވެފައިވާއިރު ވެސް ޕާޓީތަކަށް ފައިސާ ދުލެއް ނުކުރެ އެވެ. އެ ފައިސާ ނުދީ ހިފަހައްޓާ ސަބަބާ ގުޅޭ ގޮތުން ފިނޭންސުން ވާހަކައެއް ނުދައްކަ އެވެ.

Party thakah kanda elhi faisaa ah vee gotheh neyngey!

The most trusted news source in the Maldives

Mihaaru