ސުޕްރީމް ކޯޓަށް ހުށަހަޅަން އުޅުނު ޕެޓިޝަނަކާ ގުޅިގެން ގިނަ އަދަދެއްގެ ވަކީލުން ސަސްޕެންޑް ކުރި މައްސަލާގައި އިދިކޮޅު ޕާޓީތައް ގުޅިގެން ނެރުނު ބަޔާނުގައި ވެރިކަން ކުރާ ޕީޕީއެމްގެ ނަން ހިމަނާފައިވާތީ ފިޔަވަޅު އަޅާނެ ކަމުގެ އިންޒާރުު މިއަދު އެ ޕާޓީން ދީފި އެވެ.
އިދިކޮޅު ޕާޓީތައް ގުޅިގެން ކަމަށް ބުނެ ނެރުނު ބަޔާނުގައި ޕީޕީއެމްގެ ނަން ހިމަނާފައިވާތީވެ، ނަން ނަގައިދިނުމަށް އެދި އެ ޕާޓީން ވަނީ ކުރީގެ ރައީސް މައުމޫން އަބްދުލްގައްޔޫމާއި އެމްޑީޕީ އާއި ޖުމްހޫރީ ޕާޓީގެ އިތުރުން އަދާލާތު ޕާޓީއަށް ސިޓީއަކުން އަންގައިފަ އެވެ. އެ ސިޓީގައި އެދިފައި ވަނީ މިއަދު 3:00ގެ ކުރިން ނަން އަނބުރާ ނަގައިދިނުމަށެވެ.
ބަޔާނުގައި ޕީޕީއެމްގެ ނަން ބޭނުންކުރި މައްސަަލަ ބަލައި ދިނުމަށް އެދި ޕީޕީއެމުން ވަނީ އިލެކްޝަންސް ކޮމިޝަނަށް ވެސް ހުށަހަޅައިފަ އެވެ.
ޕީޕީއެމް އޮފީހުގައި ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ނައިބު ރައީސް އަދި ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ވިދާޅުވީ މިއަދު ތިނެއް ޖެހުމާ ހަމައަށް ނަން ބަޔާނުން ނުނަގައިފިނަމަ، ގާނޫނީ ގޮތުން ކުރަން ހުރި ކަންކަން ކުރާނެ ކަމަށެވެ.
އަބްދުއްރަހީމް ވިދާޅުވި ގޮތުގައި ބަޔާނުގައި ޕީޕީއެމްގެ ނަން ބޭނުންކޮށްފައި އޮތީ މައުމޫން އިދިކޮޅު ޕާޓީތަކާ ގުޅިވަޑައިގެން މަސައްކަތް ކުރައްވާތީ ކަމަށް ވެދާނެ އެވެ.
ޕީޕީއެމްގެ ރައީސްކަން މައުމޫން، ކުރިން ކުރެއްވުމަކީ "އުމުރަށް" އެ ޕާޓީގެ ނަން ބޭނުން ކުރެއްވުމަށް އެމަނިކުފާނަށް ލިބޭ ހައިސިއްޔަތެއް ނޫން ކަމަށް އޭނާ ވިދާޅުވި އެވެ. މައުމޫނަކީ މިހާރު ޕީޕީއެމްގެ ދަފްތަރުގައި ވެސް ހިމެނިވަޑައިގަންނަވާ ބޭފުޅެއް ނޫން ކަމަށް އޭނާ ވިދާޅުވި އެވެ.
"ޕާޓީގެ ނަން ބޭނުން ކުރެއްވުމުގެ ހައިސިއްޔަތެއް (މައުމޫނަށް) ނޯންނާނެ،" އަބްދުއްރަހީމް ވިދާޅުވި އެވެ.
އަބްދުއްރަހީމް ވިދާޅުވި ގޮތުގައި ޕީޕީއެމުން މައުމޫން ވަކި ކުރެއްވީ ޕާޓީގެ އަސާސީ ގަވާއިދާ އެއްގޮތަށެވެ. ކޮންމެ ޕާޓީއެއްގެ އުސޫލުތަކެއް އޮންނައިރު، ކަންކަން ހިނގަމުން ދަނީ އުސޫލުތަކާ އެއްގޮތްވާ ގޮތުގެ މަތިން ކަމަށް ވެސް އަބްދުއްރަހީމް ވިދާޅުވި އެވެ.
ޕީޕީއެމްގެ ނަން ބޭނުންކުރުމުން ފިިޔަވަޅު އަޅާނެ ކަމުގެ އިންޒާރުދިންއިރު، މައުމޫންގެ ދަރިކަލުން ދިއްގަރު ދާއިރާގެ މެމްބަރު އަހްމަދު ފާރިސް މައުމޫންގެ މައްޗަށް ވަނީ މިފަދަ މައްސަލައެއްގައި ޝަޚުސް އޮޅުވާލުމުގެ ދައުވާކޮށްފަ އެވެ. އެއީ، ޕީޕީއެމްގެ ދިދަ އާއި ލޯގޯ ހުއްދަ ނެތި ބޭނުންކުރި ކަމަށް ބުނެ އެވެ.
