ކުރީގެ ރައީސް މައުމޫން އަބްދުލްގައްޔޫމް ސިޔާސީ އިދިކޮޅު ފަރާތްތަކާ ރޭ އެއާޕޯޓްގައި ބައްދަލުކުރެއްވި ފޮޓޯތަކާ އެކު ސަރުކާރުގެ ސަޕޯޓަރުންގެ ފާޑުކިއުން އޮއްސާލި އެވެ.
މިއީ، ގައުމު އިސްލާހުކުރަން މައުމޫނާއި ކުރީގެ ރައީސް މުހައްމަދު ނަޝީދާއި ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ އިތުރުން އަދާލަތު ޕާޓީގެ ރައީސް އިމްރާން އަބްދުﷲ އެއްބަސްވުމެއްގައި ސޮއިކުރެއްވި ފަހުން، އިދިކޮޅު ފަރާތްތަކާ އެކު މައުމޫން ފެނުނު ފުރަތަމަ ފަހަރެވެ.
އާއިލީ ބޭނުންފުޅެއްގައި ބޭރުގައި ތިން މަހެއްހާ ދުވަހު އުޅުއްވުމަށް ފަހު، މައުމޫން މާލެ ވަޑައިގެންނެވިއިރު އިދިކޮޅު އިއްތިހާދުގެ އިސް ބޭފުޅުން އެމަނިކުފާނަށް މަރުހަބާ ދަންނަވަން އެއާޕޯޓުގައި ތިއްބެވި އެވެ. އެ ފޮޓޯ ފެނިވަޑައިގަތުމުން، ފޮނަދޫ ދާއިރާގެ މެމްބަރު އަދި ޕީޕީއެމްގެ ނައިބު ރައީސް އަބްދުއްރަހީމަށް އިހްސާސްތައް ކޮންޓްރޯލެއް ނުކުރެއްވުނެވެ.
އެ ފޮޓޯ ޓުވީޓް ކުރައްވައި ވިދާޅުވީ "ލަނޑަޔާ ވާނީ ހަމަ ލަނޑަޔާ"އަށް ކަމަށެވެ. އެއީ، ގައުމު އިސްލާހުކުރުމުގެ ނަމުގައި އަމިއްލަ އެދުމުގެ އިންތިހާ ކަމަށް ސިފަކުރެއްވި އެވެ.
އޭނާގެ މި ޓުވީޓާ އެކު މައުމޫންގެ ސަޕޯޓަރުންގެ ރުޅި ފަޅައިގެން ގޮސް އޭނާ އަށް އެއްޗެހި ގޮވައި ފަތިވަރެއް އަމުނާލީ އެވެ. އަބްދުއްރަހީމަށް ފާޑުކީ މީހުން ބުނާ ގޮތުގައި، ގައުމު އިސްލާހުކުރައްވަން މައުމޫން ކުރައްވާ މަސައްކަތްޕުޅަށް ފާޑުވިދާޅުވާން އަބްދުއްރަހީމް "ލަދުގަންނަން ޖެހޭ"ނެ އެވެ. އެއް ސަބަބެއްގެ ގޮތުގައި ބައެއް މީހުން ބުނެފައި ވަނީ، މަޖިލީހުގެ ފޮނަދޫ ދާއިރާގެ ގޮނޑި އަށް އޭނާ ހޮވިވަޑައިގަތީ ވެސް މައުމޫންގެ ފޮޓޯ މޭ މަތީގައި ޖައްސަަވައި ކެމްޕޭންކުރެއްވުމުން ކަމަށެވެ.
އަބްދުއްރަހީމްގެ އިތުރުން ޕީޕީއެމްގެ ޕާލަމެންޓްރީ ގްރޫޕުގެ އިސް ބައެއް ބޭފުޅުން ވެސް ރޭ ވަނީ ސީދާކޮށްނާއި ނުސީދާކޮށް މައުމޫނަށް ބަހުގެ ހަމަލާތައް ދެއްވައިފަ އެވެ.
މައުމޫނަށް ފާޅުގައި ފާޅުވިދާޅުނުވެ، ޕީޕީއެމްގެ ޕާލަމެންޓްރީ ގްރޫޕުގެ ލީޑަރު އަހްމަދު ނިހާން ވަނީ އެހެން މީހަކު ކޮށްފައިވާ ޓުވީޓެއް ރީޓުވީޓް ކުރައްވައިފަ އެވެ.
އެ ޓުވީޓުގައި ވަނީ، އެމްޑީޕީގެ ވެރިކަމުގައި މައުމޫންގެ ގެކޮޅު، މއ. ކިނބިގަސްދޮށުގެ ދައުލަތަށް ނަގަން އުޅުނު ކަން އެމަނިކުފާނު ހަނދުމަފުޅު ނެތުނަސް، އެކަމުގެ ދިފާއުގައި މަސައްކަތް ކުރި މީހުން އެ ހަނދާން ނުނެތޭ ކަމަށެވެ.
ޕީޕީއެމްގެ ސެކްރެޓަރީ ޖެނެރަލް އަދި ނިލަންދޫ ދާއިރާގެ މެމްބަރު އަބްދުﷲ ޚަލީލް ކުރެއްވި ޓުވީޓެއްގައި ތުހުމަތުކުރެއްވި ގޮތުގައި އިދިކޮޅު ފަރާތްތަކުން މައުމޫން ބޭނުންކުރައްވަނީ، އެ މީހުންގެ ބޭނުންތައް ފުއްދުމަށެވެ.
މައުމޫނަށް އަމާޒުކުރާ ފާޑުކިއުންތަކަށް އިޝާރާތް ކުރައްވައި އެމަނިކުފާނު ރޭ ވިދާޅުވެފައި ވަނީ، ގައުމު އިސްލާހު ކުރުމަށްޓަކައި ސިޔާސީ އިދިކޮޅު ފަރާތްތަކުން ކުރަމުން އަންނަނީ ވަކި ޕާޓީއެއްގެ މަސައްކަތެއް ނޫން ކަމަށާއި އެއީ ގައުމީ މަސައްކަތް ކަމަށެވެ. އެ މަނިކުފާނު ކުރައްވާ މަސައްކަތްޕުޅުތަކަކީ ވަކި ފަރާތަކާ ދެކޮޅަށް އަދި ވަކި ފަރާތަކާ އެއްކޮޅަށް ވެސް ކުރައްވާ ކަންކަމެއް ނޫން ކަމަށް ވިދާޅުވި އެވެ.