ރާއްޖޭގެ ސިއްހީ ނިޒާމަށް ރައީސް އަބްދުﷲ ޔާމީން ގެންނެވީ "100 އިން ސައްތައިގެ" ކުރިއެރުމެއް ކަމަށް ހެލްތު މިނިސްޓަރު އަބްދުﷲ ނާޒިމް މިއަދު ވިދާޅުވެއްޖެ އެވެ.
ހުޅުމާލޭގައި ގާއިމުކުރި އޮންކޮލަޖީ ސެންޓަރު ހުޅުވައި ދެއްވުމަށް ފަހު، ނޫސްވެރިންނާ ވާހަކަ ދައްކަވަމުން ނާޒިމް ވިދާޅުވީ މިދިޔަ ހަތަރު އަހަރެއްހާ ދުވަހަށް އެކަނި ބަލާއިރު، ސިއްހީ ދާއިރާ އަށް ކުރި ޚަރަދު 100 ގުނަ އަށް އިތުރު ވެފައިވާ ކަމަށެވެ. ހަދަމުން އަންނަ ބައެއް ހޮސްޕިޓަލުތަކުން މިސާލު ނަންގަވަމުން ނާޒިމް ވިދާޅުވި ގޮތުގައި ރާއްޖޭގެ ސިއްހީ ނިޒާމަށް އަންނަނީ އިންގިލާބީ ބޮޑެތި ބަދަލުތަކެކެވެ.
މިނިސްޓަރު ވިދާޅުވި ގޮތުގައި ޕްރައިވެޓް ހޮސްޕިޓަލެއްގެ ގޮތުގައި ޓްރީޓޮޕް ހޮސްޕިޓަލްގެ ޚިދުމަތް މި އަހަރު ނިމުމުގެ ކުރިން ހުޅުވާނެ އެވެ. އަދި ހދ. ކުޅުދުއްފުށީ ހޮސްޕިޓަލް، 150 އެނދުގެ ހޮސްޕިޓަލަކަށް ތަރައްގީ ކުރަމުން އަންނަ ކަމަށް ވެސް އޭނާ ވިދާޅުވި އެވެ.
މީގެ އިތުރުން އައްޑޫގައި ހަދާ 100 އެނދުގެ ޓާޝަރީ ހޮސްޕިޓަލާއި ދަރުމަވަންތަ ހޮސްޕިޓަލް ނިންމައި އަންނަ އަހަރުގެ މެދުތެރޭގައި ޚިދުމަތް ދޭން ފަށާނެ ކަމަށް ނާޒިމް ވިދާޅުވި އެވެ.
"މިހާ ކުރު މުއްދަތެއްގެ ތެރޭގައި ސިއްހީ ނިޒާމަށް މިހާ ބޮޑު ބަދަލެއް އައި ދުވަސްވަރެއް ރާއްޖޭގެ ތާރީޚު ދެކިފައި ނުވާނެ ކަން އެއީ އަޅުގަނޑުމެންގެ ތާރީޚު ބަލައި ދިރާސާކޮށްފިނަމަ، ކަށަވަރުވެ، ޔަގީންވާނެ ކަމެއް،" ހެލްތު މިނިސްޓްރީ އާއި އާސަންދައިގެ ވެރިން ބައިވެރިވެޑައިގެންނެވި ބައްދަލުވުމުގައި ނާޒިމް ވިދާޅުވި އެވެ.
އޭނާ ވިދާޅުވީ މި ސަރުކާރު ވުޖޫދަށް އައިއިރު، 18 ވަރަކަށް އެނދުގައި ޑައިލެސިސް ހިދުމަތް ދެމުން އަންނައިރު، މިއަދު އެ ޚިދުމަތް ދިނުމަށް 50 އާ ގާތްކުރާ އެނދު ބޭނުން ކުރާ ކަމަށެވެ. އަދި އައިޖީއެމްއެޗްގެ ކެތު ލެބުން އެތައް ފުރާނައެއް ސަލާމަތް ކުރެވިފައިވާ ކަމަށް ވިދާޅުވި އެވެ.
ކެތު ލެބު ހުޅުވުނުތާ އަހަރަކަށް ވުރެ ގިނަ ދުވަސްވީއިރު، 1،500 އެއްހާ ޕްރޮސީޖަ ނުވަތަ ސާޖަރީ ހަދާފައިވާ ކަމަށް ވެސް ނާޒިމް ވިދާޅުވި އެވެ. އޭނާ ފާހަގަކުރެއްވި ގޮތުގައި އެއީ ދުވާލެއްގެ މައްޗަށް ދޭއް ނުވަތަ ތިން މީހުންނެވެ. މިއިން ކޮންމެ ބަލި މީހަކީ ކެތު ލެބް ހުޅުވިފައި ނެތް ނަމަ، ރާއްޖެ އިން ބޭރަށް ގޮސްގެން މެނުވީ ސިއްހީ ފަރުވާ ނުދެވޭނެ މީހުން ކަމަށް މިނިސްޓަރު ވިދާޅުވި އެވެ.
"މިއީ ކިތައް އާއިލާ އަށް، ކިތައް ބަލި މީހުންނަށް ގެނެވުނު ހިތްހަމަޖެހުމެއްތޯ އެބަ ވިސްނާ ފިކުރު ހިންގާލަން ޖެހޭ. މީގެން ސާބިތުކޮށް ދެނީ ރައީސް ޔާމީންގެ ސިޔާސީ އަދި ރިޔާސީ ވައުދެއް ކަމުގައި ތަކުރާރުކޮށް ވިދާޅުވާ ވިދާޅުވުން، ރައްޔިތުންގެ މައްސަލަތަކަށް ހައްލެއް ހޯދައި ދިނުމުގެ ވައުދު. އެމަނިކުފާނު އެ ގެންދަވަނީ ސާބިތުކަމާއެކު އެ ވައުދު ފުއްދަވައި ދެއްވަމުން،" ނާޒިމް ވިދާޅުވި އެވެ.
